相信唔少人講起東京人氣旅遊景點之一嘅銀座，腦海中都會浮現多間高級品牌店交錯林立嘅印象。不過，銀座喺呢1、2年裡面，變化其實係非常之大。
最近嘅銀座變成點？一句講晒，就係變成「爆買聖地」。
今次，FUN! JAPAN編輯部會分開一連2篇文章為大家介紹，可以喺銀座盡情爆買嘅最新購物景點。
今日登場嘅「變得不一樣嘅銀座」第1彈文章，要介紹嘅就係並未進軍海外、唯獨日本先有分店嘅「WORKMAN」。如果您咁啱係戶外活動或運動愛好者嘅話，「WORKMAN」就係您嘅爆買聖地！
唔飛去日本就買唔到嘅品牌「WORKMAN」？
講到高性能、價格實惠嘅日本品牌，相信唔少人都會諗起UNIQLO或無印良品吧。除咗以上品牌之外，小編要同咁多位鍾意日本嘅讀者朋友再介紹多一個高性能、價格實惠嘅日本品牌一「WORKMAN」。
WORKMAN誕生於1980年，本身係專門銷售予建築工程施工現場，與工廠工人專用鞋履以及制服等等商品嘅店舖。由於品牌商品使用對象非一般普羅大眾，而係以上提到嘅建築工程施工現場或工廠工作人員，所以尤其重現容易郁動、輕身、吸水性等功能性，亦係WORKMAN商品嘅一大優勢。
其後，品牌逐步使用商品開發時所培養嘅技術，開始製作銷售予普羅大眾嘅商品，更於2018年開設店舖「Workman Plus」。由於喺「Workman Plus」可以搜羅到各種高性能、低價格，設計亦相當講究嘅商品，所以瞬間成為日本熱話，掀起一股風潮，甚至更出現「WORKMAN女子」新詞彙（指鍾意WORKMAN嘅商品而著上身嘅女性）。現時，日本國內嘅店鋪數量已達952間。（截於2022年6月為止）。
銀座「WORKMAN女子」推薦商品
WORKMAN於2022年4月，喺銀座地區首次開店。店名為「＃WORKMAN女子 イグジットメルサ銀座店」（#WORKMAN GIRL EXITMELSA）。
雖然店名中寫有「女子」，但其實店舖裡面嘅商品係女裝及男裝各佔3成，其餘4成則係男女通用。
今次，WORKMAN嘅PR負責人鈴木先生就向尚未接觸過WORKMAN嘅FUN! JAPAN讀者們推薦咗好幾款心水商品，歡迎大家可以參考一下喔！
首先，鈴木先生推薦嘅係上圖呢款紅、藍色嘅防雨外套。就咁睇可能您會以為只係一件普通嘅防雨外套…
再望真啲，原來呢件防雨外套，喺揹住背囊嘅時候都著得落喔！咁就算係落雨天，都可以揹住背囊周圍走，唔怕整濕啦～有佢陪住您，真係可以講返句「其實落雨又有乜好怕喎」。呢件防雨外套男女兼用，除咗成人尺寸，仲有小童尺寸任君選擇。成人尺寸價格係3900日圓（*），小童尺寸價格係2900日圓。
*價格均為含消費稅價格
跟住要向各位女性讀者推薦嘅係，圖上呢款100%全棉嘅T-Shirt。領口上並無任何標籤，所以可以前後兩邊著都OK喔。唔知您鍾意圓領多啲定係V領多啲呢？售價係980日圓（！）。T-Shirt一共有5隻色，如果賣呢個價錢嘅話，真係入手多2、3隻色都完全唔覺肉赤。
令人興奮嘅鞋裝部
去到店舖裡面賣鞋嘅陳列區，會見到一排排嘅凉鞋、運動鞋、雨鞋等等，可以搵到唔少好著、易襯、防水，設計感與功能性兼備嘅心水靚鞋。
涼鞋絕對係夏日必備嘅鞋款！呢款凉鞋（1900日圓）唔單止係用咗透氣性極佳嘅素材所製作，著落既舒適又透氣，而且鞋底仲係使用3層構造，擁有卓越緩衝性，絕對可以喺炎炎夏日裡大派用場。因為鞋款係包腳設計，所以就算係凉鞋，著住佢都可以盡全力奔跑…。
- 左圖：重量竟然只有160克，超級輕型兼防水性極佳嘅SLIP-ON鞋款，亦可以用作為室內專用鞋喔。
- 右圖：就算唔係落雨天，都一樣適合著出街嘅時尚防水雨鞋。
兩者價格都只係1,500日圓！咁高質嘅鞋款竟然定價為1,500日圓，喺日本可謂非常少有喔！
仲有更多充滿令人意想不到嘅創意商品♪
跟住落嚟，WORKMAN嘅PR負責人鈴木先生介紹嘅係，模特兒公仔身上嘅背心外套。
大家請將注意力集中喺背心外套嘅腰間部分，有無見到有兩個又黑又圓嘅物體…原來係風扇嚟㗎！通過風扇嘅轉動，所產生嘅風於背心外套裡面循環流動，讓大家即使喺炎熱嘅日子裡面都可以爽快舒適地度過。
據聞呢款商品，原本係為咗經常喺烈日當空下工作，建築工程施工現場嘅工作人員所開發。正正係運用WORKMAN所擁有嘅技術與知識所誕生嘅單品！
*需要另外購買風扇（3,900日圓）和電池（7,980日圓）。
運動・戶外活動愛好者必買單品
以下要推薦畀鍾意跑步以及做運動嘅人，一定要買嘅就係呢款具備防UV功能嘅T-Shirt。
除咗吸汗性同速乾性夠出色之外，因為係使用冷感性布料製作，所以著上身感覺特別凉快。喺T-Shirt嘅前方、背後位置，都設有於黑暗地方會發光嘅特殊膠帶設計，所以就算去夜跑，都可以跑得安全又放心。擁有以上咁多樣高功能，竟然只售580日圓…真係令人難以置信！
店鋪除咗服飾，連帳篷等等嘅戶外用品都一應俱全，好似呢款「真空保冷PET Bottle Holder」（980日圓）亦非常值得同準備去日本旅遊嘅讀者們分享，。
只要放入500毫升嘅水樽，就可以長時間Keep住凍嘅狀態。
日本嘅夏天，曾出現過最高氣溫有成約40度嘅日子。只要有呢款商品陪您過夏天，咁就可以隨時隨地飲到凍飲啦。
今次FUN! JAPAN採訪嘅「# WORKMAN女子 イグジットメルサ銀座店」連平日日頭時段都人來客往，可想而知WORKMAN嘅商品係幾咁受歡迎。從日常便服到戶外用品，以低價格就可以入手得到高性能嘅WORKMAN，下次去日本旅行嘅話，一定要去行個圈啦！
另外，銀座最新爆買購物景點企劃「不一樣的銀座」第2彈文章將會介紹，日本人氣100yen店一DAISO嘅全球旗艦店喔。預定會於8月31日公開，敬請期待！
＃ワークマン女子 イグジットメルサ銀座店（#WORKMAN GIRL EXITMELSA）
- 地址：東京都中央區銀座5-7-10 EXITMELSA 5樓
- 交通方式：從東京Metro銀座站A2出口徒步約2分鐘
- 營業時間：11：00～20：00
Comments