日本旅遊熱潮又嚟啦！喺疫情期間，特別係東京都嘅中心區域，有多個新景點誕生，疫情前後嘅街道可謂變化驚人，令唔少人感到驚訝呢！
當中，於2020年喺澀谷開幕嘅「MIYASHITA PARK」，如今經已成為東京嘅地標之一。隨著旅遊業重獲活力，小編今次會為大家介紹一下呢個將美食、酒店、商店、公園，以及澀谷街道魅力集合於一身嘅複合商業設施嘅必睇精彩位。
「MIYASHITA PARK」於東京澀谷誕生！從原宿前往嘅交通亦超級方便
當被問到「你最想去東京嘅邊度？」時，相信唔少人都會毫不猶豫地回答「澀谷」吧！
為時尚潮流瞬息萬變嘅地方——澀谷，正進行大規模再開發。當中，「MIYASHITA PARK」係完全改變了澀谷風景嘅新景點之一。
「MIYASHITA PARK」全長約330米，位於JR澀谷站北側，係一個建設於沿著高架橋一側嘅複合商業設施，亦為經過此地嘅人們展示了極為顯著嘅存在感。
該設施係將原本於同一個位置上嘅澀谷區立宮下公園一帶，進行整修後所誕生嘅一個複合商業設施，並結合了公園、商業設施、酒店和停車場等設備，位於澀谷區域和原宿表參道區域嘅中間位置。
從「JR線」和「東京Metro」嘅澀谷站步行約3分鐘，從「東京Metro」明治神宮前〈原宿〉站步行約8分鐘即可抵達，交通非常方便。
呢個商業設施由「RAYARD MIYASHITA PARK」、屋頂公園「澀谷區立宮下公園」和酒店「sequence MIYASHITA PARK」組成，除咗可以喺開放嘅空間內盡情購物，仲可以一站式享受「享受購物、休憩、旅遊」嘅樂趣，亦為其魅力所在。去澀谷觀光時，唔少人會以此地作為據點，再去遊覽表參道、原宿和青山等地。
以下落嚟，小編會詳細介紹一下MIYASHITA PARK嘅精彩必睇位。
「RAYARD MIYASHITA PARK」：澀谷嘅大型購物&美食勝地！包括不可錯過的澀谷橫丁和美食廣場等必睇位！
「RAYARD MIYASHITA PARK」佔據1樓至3樓，係一個擁有約90間店鋪嘅商業設施。該設施分為面向澀谷站方向嘅「South」南街區，和面向明治神宮前〈原宿〉站方向嘅「North」北街區，除咗擁有豐富多樣化嘅零售店，仲有多間提供日本、多國料理嘅餐飲店，讓你可盡情享受購物和美食嘅樂趣。
位於「South」1F嘅「澀谷横丁」，係一個可以品嚐到日本全國47個都道府縣特色料理嘅美食景點。匯聚了從北海道到九州、沖繩等地嘅拉麵、壽司、餃子、燒鳥等各地嘅美食佳餚！即使身處於澀谷，都可以品嚐到各種地方特色美食，以及感受聚集多人嘅熱鬧氛圍。當中有部分店家更營業至清晨5點，讓食客喺深夜時段都可以享受得到美食和美酒，亦係其成為人氣景點嘅理由之一。
另一方面，「North」1F則排列著以國際知名品牌為主嘅路面店。
（左）HIGHTIDE STORE（South 2F）
（右）THE SHIBUYA SOUVENIR STORE（South 2F）
喺「South」2F、3F以及「North」3F，聚集了眾多主要銷售時尚和雜貨商品嘅店鋪。
陳列著種類繁多嘅商品，從糖果零食到黑膠唱片、文具、滑板等應有盡有，望住呢類型嘅商品仿佛就能提升個人品味層次呢！亦有販賣唔少旅行所需嘅商品、獨特嘅澀谷紀念品，小編建議可以喺度在這裡一次過買齊你嘅心水物品喔！
（左）THE MATCHA TOKYO（South 2F）
（右）MIYASHITA CAFE（South 2F）
必去吸睛時尚咖啡店！可以品嚐100%有機抹茶或口感極緻順滑嘅軟雪糕等打卡美食，吸睛又好味，建議大家要試多幾款喔。
如果想享用豐盛午餐或晚餐嘅話，可以前往「South」3F嘅美食廣場，或「North」3F嘅餐飲街覓食。
唔單止有日本料理，仲有中國、新加坡、美國、墨西哥等世界各國嘅美食聚集於此。你可以邊休息，邊品嚐各種美食，嘗試喺度用舌尖環遊世界，亦係一個非常有趣嘅體驗。
- 營業時間：
- 【商店】11：00～21：00
※根據不同店舖，營業時間亦會有所不同 - 【餐廳・美食廣場】11：00～23：00
※請參考各店家網頁以確認午餐和晚餐時間
※部分店家嘅營業時間或會有所不同 - 官方網站：https://mitsui-shopping-park.com/urban/miyashita/index.html
「澀谷區立宮下公園」：於屋頂綠洲中遇見「多啦A夢」和「忠犬八公」
當你從3F嘅樓梯上去時，氛圍完全唔同晒！眼前出現了一片約1,000平方米嘅草坪廣場，呢個就係位於澀谷區嘅宮下公園。呢片草坪空間與澀谷車站和繁華街嘅喧囂都市氛圍形成鮮明對比，絕對係都市中嘅綠洲！
可以喺草地上野餐，或者喺四周所設置嘅長椅上悠閒放鬆身心，隨心所欲地挑選適合自己嘅戶外空間享樂方式。小編推薦喺晴朗嘅日子中，於園內嘅「Starbucks Coffee MIYASHITA PARK 店」買杯咖啡拎走，悠閒享受呢一片被綠林環繞嘅美景。有機會到此一遊嘅話，不妨喺度自由自在地，度過屬於自己嘅好時光吧。
去到屋頂公園，就一定要影返張「多啦A夢」（香港又稱為「叮噹」）嘅打卡相喔。呢度設有一座「多啦A夢」誕生50週年時所建造嘅紀念雕像「多啦A夢 未來之門」。經典拍攝姿勢就係瞓低兼模仿大雄瞓晏覺嘅模樣，然後大影特影喔。
講到澀谷嘅象徵式景點，就不能不提到忠犬八公。位於澀谷中央位置嘅「澀谷方位磁針｜八公的宇宙」係一件公共藝術作品，唔單止可以坐喺上面當作長椅使用，當你仔細望真啲，會發現長椅嘅形狀係模仿澀谷區嘅輪廓所打造而成。
- 開園時間：8:00～23:00
- 休園日：12月29日～1月3日
- 官方網站：https://www.seibu-la.co.jp/park/miyashita-park/
「sequence MIYASHITA PARK」：地理位置優越！澀谷旅遊時最理想嘅酒店推薦
如果想充分享受澀谷旅遊嘅樂趣，「sequence MIYASHITA PARK」將會係你最佳嘅住宿選擇。
除咗擁有從澀谷站徒步只需徒步3分鐘嘅優越地理位置之外，其退房時間為下午2點，相較一般酒店遲，亦係其魅力所在。早餐供應時間亦相應延長至中午12點（最後入場時間為上午11點），所以就算係退房當日你都可以輕鬆度過上午好時光。另外，如果你事先登記好面部識別程序，並與預訂內容連結起來，便可以通過平板電腦進行面部識別，順暢完成入住手續，令住客可以更有效地利用觀光時間，深受好評。
（左）雙床房「TWIN」33,400日圓起
（右）雙人床房「DOUBLE」25,600日圓起
※價格可能會根據不同季節而有所變動。
除咗有可以飽覽澀谷街景嘅雙人房「TWIN」和雙人床房「DOUBLE」外，仲有位於頂層嘅套房「SUITE」，以及適合多人入住嘅雙層床（碌架床）「BUNK」等客房。喺欣賞澀谷夜景嘅同時，亦可盡情享受最佳嘅酒店住宿體驗。
如果你想品嚐美味輕食和咖啡，就直接前往與公園相連嘅「VALLEY PARK STAND」吧！呢度結合了咖啡店、酒吧和酒店大堂休息室，係一個可以享受從大窗戶灑進來嘅日光所營造出嘅舒適愜意空間。
- 入住時間：17:00～
- 退房時間：～14:00
- 官方網站：https://www.sequencehotels.com/miyashita-park/eng/
「MIYASHITA PARK」店舖推薦&必買手信全攻略！
唔知大家睇完今次嘅MIYASHITA PARK全體相關介紹之後，有咩感想呢？小編將會喺下篇文章進行更深入嘅報導，包括必食美食、必買商品等人氣資訊，記得唔好錯過下篇報導MIYASHITA PARK嘅文章啦！
MIYASHITA PARK
- 地址：東京都澀谷區神宮前6-20-10
- 交通：從JR山手線、埼京線、湘南新宿線、東京Metro銀座線、半藏門線、副都心線、東急東橫線、田園都市線，以及京王井之頭線「澀谷」站徒步約3分鐘即可抵達
- 官方網站：https://www.miyashita-park.tokyo/
Comments