相信唔少人講起東京人氣旅遊景點之一嘅銀座，腦海中都會浮現多間高級品牌店交錯林立嘅印象。不過，銀座喺呢1、2年裡面，變化其實係非常之大。
最近嘅銀座變成點？一句講晒，就係變成「爆買聖地」。
FUN! JAPAN編輯部會分開一連2篇文章為大家介紹，可以喺銀座盡情爆買嘅最新購物景點。繼上次第1彈文章 海外未有分店嘅品牌「WORKMAN」，今日第2彈文章將會介紹日本人氣100yen店一「DAISO」於2022年4月銀座隆重開幕嘅全球旗艦店。品牌位於銀座嘅全球旗艦店，除咗有大家都相當熟悉嘅「DAISO」，仲有「Standard Products」、「THREEPPY」以上2個「DAISO」嘅姊妹品牌商品出現，等您可以一次過行勻3個品牌！
商品種類從日用品到時尚生活雜貨、首飾等範圍相當廣泛，喺度絕對可以搵到您嘅心水好物！
【DAISO】喺面積廣闊嘅店舖內盡情「尋寶」吧！
第一站，先從DAISO開始介紹！
DAISO店舖雖然遍佈於日本國內外，但其實創業50年以嚟係首次登陸於銀座地區！呢間店舖位於從東京Metro銀座站徒步約3分鐘嘅「MARRONNIER GATE銀座2」6樓，面積有成1,044平方米，相當寬敞！店舖內有成約2萬3,000件商品，當您行入去想要開始尋寶嘅瞬間，會感受到眼前彷似一望無際嘅廣闊空間，以及數之不盡嘅商品數量所散發嘅雄偉氣勢，名副其實「未出發先興奮」。
令人買到唔捨得走嘅零食賣場！
講到呢間店鋪邊個區域最令人感到興奮？應該係呢個零食賣場吧！皆因行到去呢邊，就好似瞬間去咗充滿古早味嘅「駄菓子屋」咁吖！裝修沿用日本駄菓子屋（*）嘅店舖風格，有多款又平又細細份，賣緊4件100yen又或3件100yen嘅零食，就算係大人見到都即刻童心再現，忍唔住揀返幾款喔。
*駄菓子屋：指為小朋友所製作嘅平價零食與玩具嘅店舖
從小食、煎餅、到甜食，所販賣嘅零食種類相當豐富，多到會令人選擇困難症發作唔知點揀至好…不妨喺度揀返幾款做手信啦。
注意！鍾意化妝嘅話可能會興奮到瘋狂搶購？
化妝用品嘅商品亦相當豐富，您會見到一排又一排，於2019年所誕生嘅DAISO化妝品品牌一「UR GLAM」嘅商品。
嚟到色彩繽紛嘅指甲油商品陳列區，小編發現橙色指甲油，係最適合夏天嘅顏色！
附有LED燈嘅迷你鏡，等您無論係出街，定係喺燈光昏暗嘅地方都可以輕鬆補妝。
※電池需另行購買
Headphones與電風扇都只係500yen！
FUN! JAPAN小編仲發現一款只需500日圓就可以入手嘅耳機！真係平到令人難以置信！
座檯式迷你風扇外型設計係以日本昭和時代（1926年～1989年）期間，大部分家庭都會用嘅電風扇外型為設計理念所誕生嘅懷舊款式，夠晒經典。附有USB線，連接電腦即可使用。
日本手信都可以喺度搵得到！
想搵返幾款充滿日本特色嘅手信？嚟DAISO就啱啦！
無論係日式摺扇、定係木芥子（日本圓頭圓身小木偶人）等等，DAISO店內到處都擺放著可以感受得到日本風情嘅商品，所以有機會嘅話，記得要去尋寶，搵一搵心水好物喔。
唔知香港嘅DAISO，有無賣以上提及到嘅商品呢？歡迎留言話畀小編知！
【Standard Products】360岋都係充滿質感嘅生活雜貨商品！
DAISO旁邊有一間名為「Standard Products」嘅店舖。Standard Products以「稍為不錯，就是非常好」為理念，販賣著基本簡約且具質感設計嘅生活雜貨。
店內有成約2,000件商品，包括客廳用品、餐具等餐桌用品及擺設等等，幾乎都係品牌嘅原創商品，亦致力於環保產品嘅開發。
陳列櫃架上擺放著一盒盒五顏六色嘅商品，其實係擁有動人香氣嘅Aroma Diffuser。Diffuser種類有成12種咁多，可以喺店舖裡面一邊試聞，一邊揀心儀嘅香味喔。
使用有機棉製造嘅毛巾，觸感非常柔軟。
望落設計相當時尚嘅盒裡面，裝嘅竟然係密實袋！裡面有36個22cm × 21cm嘅密實袋，除咗可以放食品，仲可以放化妝工具與貴重物品。
【THREEPPY】推薦畀鍾意可愛設計嘅人！
DAISO姊妹品牌「THREEPPY」誕生於2018年，以「成熟風可愛」為理念。當中約9成商品都係品牌嘅原創商品，價格為165日圓～1650日圓。佔最多嘅係定價為300日圓嘅商品。
店內與Standard Products有著不一樣嘅氛圍，擺滿著多款可愛花紋嘅餐具，與色彩繽紛嘅雜貨。
THREEPPY嘅店舖陳列著多款耳環、夾式耳環等飾品，亦係最大特徴！從基本款設計到特色設計應有盡有，種類豐富，一定可以喺度搵到您想要嘅飾品喔。
嚟到DAISO全球旗艦店，可以一次過行勻晒DAISO、Standard Products、THREEPPY 呢3間各具特色嘅品牌店舖。下次去到銀座，唔止買高級品牌商品，仲可以去爆買平價雜貨好物喔！
景點資訊
- 名稱：
DAISO全球旗艦店
Standard Products全球旗艦店
THREEPPY全球旗艦店
- 地址：東京都中央區銀座3-2-1MARRONNIER GATE2 6樓
- 交通方式：
從東京Metro丸之內線・銀座線・日比谷線嘅銀座站徒步3分鐘
從東京Metro有樂町線嘅銀座一丁目站徒步2分鐘
從JR山手線・京濱東北線嘅有樂町站徒步4分鐘 - 營業時間：11：00～21：00
Comments