千葉縣銚子市除咗可以欣賞到海角和海岸線嘅靚景、享受多項海上活動，仲可以品嚐漁獲量為日本第一嘅銚子漁港，所直送嘅新鮮魚貝類、以及於擁有豐富自然資源嘅土地上，所孕育嘅農產物等美食喔。當中，乘搭銚子電鐵走訪沿線景點，可謂享受銚子之旅嘅最佳選擇之一。今次，小編除咗會為大家推薦有邊幾個車站係唔可以錯過，絕對要中途落車一探究竟，仲會介紹埋車站周邊嘅旅遊景點與美食喔。
銚子究竟喺邊度？
位於日本關東地區最東邊嘅銚子市，全域皆被指定為地質公園區域。除咗有可以觀察到約1.2億年前所形成嘅地層「犬吠埼」，亦有可以欣賞到被太平洋巨浪侵蝕、約300萬年前嘅地層「屏風浦」等多個精彩必睇位。另外，銚子電鐵沿線仲有多個可以品嚐到新鮮魚貝類等海鮮美食景點、以及旅遊景點，係一個可以體驗各種魅力嘅好地方。
銚子電鐵係？
2023年創業100週年嘅銚子電鐵，係一條全長約6.4 m，從參照荷蘭風車屋設計嘅銚子站至終點外川站，單程需時約20分鐘嘅地方鐵路。除咗朝早返工返學時段之外，班次為大約每小時一班，亦係使用全日任搭嘅優惠車票，喺中途上、落車，享受沿線旅遊景點與銚子美食嘅最佳間隔時間喔。
銚子電鐵所經歷過嘅歷史，並非一帆風順。當中，曾挽救過兩次破產危機嘅係，有大量人士購買銚子電鐵作為副業，於網上所販賣嘅「濕煎餅」，令銚子電鐵起死回生。其後，更有10萬位乘客為咗乘搭銚子電鐵而特地前往當地！現時，被眾人嘅愛所包圍嘅銚子電鐵，仍然繼續行駛。
【銚子站】體驗震撼人心嘅地層與大海！ 屏風浦、銚子海洋研究所
屏風浦懸崖長達10公里，高約40~50米。因為與英國多佛白色懸崖相似，所以亦被稱為「東方多佛懸崖」。隨著鄰接嘅「銚子MARINA海水浴場」步道前進，就可以近距離欣賞得到「屏風浦」嘅雄偉英姿，不妨趁機影返幾張魄力迫人嘅吸晴靚相！另外，亦推薦乘搭「銚子海洋研究所」嘅「WATCHING・CRUISING」遊覽船從「銚子MARINA」起航，話唔定可以見到海豚、鯨魚、海獅、甚至鳥類遷徙等小動物喔！
【仲之町站】豐富嘅參觀景點：妙福寺紫藤花、仲之町站車庫、YAMASA醬油工廠
喺充滿懷舊氣氛嘅仲之町站，只需支付150日圓嘅入場費就可以參觀車庫。參觀區域除咗有罕見嘅德國製電力機車之外，仲可以一睹「大正浪漫電車」嘅風采。
車站附近有間名為「YAMASA醬油」（ヤマサ醤油）嘅醬油工場，自1645年起就開始喺銚子釀造醬油，並因品質優良而獲得「最上醬油」嘅稱號。另外，可預約免費參觀醬油工場喔。而喺「醬油體驗館」（しょうゆ味わい体験館），除咗可以透過裡面所陳列著有關醬油製作嘅展示品，從而瞭解相關資訊之外，仲可以體驗親手燒煎餅，相當過癮！使用「YAMASA」嘅黑蜜風醬油，所製作嘅「醬油雪糕」亦相當受歡迎。
除此之外， 「妙福寺」內有4個紫藤花棚架，種植著約1.8米長嘅紫藤花，並於4月尾至5月初盛放，推薦大家有機會可以中途落一落車，去「妙福寺」朝聖一番。
【君之濱站】充分感受大自然嘅地方～犬吠埼君之濱海岸
從犬吠埼向北邊方位，會見到一個畫上美麗弧線嘅迷人海岸「犬吠埼君之濱海岸」，唔單止係日本嘅海岸百選之一，亦係人氣嘅打卡景點，皆因喺度可以一次過影晒銚子嘅吠埼燈塔、太平洋等極具代表性嘅靚景！另外，撇除富士山等山頂與離島，呢度亦係大家爭相到訪嘅元旦日出拍攝景點。
【犬吠站】旅遊景點滿載！必去犬吠埼燈塔、犬吠埼溫泉鄉等極具代表性嘅景點
「犬吠埼」三面環海，除咗擁有美麗景觀之外，亦有多個旅遊景點。當中包括，全日本只有16個可以攀登上去參觀嘅燈塔之一「犬吠埼燈塔」。企喺燈塔上，可以獨佔眼前無敵海景，燈塔腳下會見到一個白色郵筒，更被稱為「呼喚幸福嘅郵筒」。小編推薦以藍天為背景，企喺燈塔隔離影返張靚相喔。
踏入「地球圓觀丘展望館」（地球の丸く見える丘展望館），可以從更高嘅位置，欣賞眼前美景。喺標高為73.6米嘅山頂，高16米嘅展望臺上，俯瞰屏風浦與廣闊大海，呢度係一個可以切身感受得到地球係呈圓形嘅地方。
「滿願寺」嘅本尊為十一面觀世音菩薩，更作為「實現願望的觀音菩薩」而廣受日本國民愛戴，吸引唔少國民特地前往參拜，亦推薦大家可以去睇睇喔。寬敞嘅寺院內，排列著正殿、金光閃閃嘅開山大塔、滿願堂、鐘樓等。滿願堂供奉著西國、阪東、秩父、四國188處嘅本尊，有人話參拜完滿願寺，就好似等同於參拜完189處神明保佑。另外，每年8月寺廟前都會出現向日葵花海，由於種植期短暫，可以一賭其花海美景可謂相當幸運喔。
另外，面向大海嘅「犬吠埼溫泉鄉」，有唔少溫泉旅館與酒店。難得嚟住一晚，不妨好好享受溫泉與海鮮美食啦！
【外川站】漫步於懷舊嘅漁夫町：外川街頭漫步、犬岩
從江戶時代開始作為漁夫町嘅外川，其街上特徵就係猶如棋盤一樣、延伸至漁港嘅斜坡道路。除咗有新鮮海鮮美食，仲可以品嚐得到老字號嘅豆腐店名物、豆漿布甸等，可以邊行邊食嘅當地美食。
「犬岩」顧名思義，係形狀與豎起耳仔嘅狗狗相似嘅岩石，亦係外川嘅人氣景點之一。傳說中，被敵人逼到絕境嘅平安時代武士「源義經」遺棄嘅愛犬連續喊咗七日七夜，到第八日愛犬就變成岩石——「犬岩」。夕陽搭配著「犬岩」嘅景致相當夢幻，難怪呢度會成為人氣嘅打卡景點喔。
從東京到銚子嘅交通方式
從東京站乘搭JR總武本線特急「潮騷號」列車到銚子站，車程約1小時50分鐘。
Comments