澀谷地區正持續不斷進化！繼澀谷Scramble Square、澀谷PARCO等商業設施開幕風潮後，近日澀谷再添注目新設施—「澀谷橫丁」！其所在位置，就係活用澀谷‧宮下公園舊址新建嘅「MIYASHITA PARK」內，只要嚟到「澀谷橫丁」，您就可以品嘗到日本各地特色美食，一嚐瞬間遊覽全國各地滋味！至於新景點內有咩令人垂涎三尺嘅必食美食？馬上就由FUN! JAPAN編輯部為您導航！
澀谷「横丁」由來
喺進入正題之前，先同大家簡單介紹一下「橫丁」嘅意思。「橫丁」通常係指軌道旁或鐵橋下嘅空間，雖然橫丁內嘅店鋪面積狹小，但係每日夜晚都會有眾多本地人喺到聚腳，因此遊客可以體驗到有別於一般連鎖居酒屋嘅氣氛，難怪近年吸引越嚟越多外國遊客將「橫丁」列入行程！
「澀谷橫丁」全長100米，佔地約1100平方米，並共有19間店鋪進駐。室內共設1250個座位，而室外行人徒步區亦設有350個露天座位。只要嚟到橫丁，您就可以品嘗到上至北海道、下至沖繩嘅特色美食與鄉土料理，部分食材甚至係從產地直送呢！此外，各地知名平價B級美食、酒吧、力士餐(相撲餐)、喫茶卡拉OK等亦應有盡有，當然，各地日本酒與燒酒等酒精飲品種類都係相當豐富啦！
美食款式多達約2500種 人在澀谷就可以食勻日本全國！
「澀谷橫丁」內一共提供約2500款美食，每個主題區域都提供各自地區嘅美食，相當能突顯當地特色。由於款式眾多，所以本文只能割愛為大家介紹幾款每個地區內最具代表性嘅美食～
北海道食市
於厚切豬肉片淋上甜鹹醬汁嘅「十勝名物！豚丼」、海鮮多到滿瀉嘅「北海道海鮮4色丼」等，一眾代表北海道嘅料理集結「北海道食市」！
東北食市
「盛岡冷麺」、宮城仙台著名牛舌料理「燒牛舌」等，東北食市為您呈獻從青森到福島嘅東北六縣當地美食。
北陸食市
「北陸食市」以北陸地區獨有特色料理為主，當中包括使用有「富山灣寶石」之稱、透明鮮美嘅白海老(白蝦)製作而成嘅「炸白海老」，以及視覺與味覺都相當衝擊嘅「富山黑拉麵」等。
關東食市
「澀谷橫丁」所在嘅關東地區又點會缺席呢？相傳源自於江戶（即現時東京）嘅天丼以及栃木餃子等多年來一直深受日本人喜愛嘅國民美食，相信大家都一定相當熟悉！
東海食市
鰻魚飯三食，到炸雞翼等名古屋代表美食，「東海食市」都早已為您預備！除此之外，静岡縣濱松餃子、三重縣伊勢龍蝦魚生等東海地區其他美食都可以一一在此品嘗得到。
近畿食市①、②
「近畿食市」分成①跟②兩區，必食名單包括去到神戶一定要品嘗嘅神戶牛排與大阪炸串等，想要一口氣品嘗近畿(關西)地區王道美食的話，「近畿食市」絕對可以滿足您！
九州食市
福岡・鐵鍋煎餃、長崎・土耳其飯等平價美食等雲集「九州食市」，九州美食魅力料理不容錯過！
沖繩食市
「塔可飯」、「沖繩麵」等一般餐廳較少見嘅招牌沖繩家庭料理，各位又試過未呢？
除咗上述介紹過嘅區域之外，「澀谷橫丁」內另外仲有可以品嘗到餃子嘅「横濱中華食市」；主打河豚魚生等嘅「中國食市」；出售讚岐烏冬等嘅「四國食市」。再加上鄰近日本嘅「韓國食市」、力士飯、雞肉料理專賣店、海鮮料理專賣店、濃濃懷舊氛圍嘅喫茶酒吧，保證一站式就可以感受日本各種風情！
曾經有想過要制霸全日本，卻遲遲無法達成嘅讀者，FUN! JAPAN編輯部今次就推薦您用另一種制霸方式—就係嚟一趟「澀谷横丁」食勻各地料理，透過「美食」制霸日本地圖！
施設情報
- 施設名稱：澀谷横丁
- 地址：東京都澀谷區神宮前6-20 MIYASHITA PARK South 1F
- 營業時間：24小時（部分店家為0時關店）
- 公休日：以施設公布為準
- 交通方式：澀谷站步行約3分鐘
Comments