位於福井縣永平寺町嘅永平寺，係佛教曹洞宗嘅總本山，直至現時為止仍然係唔少曹洞宗僧侶嘅修行地點。2015年，寺院就因為獲得法國旅行指南『米芝蓮日本綠色指南』兩星評價而成為一時熱門旅遊佳話！
關於永平寺
永平寺係一座由道元禪師創立嘅坐禪修行道場。1244年，正值道元禪師年屆47歲之時，禪師就將道場改名為「永平寺」並於此地指導僧侶。直至780多年後嘅今日，永平寺依然係被認為禪宗中最嚴格嘅寺廟，寺內現時大約有180名僧侶正進行修行。面積超過10萬平方米嘅廣闊佔地內一共建有70多個展館及大廳，其中山門、佛殿、僧堂、大庫院(廚房)、東司(浴室)、法堂都由迴廊連接並被統稱為「七堂伽藍」，遊客有機會可以一窺僧侶們嘅生活。
永平寺必睇之一：「唐門」及石階兩旁樹齡500年老杉木
一般人無法進入位處入口右側嘅唐門，雖然只能從石階底部仰望，但由於其結構端莊，因此成為熱門影相景點之一。菊花紋係代表日本皇室嘅家徽，而林立於通往唐門石階兩旁嘅巨型杉木，樹齡據講更已超過500多年，係寺內一大必睇位！
永平寺必睇之二：「傘松閣」天花板畫
「傘松閣」係一幢兩層高嘅建築，一樓設有一個等候室及供信徒使用嘅住宿；二樓則有一個闊約156塊榻榻米大嘅大廳，天花板上掛有出自144位日本畫家手筆嘅230幅金箔裝飾日本畫畫作。當中大多數都以描繪自然主題為主，惟其中亦隱藏著5幅以升天錦鯉、2條白錦鯉、1隻合上嘴巴嘅白獅子、1張張開嘴巴嘅藍獅子以及1隻松鼠嘅作品，有時間的話不妨仔細睇睇！
永平寺必睇之三：「法堂」與「大庫院」
法堂係位於七堂伽藍中最高處嘅大殿，建築內主要進行早晨誦經等佛教法事。建築物室內面積約為420張榻榻米，法堂中央供奉著「聖觀世音菩薩」。
另一方面，大庫院（廚房）中則可見到負責烹飪等廚房事務嘅僧侶身影。佢哋每日都會早於凌晨1:30左右就起身，為每個人準備食物！
永平寺必睇之四：修行僧侶嘅日常生態
僧堂、浴室與東司三座建築被合稱為嚴禁交談嘅「三默道場」。「僧堂」內每個僧侶都會獲分派一張榻榻米，作為禪修、食飯以及瞓覺嘅地方；僧侶們於「浴室」內沖涼時必須依照既定程序，並且只能於帶有4或9數字嘅日子正式沖一次涼；而「東司」洗手間亦有嚴格規定，可謂日常生活每個細節都屬於修行一部分！上述建築物皆無開放入內參觀，遊客只可能從外部觀看。
關於寺廟
- ・建立…寛元2年（1244）
- ・本尊…釋迦如來・彌勒佛・阿彌陀如來
- ・祭典…九頭龍祭典「永平寺大燈籠放流（永平寺町主辦）」（8月下旬）等等
景點資訊
- 名稱：永平寺
- 地址：〒910-1228福井縣吉田郡永平寺町志比5-15
- 交通方式：越前鐵道・勝山永平寺線「永平寺口站」乘搭京福巴士「永平寺門前行」，或者「永平寺行」約13分鐘於終點站下車後，步行約5分鐘。JR福井站轉乘越前鐵道的話，從JR福井站東口比較方便；又或從福井站前往永平寺門前，乘搭每日運行嘅特急永平寺LINER（京福巴士），所需時間約30分鐘。
- 語言：官方網站、現場設有英語導覽手冊
- 門票：500日圓
- 休息日：不定休
- 開放參拜時間：8：30～17：00（依季節而有變動）
Comments