新宿唔止有拉麵、燒肉、壽司、涮涮鍋、居酒屋等日本料理店，仲有其他多國料理餐廳，任君挑選，選擇多到令唔少人喺揀選午餐或晚餐時都會出現猶豫不決，唔知揀邊間至好嘅情況出現呢。近年，以日本祭典、昭和復古風格、室內公園等為設計理念嘅地方亦不斷誕生！唔只可以享受美食，仲可以欣賞到店內嘅設計和氛圍添。
今次，小編會按照新宿站嘅出口分類，為大家介紹各種飲食店、餐廳聚集嘅地方、該區域特徵和氛圍，以及美食類型。
避免喺新宿盪失路的兩大訣竅：把握新宿站出口特徵！
如果計劃喺新宿用餐，建議事先查定目標餐廳，距離新宿站邊個出口最近。因為新宿站有好多條唔同嘅電車路線上落客，所以車站結構非常複雜，一唔小心就會成為迷途羔羊。如果揀錯出口，可能要行一大段冤枉路，兜大圈先至去到目的地，所以最好事先了解新宿站出口嘅情況啊！以下落嚟，為大家介紹免成為新宿迷途羔羊嘅兩大訣竅。
出口、檢票口（即閘口）一覧表
- 東口出口方面：東檢票口（B1F）、中央東檢票口（B1F）
- 南口出口方面：南檢票口（2F）、東南檢票口（2F）、新南檢票口（2F）、甲州街道檢票口（2F）、未來塔檢票口（2F）
- 西口出口方面：西檢票口（B1F） 、中央西檢票口（B1F）
※檢票口，香港稱為閘口，日語為「改札」。
💡訣竅① 記住以上9個檢票口（閘口）嘅位置，究竟係位於出口嘅東口方向、南口方向、定係西口方向，咁樣就可以減低行錯方向嘅可能性。
💡訣竅② 要知道目標檢票口（閘口）位於新宿站邊個樓層。根據上列一覽表，新宿站內有地庫1樓（B1F）、1樓（1F）和2樓（2F）三層構造。如果記住出口所在樓層，就能避免又上又落兜大圈，查看平面圖時亦更易了解。
以下落嚟，小編會按照主要出口分類介紹各種飲食店。
新宿站 東口（中央東口）的美食資訊
新宿站東檢票口嘅南側設有中央東檢票口，相隔約從東口步行3分鐘距離。呢個地區周邊設有多間購物中心、百貨公司、飲食街，係一個有好多用餐選擇嘅地區。另外，購物中心、百貨公司內設有時尚餐廳，而日式商店街和餐飲街則有多間散發著濃厚日本風情嘅居酒屋。即刻去睇睇新宿站東口附近嘅餐飲店和設施推薦先！
① LUMINE EST新宿
以年輕女性為主要目標客群嘅商業設施。由於購物中心設於車站大樓內，意味著你即使出閘後都無需離開車站就可以好方便咁去到。當中特別值得一提嘅係，於2019年重新裝修，以「會變化的公園」為概念，位於8樓嘅「The PARK SHINJUKU」，絕對係打卡影靚相嘅絕佳地點。喺呢個自由開放嘅空間裡，可以品嚐到日本料理、中華料理、異國料理、甜品等豐富多元嘅美食。
👣位置：從東口步行約1分鐘/ 中央東口即可抵達 🍽餐廳數量：約28間（7F、8F）
② 新宿東口商店街
日本數一數二嘅商店街。集合美食、時尚、娛樂等店舖，係一個吸引各個年齡層遊客嘅地區，因此擁有多種不同類型嘅餐廳選擇，當中包括拉麵、中華料理、異國料理、京都懷石料理、天婦羅和壽司等，從平價用餐到高價餐飲嘅選擇都應有盡有。
👣位置：從中央東口步行約1分鐘 🍽餐廳數量：約104間
③ 龍乃都飲食街 – 新宿東口橫丁
以龍宮城嘅城市為設計理念嘅娛樂型飲食街。利用靠近車站嘅飲食大樓所打造而成嘅飲食街，以豐富多彩嘅霓虹燈、燈籠、「Disco鏡面球」等裝飾，營造出幻想般嘅世界。可以喺度品嚐來自日本各地嘅當地特色美食，例如壽司、鐵板燒，仲有中華料理、意大利料理等各種美食。
👣位置：從中央東口步行約1分鐘 🍽飲食店數量：17間
④ 東急歌舞伎町TOWER
呢座擁有地庫5層、地上48層，高度達225米嘅複合設施。從1樓至5樓有著各式各樣嘅餐廳。2樓嘅「新宿kabuk hall～歌舞伎横丁」更以「日本祭典」為主題，使用豐富多彩嘅霓虹燈裝飾，喺呢個佔地約1,000平方米嘅樓層，聚集了10間屋台風格餐飲店。料理種類有來自日本各地嘅特色美食、丼飯、雞肉串燒、餃子等等。呢度係可以一邊感受祭典氛圍，一邊用餐嘅地方喔。
👣位置：從東口步行約7分鐘 🍽飲食店數量：約10間（2F）
⑤ 歌舞伎町Red Noren街
利用日式風情嘅古民家3棟長屋經過完整翻新改造，聚集總共7間飲食店嘅街道。亦係一條融合紅燈籠點綴，充滿昭和時代懷舊風格和幻想氛圍嘅飲酒街呢！呢度有提供雞肉串燒、牛舌、炸串等，與古民家風情相搭配嘅料理店，亦有提供多種日本酒雞尾酒嘅酒吧和小酒館，散發著獨特嘅活力，令人飲得更開心，食得更盡興。
👣位置：從東口步行約5分鐘 🍽飲食店數：7間
⑥ 新宿黃金街
源自戰後黑市，極具懷舊氛圍嘅飲酒街。特點係大多數店舖僅有吧檯座位。另外，為免佔據狹窄嘅店內空間範圍，通常會避免一大班人入店、亦唔會長時間逗留，反而係翻桌連續去2至3間店，以上幾項潛規矩大家記得要留意返啦！唔少店舖會提供雞肉串燒、小菜料理、炸串等，適合搭配美酒享用嘅料理。
👣位置：從東口步行約5分鐘 🍽飲食店數：約超過280間
⑦ 伊勢丹 新宿店
與新宿三丁目站連結，目標客群廣泛嘅百貨公司。販售從20多歲到中高齡層等，各年齡層嘅商品。既有輕鬆休閒餐廳，亦有歷史悠久嘅老舖料亭，提供適合各年代嘅人都能享受嘅餐廳。
👣位置：從東口步行約5分鐘 🍽餐廳數量：共37間
⑧ 新宿丸井 本館
主要以年輕女性為目標客群嘅百貨公司，提供時尚且價錢合理嘅商品。當中，有氛圍輕鬆隨意、可輕鬆品嚐美食嘅餐廳，亦有時尚吸睛，非常適合打卡嘅甜品咖啡店等等。
👣位置：從東口步行約5分鐘 🍽餐廳數量：約4間
新宿站 南口（新南口）的美食資訊
從南出口出來，穿過甲州街道嘅斑馬綫，經過新宿高速巴士總站（Busta）建築物旁，去到「Southern Terrace」，就會到達新南口，大約需時3分鐘。呢個區域擁有各種商業設施，包括購物中心和百貨公司，每個設施都有不同類型嘅餐廳區域。小編將分別以南口和新南口，進行相關介紹。
① 新宿LUMINE 1 ＆ ② 新宿LUMINE 2
呢個商業設施有著眾多大受年齡介乎於20到30幾歲嘅職業女性喜愛嘅品牌店舖。由於位於車站大樓內，即使撞正落雨天亦無需開雨傘，行街行得更自在。更擁有多間提供各種甜品、法蘭西多士等多樣美食嘅咖啡店。另外，仲有中華料理、和食、西餐、亞洲料理等多種不同風格嘅餐廳，可謂選擇多多。當你猶豫不決唔知食咩好時，不妨到此一遊，總會搵到間「你想」餐廳！
👣位置：南口步行約1分鐘 🍽餐飲店數：（LUMINE 1）約22間、（LUMINE 2）約5間
③ 新宿MYLORD
與新宿車站直通嘅商業設施，主要有賣時尚服飾和配件等商品，並以20多歲嘅女性為目標客群。餐廳位於7樓至9樓，每個樓層皆為不同設計概念。
7樓係適合聚集好友同聚一堂嘅休閒餐廳層；8樓則有各種各樣多樣化嘅店家；9樓有可以欣賞到夜景嘅餐廳，能享受大人的成熟氣氛。
※因重新開發工程，預計於2025年4月前結束營業。
👣位置：鄰近南口 🍽餐飲店數：約22間（7F～9F）
④ NEWoMan新宿
與新宿車站直通嘅商業設施，主要目標客群年齡層為30至40幾歲，為追求高品質生活方式嘅女性而設。餐廳陣容非常豐富，包括提供大受女性歡迎嘅天然酵母麵包、使用當地新鮮蔬菜為食材嘅歐風料理店，以及可以品嚐到嚴選自日本各地生蠔嘅生蠔吧等，有著各種不同類型嘅精緻美食。
👣位置：新南口一出即可抵達 🍽餐飲店數：約20間
④ 新宿高島屋
國內一流品牌、優質商品林立，與新宿站直通嘅老字號百貨公司。除咗販售以高品質為主嘅商品，呢度亦有多間高級感餐飲店和餐廳。當中，有懷石料理、壽司、涮涮鍋、天婦羅等和食，亦有印度料理、中華料理等不同風味嘅餐廳，種類相當豐富。
👣位置：從新南口步行約2分鐘 🍽飲食店數：約33間（12F～14F）
新宿車站 西口（中央西口）的美食資訊
西改札南側有中央西改札，從中央西改札到西口步行約3分鐘，即可到達高樓林立嘅辦公室街道，與熱鬧繁華嘅街區相鄰地帶。以下落嚟，小編會為大家介紹西口附近嘅商業設施和餐飲店街。
① 新宿西口思出橫丁
位於新宿站西口附近，散發著昭和時代懷舊氛圍，極具深度嘅飲酒街。呢度係一條起源於戰後開始經營黑市嘅橫丁。當時為應付戰後物資短缺嘅問題，政府進行相關物資管制，而牛、豬內臟等並未受到監管。因此，呢個地區有多間店舖開始經營烤內臟店。時至今日，呢度佔半數以上都係經營烤內臟、雞肉串燒嘅店舖呢。
👣位置：從西口步行約3分鐘 🍽餐廳數量：約60間
②新宿西口HALC（小田急百貨店 新宿店）
小田急百貨店 新宿店本館於2022年10月搬遷至新宿西口HALC並進行翻新開業。新宿西口HALC 8樓有高級中華料理店、高級燒肉店、會席料理店等，而地庫3樓則有串燒、御好燒等店舖，係一個可以喺輕鬆休閒嘅氛圍中享用美食嘅好地方。
👣位置：從西口步行約5分鐘 🍽餐廳數量：（B3F＆MB3F）10間、（8F）5間
③ 京王百貨店 新宿店
主要客群為中年至老年人士，並提供適合多個年齡層嘅服裝和美食等嘅商業設施。喺8樓嘅餐廳區域，可以品嚐到京都懷石料理、壽司、天婦羅、炸豬扒、法國料理、中國料理等名店，可於舒適嘅氛圍中享受美食。
👣位置：從中央西口步行約1分鐘 🍽餐廳數量：17間
相關文章
Comments