日文「牛かつ」（Gyukatsu）即係厚實嘅牛肉用麵包糠外衣包裹，然後油炸成金黃色嘅炸牛扒。從2015年左右喺日本掀起一股熱潮，直至現時，炸牛扒專門店仍然人潮不絕。今次，小編會介紹炸牛扒嘅基本食用方式、東京必試嘅炸牛扒專門店等相關資訊。下次有機會，記得要試試文中介紹嘅炸牛扒店啊！
※本文中提及嘅店家數量、餐單以及價格（含稅）均為截至2023年8月撰寫時資訊。由於內容可能會出現變動嘅情況，詳細資訊請以各店家官方網站為準。
炸牛扒係？點解喺日本會變得咁受歡迎？
炸牛扒嘅起源可以追溯至明治時代（1868～1912年）初期，當時日本傳入一道名為「Cutlet」嘅西方料理，而日文係「コートレット」（使用未成年嘅牛肉，並將其切片，沾上麵包糠後煎烤而成）。呢道料理名稱嘅讀音後來演變成「Katsuretsu」，日文係「カツレツ」。
一開始雖然使用牛肉製作，但隨著牛肉供應減少，豬肉便逐漸於民間普及。由於豬肉亦非常適合製作成「Katsuretsu」，因此除咗喺大愛牛肉嘅近畿地區以外，使用豬肉製作嘅炸豬扒便成為主流。然而，隨著炸牛扒風潮興起，如今炸牛扒專門店更發展成連鎖店，令人紛紛投入炸牛扒嘅懷抱。
製作炸牛扒的基本步驟係？
製作炸牛扒嘅基本步驟係，先將切成厚片嘅牛肉順序先裹上麵粉、蛋液、麵包糠，然後油炸。與使用豬肉嘅炸豬扒相比，炸牛扒特點在於只需快速炸熟即可食用。如果炸得太耐，可能會變得比較硬，因此為保留肉質嘅鮮嫩口感，使用高溫油迅速油炸係製作嘅關鍵要訣。
酥脆嘅薄衣外層、加上內裡軟嫩多汁嘅赤身牛肉，味道令人一咬傾心。另外，肉身油脂於口中融化嘅口感，以及清爽易入口等特徵，亦深受女性喜愛。望住仿如紅寶石般、生鮮程度極高嘅牛肉，令人未食先興奮，打卡一流！
推薦享受炸牛扒的食用方法係？
炸牛扒雖然簡單，但採用嘅材料、炸嘅時間等每個細節都會影響味道。專門店內有芥末醬油、岩鹽，仲有獨特嘅特製醬汁等，根據唔同店舖會各自提供各種風味嘅醬料和調味料任君挑選。另外，甚至有店舖可以選擇肉嘅熟成程度。
東京美味炸牛扒專門店3選
東京擁有多間不同風味嘅炸牛扒專門店！小編從中揀選出三間人氣專門店，即刻睇睇有邊三間啦。
【澀谷、原宿、秋葉原等地】炸牛 京都勝牛（牛カツ 京都勝牛）：源自京都的專門店，提供包括稀有部位在內
至少5種選擇
「炸牛 京都勝牛」（牛カツ 京都勝牛）係一間起源於京都，成立於2014年嘅炸牛扒專門店。創造出將西式炸牛扒融合到和食嘅定食中，並非常講究時間上嘅控制。使用精心計算過嘅溫度及時間進行油炸，以達至半熟程度，最大限度地保留肉質嘅鮮美。酥脆嘅外皮完美地封鎖肉身嘅美味，呈現出深層次嘅好滋味。
包括西冷牛扒、牛舌、羽下等稀有部位在內，至少5種部位供君選擇。由於客人可以利用鐵板上加以燒烤，因此可以根據燒烤程度帶來多種不同風味，例如中熟嘅融化口感，或如牛扒般嘅口感。店裡提供芥末醬油、山椒鹽、炸牛扒專用醬汁等多款醬汁和調味料，可以自己調製多種不同風味。
「炸牛 京都勝牛」必食招牌套餐①：京都勝牛入口即溶的最高級牛肉「極上黑毛和西冷炸牛扒定食」
極上黑毛和西冷炸牛扒定食 / 4,939日圓起（含稅）
呢個定食中嘅炸牛扒使用獨具特色嘅雪花和牛肉質製作而成，其細膩且肉質上乘為最大特徴。入口即可品嚐得到和牛原本嘅可口甜味。建議食第一塊嘅時候，直接搭配芥末醬油享用，可以感受到牛肉就好似食刺身一樣，溶化於口中，非常過癮！另外，放上鐵板上燒烤後享用，便能品嚐到宛如牛扒般嘅多汁美味。
「炸牛 京都勝牛」必食招牌套餐②：風味濃縮！可品嚐稀有部位「羽下肉」的美味「牛里肌炸牛扒定食」
牛里肌炸牛扒定食 /2,079日圓起（含稅）
使用凝縮著牛肉風味嘅稀少部位「羽下肉」所製作嘅「牛里肌炸牛扒定食」。唔止可以充分享受赤身牛肉嘅好味道，仲可以搭配埋芥末醬油、山椒鹽、炸牛扒專用醬汁、和風咖喱蘸醬等享用，一個套餐為您帶來多重風味。
以下為部分店舖例子：
- 【炸牛 京都勝牛 澀谷道玄坂店】
地址：東京都澀谷區道玄坂1-19-14 Century Shibuya B1F
交通：從各線「澀谷站」步行約5分鐘即可抵達 - 【炸牛 京都勝牛 原宿明治通店】
地址：東京都澀谷區神宮前4-31-11 Harajuku TK Building B1F
交通：從東京Metro「明治神宮前站」步行約1分鐘，從JR「原宿站」步行約5分鐘 - 【炸牛 京都勝牛 Yodobashi-Akiba店】
地址：東京都千代田區神田花岡町1-1 Yodobashi-Akiba 8F
交通：直通各線「秋葉原站」 - ※京都8間分店、東京15間分店、神奈川5間分店、大阪7間分店、愛知5間分店、福岡3間分店
- 官方網站：https://gyukatsu-kyotokatsugyu.com/
【上野、澀谷、池袋等地】炸牛 元村（牛かつ もと村）：油炸時間60秒！搭配熱石燒和山葵醬汁品嚐！
「炸牛 元村」（牛かつ もと村）被譽為帶頭吹起炸牛扒風潮嘅店舖之一。日本嘅飲食文化中，提到「炸」，即日文嘅「カツ」（Katsu）呢個詞，往往會聯想到用以豬肉製作嘅炸豬扒，而呢間「炸牛 元村」係將炸牛扒推廣至日本全國，讓大眾認識炸牛扒嘅先驅。
「炸牛 元村」獨特之處在於非常講究要將炸牛扒原本嘅美味發揮得淋漓盡致。為咗達到呢個目標，將油炸時間控制喺60秒左右。薄薄嘅外層包裹著牛肉，保留著中間微嫩嘅口感，優雅地呈現到你眼前。切成細細塊嘅炸牛扒，帶著誘人嘅微紅色切面，令人垂涎欲滴。食之前可以將炸牛扒放上隨餐附上嘅熱石上燒一燒，一場味蕾嘅饗宴隨即展開，令人欲罷不能。
作為一間炸牛扒專門店，「炸牛 元村」仲有另一項獨到之處，就係餐單嘅豐富多樣性。基本上，主菜只有炸牛扒，可以根據個人喜好選擇炸牛扒嘅克數、配菜以及飲品。
「炸牛 元村」必食招牌套餐：可以親自落手燒出「您想」火候&體驗品嚐過程中美味變化嘅「炸牛扒定食 3種小菜」
炸牛扒定食 3種小菜（炸牛扒130g） / 1,930日圓（含税）～
以炸得脆薄嘅外衣包裹著半生熟嘅牛扒，再自行利用餐檯上嘅火熱石頭輕烤後享用。食第一塊炸牛扒時，先單純享受岩鹽嘅純粹風味，然後蘸上芥末和醬油，再試試特調嘅山葵醬汁，每種搭配都能帶來截然不同嘅驚喜。另外，綿密嘅山藥泥和明太子與麥飯嘅搭配更係天衣無縫，「炸牛 元村」嘅炸牛扒將為你帶來一場愉悅嘅美食之旅。
以下為部分店舖例子：
- 【炸牛 元村 上野店】
地址：東京都台東區上野4-10-17 手塚大樓2樓
交通：從各線「上野站」步行約2分鐘即可抵達 - 【炸牛 元村 澀谷店】
地址：東京都澀谷區澀谷3-18-10 大野大樓2號館地下1樓
交通：從各線「澀谷站」步行約1分鐘即可抵達 - 【炸牛 元村 池袋店】
地址：東京都豐島區南池袋3-13-10 ISP第三大樓2樓
交通：從各線「池袋站」步行約2分鐘即可抵達 - ※東京共有12間分店（包括9月開幕嘅西武新宿店）、神奈川1間分店、大阪3間分店、福岡2間分店、沖繩1間分店（包括9月開幕嘅那霸國際通店）
- 官方網站：https://www.gyukatsu-motomura.com/
【池袋】炸牛 IROHA（牛かつ いろは）：油炸時間僅需1分鐘！更可使用餐檯上石盤加以燒烤而成嘅香脆炸牛扒！
「炸牛 IROHA」（牛かつ いろは）係一間午市時間總會排長龍嘅炸牛扒店，除咗舉辦特定活動期間，一般只會提供以炸牛扒為主菜嘅定食套餐。堅持外層要夠薄，確保肉汁和風味不流失，並將油炸時間控制於肉質呈半熟狀態嘅程度，致力提供優質美味嘅炸牛扒。油炸時間約1分鐘，再搭配餐桌上備有嘅石盤進行燒烤，呢個就係「炸牛 IROHA」嘅獨特食法！
當新鮮炸好嘅炸牛扒送到去你面前，首先將第一塊要品嚐嘅炸牛扒放於石盤上，聆聽著嘶嘶作響嘅聲音、享受飄來嘅香氣，再將燒好嘅美味炸牛扒放入口品嚐，正正係「炸牛 IROHA」嘅品嚐風格。就算將炸牛扒燒至全熟，牛肉亦能保持軟嫩，咬落瞬間，封鎖於肉質內嘅美味便於口中擴散，好味到令人心滿意足。
「炸牛 IROHA」必食招牌套餐：將新鮮炸得香脆嘅炸牛扒放於熱石盤上加以燒烤，大嘆箇中滋味的「炸牛定食」
炸牛定食 / 1,630日圓（含税）～
將脆薄外衣包裹著半熟牛肉嘅炸牛扒放於石盤上燒烤後，即可享用嘅「炸牛扒定食」。可以搭配山葵醬、醬油、岩鹽三種不同風味，並搭加入日本芥末一同品嚐。另外，根據個人喜好，仲可選擇加購其他小菜。
店舖詳情：
- 【炸牛 IROHA】（牛かつ いろは）
地址：東京都豐島區東池袋1-9-7 友光大樓 B1F
交通：從各線「池袋站」步行約1分鐘即可抵達 - 官方網站：https://www.instagram.com/gyukatsu_iroha/
下個東京之旅，不妨去品嚐一下炸牛扒的好滋味，盡情享受牛肉的原汁原味吧！
不同店舖嘅炸牛扒由於食材、醬汁和炸製方式等方面各有不同，呈現出各種不同風味。當去東京時，記得要去試一試呢款外衣酥脆，內裡包裹著呈現出牛肉原始風味嘅炸牛扒啦。
東京美食景點＆必食美食系列
新宿地區
澀谷地區
淺草地區
上野地區
Comments