當你聽到「福井縣」呢個地方，第一時間會諗起咩呢？恐龍？越前蟹？但其實福井除咗恐龍、越前蟹之外，仲有超級多值得一遊嘅好地方喔！
福井擁有美麗嘅大自然風光、歷史建築、仲有可以體驗傳統文化嘅景點。今次，小編要為大家介紹福井超吸睛嘅旅遊景點、美食、傳統工藝等，等大家下次去福井可以玩得更盡興。
究竟福井縣位於本州邊個位置？先來了解有關福井誕生嘅歷史吧！
福井縣位於日本中部地區（北陸地區），面向日本海，鄰接著石川縣、岐阜縣、滋賀縣和京都府等四個府縣。
現時嘅福井縣昔日為越前國、若狹國嘅領土。後來，江戶時代時設置藩政，並分為幕府直轄地和藩領地。不久之後，藩政被廢除。福井縣於明治14年（1881年）由石川縣和滋賀縣等幾個地區合併而成。
福井縣擁有悠久歷史和豐富嘅大自然資源，並孕育出獨特文化和多樣化嘅傳統工藝品，保存有不少歷史景點和古老城鎮，係一個可以同時享受文化、歷史和大自然美景嘅好去處。
福井擁有城堡和寺廟等多個歷史景點！
左上：丸岡城、右上：一乘谷朝倉氏遺跡
左下：越前大野城、右下：熊川宿
福井縣擁有城堡、寺廟和神社等，能讓人感受到其歷史和文化嘅景點。
當中，以丸岡城最為著名。丸岡城係北陸地區唯一擁有現存天守閣嘅城堡，被指定為國家重要文化財。
其他值得推薦嘅歷史觀光景點
- 永平寺：擁有超過770年歷史，係曹洞宗嘅總本山，亦係進行禪修嘅道場
- 一乗谷朝倉氏遺跡：經重建並復原與昔日同樣大小嘅武家屋敷（家宅）和町屋等嘅城下町
- 越前大野城：建於海拔約249米山上嘅城堡，如果運氣好嘅話，喺秋天到春天之間可以欣賞得到被雲海包圍嘅「天空之城」
- 熊川宿(鯖街道)：保留著古老藏屋敷遺跡嘅宿場（宿驛）
- 御誕生寺：係一間可以影到多隻貓咪濟濟一堂吸睛貓咪相，更被稱為「貓寺」嘅寺廟
福井有多個絕美嘅大自然景點
左上：東尋坊、右上：彩虹線
左下：足羽川櫻花大道、右下：九頭龍湖(紅葉)
福井縣擁有大海、湖泊、花卉等大自然景點，可謂係一個藏有多個絕景勝地嘅寶庫之地。
當中被列為「國家天然紀念物」嘅東尋坊，其峭壁絕景更成為當地代表性嘅觀光景點。沿著海岸線延伸，長約1公里嘅「輝石安山岩」的柱狀節理相當壯觀，令人驚嘆！據聞全球只有三個地方，可以欣賞得到咁壯觀嘅自然景觀喔。
其他值得推薦嘅大自然觀光景點
- 彩虹之路山頂公園：在於時尚嘅空中花園俯瞰日本海和「三方五湖」美景
- 西山公園：公園內盛開著11個品種約5萬棵杜鵑花，仲有櫻花、油菜花、紅葉等各種不同花卉
- 足羽川櫻花大道：位於河畔嘅櫻花大道，全長約2.2公里，共有約600棵櫻花樹，亦係「櫻花名所100選」之一
- 九頭龍湖：佔地8.9平方米、長達13公里嘅巨大人造湖。山巒四季景色美不勝收，包括紅葉和被白雪覆蓋等絕景。
- 蘆原溫泉：集合屋台村、免費足湯設施、祭典等旅遊元素於一身嘅溫泉勝地
講起福井唔少人都會諗起恐龍吧？絕不可錯過嘅旅遊景點「恐龍博物館」
福井縣係日本恐龍化石挖掘率最高嘅地方，到處都有與恐龍相關嘅商品和設施。特別係以恐龍為主嘅地質、古生物學博物館——福井縣立恐龍博物館。館中更展出44具恐龍骸骨、標本、影像和大型復原立體透視模型等。另外，福井站西口出口仲有個「恐龍廣場」，可以欣賞得到巨大嘅3D恐龍錯視插畫、恐龍主題藝術畫像等，係人氣嘅影相打卡景點。
縣內各地販售「恐龍發掘布甸」、「恐龍發掘型年輪蛋糕」等印有恐龍圖案嘅商品，吸睛又可愛，啱晒買嚟做手信喔。
福井嘅越前蟹和新鮮海鮮都非常好味道！
面向日本海嘅福井縣，擁有豐富多樣嘅新鮮海鮮，當中，越前蟹可算係最廣為人知。越前蟹嘅捕獲期係每年11月到3月，喺呢段期間可以品嚐到新鮮嘅螃蟹。但小編建議大家可以喺11月底去，因為喺呢段期間可以品嚐到好味得嚟，CP值（性價比）又高嘅螃蟹。
除此之外，福井縣全年都可以享用到其他多款新鮮海鮮。如果想要品嚐美味海鮮嘅話，推薦去「福井鮮市場」（福井市中央卸賣市場）或「日本海魚市場」覓食啦。
相關文章
鯖江眼鏡等豐富傳統工藝品
左上：鯖江眼鏡、右上：越前漆器
左下：若狹塗筷、右下：越前和紙
福井縣出產多項傳統工藝品，包括鯖江眼鏡、越前漆器、越前燒、若狹塗筷、越前和紙、越前刀具等。推薦喺各產地體驗製作傳統工藝品，或買嚟做手信喔。
另外，世界著名眼鏡產地之一嘅鯖江市更設有眼鏡博物館（MEGANE MUSEUM），展示各式各樣嘅眼鏡，除咗可以即場買鯖江眼鏡之外，仲可以欣賞得到與眼鏡相關嘅展覽。
福井都可以盡享雪之樂趣！出發去滑雪場玩雪吧～
福井縣位於北陸地區，冬天會落雪，縣內有多個滑雪場，除咗可以玩單板、雙板滑雪外，仲有玩雪樂園、雪上健行等，無論係大人定小朋友都可以喺福井縣盡情享受雪之樂趣。下次冬天去福井時，記得要去滑雪場大玩特玩，有別於唔會落雪嘅香港，可以感受一個不一樣嘅冬天。
福井縣推薦滑雪場
- 勝山滑雪場（SKIJAM）：日本西部最大嘅滑雪場，最長滑行距離為約5800米
- 福井和泉滑雪場：初學者滑道較多，場地細但五臟區全嘅滑雪場
- 九頭龍滑雪場：擁有多條緩坡、中斜面滑道，且可視度高，深受家庭顧客喜愛
去福井縣的交通方式
如果想使用公共交通工具去福井，可以乘搭新幹線或鐵路列車，以JR福井站為目標站。
從東京、大阪和名古屋等地去福井站，可以乘坐新幹線或高速巴士。如果想要乘坐日本國內航班到達，可以先到石川縣嘅小松機場，然後轉乘鐵路前往福井站。
所需時間一覧（出發地與交通工具）
| 交通方式 | 東京 | 大阪 | 名古屋 |
| 鐵路 | 約3時間10～20分鐘 （從東京站乘搭北陸新幹線/ 東海道新幹線出發） | 約2小時 （從大阪站乘搭特急雷鳥號出發） | 約1小時30分 / 2小時10分 （從名古屋站乘搭東海道新幹線/ 特急白鷺號出發） |
| 高速巴士 | 約8小時 （從東京站出發） | 約3小時30分 （從大阪梅田站出發） | 2小時50分 （從名古屋名鐵巴士中心出發） |
| 飛機 | 約1小時40分 （從羽田機場到小松機場，然後從小松站前往福井站） ※台灣至小松機場有直航班機到達 | ／ | ／ |
相關文章
Comments