提到日本四國高知縣，普遍日本人都會首先諗起日本知名歷史英雄坂本龍馬。高知縣唔單只係坂本龍馬故鄉，亦係一個擁有自然美景、豐富食材、歷史文化嘅地方。云云縣內觀光景點中，又以高知城最具代表性！今次，FUN! JAPAN編輯部就要帶大家認識一下高知城，以及週邊嘅推薦觀光景點等。
日本唯一完整保存「天守」與「本丸」嘅城堡
高知城建造於距今約400年前嘅江戶時代。當時山內一豐因關原之戰功績而獲德川家康分封土佐一國，而高知城就係由初代土藩藩主山內一豐請人建造而成，又名「鷹城」。城堡設計上易守難攻，登城階梯特別寬闊，上坡辛苦、下坡有利。為護城並防止敵人入侵，城堡上設有可丟落石、從牆壁刺出劍嘅隱藏機關等多個精巧又聰明嘅設計。高知城從1601年開始築城，經歷接二連三水災後，終於喺1611年完工，惟主要建築物曾於一場火災中被燒毀，其後再於1748年重建。
高知城內一共有多達15座建築物被列為「重要文化財」，城內亦係日本全國少數可以將「追手門」與「天守」影入同框嘅景點。重建天守、本丸御殿及瞭望守備塔等，以及未被燒毀嘅追手門等合計共15棟建築，有幸避過江戶幕府廢城令及戰爭影響留存至今，係百大名城中唯一本丸內建築得到完全保留嘅城郭。
高知城必睇之處
追手門
巨型城門「追手門」自1664年起就留存至今，橫跨於城牆上嘅城門同時具有瞭望塔功能，並且連接三方環繞嘅防衛迴廊，有助城內人士從多方向抵制攻城敵軍，係相當重要嘅把關口。城門前放有最早被指定為國寶嘅紀念石碑，從城門往內可以望到現存天守城郭，因此追手門前係拍攝高知城全景嘅最佳取景地點！
本丸御殿（懷德館）
高知城另一大特色係，主樓並非用於軍事用途，而係用作城主居住之地。現時各位所見到嘅本丸御殿就係當時城主住所，全日本當中更只有高知城至今仍將本丸御殿保存完整！遊客進入館內可以參觀解說牌，為您解說每個房間結構以及防衛上嘅設計等。御殿內部皆為木製，整體散發一著股江戶時代懷舊味道。
天守
高知城天守屬於獨立式望樓型天守，外觀為「四重六階（六樓四層）」。登上天守，您可以將整個高知市景盡收眼底。順帶一提，高知城本丸御殿與天守連接，亦係較為少見嘅構造。
名列「日本三大夜城」，賞花、點燈節目一籮籮
春天梅花、櫻花；夏天繡球花、蓮花；秋天紅葉；冬天山茶花，高知城一年四季都有不同美景可供欣賞。特別係櫻花季時，粉色櫻花與白牆形成強烈視覺對比，入夜後點燈亦相當完備與講究，打造與日頭截然不同嘅風貌。櫻花季時夜櫻，更係每位遊客必睇！
景點資訊
- 名稱：高知城
- 地址：高知縣高知市丸之内1丁目2-1
- 交通方式：乘搭土佐電鐵伊野線，於「高知城前」下車即達
- Wi-Fi：無
- 語言：官網有英文、中文（繁體／簡體）、韓文、泰文導覽手冊提供下載
- 天守閣門票：成人420日圓、未滿18歲免費
- 信用卡：無法使用
高知城附近推薦景點
高知城歷史博物館
高知城歷史博物館就位於高知城附近，因此唔少遊客於安排高知城景點時亦會順便到訪。博物館樓高3層，館内唔只有高知城相關展品，仲有關於坂本龍馬率領土佐藩嘅歷史資料。此外，館內設施亦多元豐富，展示室、自習室、和室、可以眺望高知城景色嘅café，以及出售當地紀念品嘅店家都一應俱全，非常適合悠閒hea返一日。參觀完高知城後，不妨順便嚟兜返個圈啦。
景點資訊
- 景點名稱：高知城歴史博物館
- 地址：高知縣高知市追手筋2丁目7-5
- 交通方式：土佐電伊野線「高知城前」徒歩約3分鐘
- 是否提供Wi-Fi：有
- 對應語言：英文、中文（繁體／簡體）
- 票價：1、2樓免費，僅3樓收500日圓〜700日圓入場費
- 可否使用信用卡：不支援
高知縣必逛「日曜市」
每逢星期日舉辦嘅日曜市，歷史竟然已經超過300年！「日曜市」從朝早5點左右就開始，但天未光都一樣吸引大批人潮。需要注意嘅係，如果睇啱有心頭好，手快有手慢無，唔快啲買就會俾人買晒㗎喇。攤檔除咗有賣水果、蔬菜、魚類等食物，仲有賣花同器皿等等。場內一蕭有成400個攤位咁多，啱晒邊買邊行邊食！距離高知城同高知城歷史博物館非常近，編行程時一次過去晒都唔錯吖！
景點資訊
- 景點名稱：日曜市
- 地址：高知縣高知市追手筋1丁目10
- 交通方式：高知站徒歩約10分鐘
- 是否提供Wi-Fi：沒有
- 對應語言：設有針對海外觀光客嘅情報資訊中心（僅限一部分）
- 票價：免費
- 可否使用信用卡：不支援
Comments