新潟縣上越市高田城嘅夜櫻景致相當迷人，即使環顧日本全國亦非常出名，更名列「日本三大夜櫻」之一。高田城係由於德川家康所發動嘅「天下普請」，令到多位「大名」（日本古代對封建領主之稱呼）出錢出力，費時4個月共同建造而成，成為越後國（即現時新潟縣）近代城郭。今次，編輯部就要為大家介紹高田城相關歷史以及必睇之處，同埋頭號推薦賞櫻活動！
新潟縣上越市．高田城歷史
新潟縣上越市高田城係德川家康六男、德川忠輝喺1610年成為高田藩藩主後，於1614年德川家康發動嘅「天下普請」之下，號召13位大名出錢出力共同興建嘅城堡。高田城屬於平城類型（並無築起石垣作為城牆），而係將附近河川當作護城河，以土壘興建曲輪。高田城內並無興建天守，反而改建三重櫓以作為天守，據聞係因為當時大坂之陣戰役在即，附近無石頭亦無時間去蒐集石頭，所以高田城只要用咗短短4個月就完工，而外護城河亦係用天然河川，成為佔地遼闊嘅高田城特徵之一。
高田城一大象徵：戰火後獲復原嘅三重櫓
高田城嘅本丸御殿、三重櫓等喺明治時代1870年因為火災而被燒毀，加上3年後廢城令頒布，高田城變成陸軍所擁有，大部分未遭火燒而倖存嘅建築亦遭拆除。直至1993年，三重櫓於新潟縣上越市設立20週年紀念事業下獲復原，至今成為高田城象徵之一。現時1、2樓展出高田城相關資料，3樓則為可以飽覽妙高山等景色嘅瞭望室。包括高田城在內嘅高田城跡公園亦已被列為新潟縣史蹟，文化設施、運動設施、以及環繞外護城河嘅散步步道等等成為唔少當地市民嘅休閒遊憩場所。
高田城跡公園內約4000棵染井吉野櫻
日本嘅城堡每逢櫻花季節，景色都會變得倍加迷人，更有唔少遊客特登揀櫻花季去日本，名列「日本三大夜櫻」之一嘅新潟高田城亦係相當受歡迎嘅賞櫻勝地之一。
高田城址公園以及周邊種植咗大約4000棵染井吉野櫻，每逢櫻花盛開之際，當地就會舉辦「高田城址公園賞櫻會」櫻花祭典，掛上約3000個紙燈籠照亮櫻花及櫻花樹群，呈現出夢幻「櫻花大道」畫面，畫面靚到令人窒息！往年舉辦嘅「高田城址公園賞櫻會」每年都會吸引約120萬人到訪，可以稱得上係高田城最熱鬧非凡嘅季節。
高田城入選「日本三大夜城」之一
日本有「三大夜景」、「三大夜櫻」等眾多三大頭銜，高田城亦唔例外。2014年時，高田城就喺由日本全國約4300位夜景鑑賞師經過實際到訪當地調查，以及嚴正地用6項評定項目審查之下，聯同大阪城、高知城獲認證「日本三大夜城」，絕對有一到價值！
景點資訊
- 名稱：高田城（高田城址公園內）
- 地址：新潟縣上越市本城町44-1
- 開城時間：09：00～17：00
- 定休日：星期一（適逢公眾假期會順延至隔日休息）、公眾假期隔日、12月29日～1月3日（黃金週、暑假期間正常營業，其他亦有可能出現臨時休息）
- 票價：普通310日圓、小學及中學生、高中生160日圓
- 交通：越後心動鐵道妙高躍馬線高田站徒步約30分鐘／頸城巴士「高田城址公園入口」站落車徒步約5分鐘
Comments