書之旅@東京上回概要ー
上回提到「對於書蟲嚟講，喺茫茫書海中遇見情有獨鍾嘅書本時，就彷彿搵到潛伏於麥當勞紙袋底部嘅最後一條薯條咁，令人感到相當興奮！」嘅尋找舊書之旅，由於個人實在太愛太愛神保町，因此今次實際出發去「書之海」，展開一躺「航海」旅程！
不過，今次嘅「航海」主題係置身於「豪華客船」中體驗嘅非凡「航海」旅程。究竟有幾豪華過癮？即刻跟著小編，揭開「豪華客船」嘅神秘面紗！
深入發掘神保町，再次踏足「舊書街」。
鏡頭一轉，我哋就嚟到呢個乍看之下同一間普通書店無咩分別嘅地方。但再睇真啲，左上角竟然有類似枕頭、床單被鋪嘅出現…？
再畀多個貼士過您知—有無見到床咁款嘅LOGO，下面寫住「MANGA ROOM」？講到呢度，相信大家都估到神秘面紗下嘅真面目。
無錯！「豪華客船」嘅真身，其實係以漫畫為主題嘅膠囊酒店ー「MANGA ART HOTEL」。
室內設計以純白為主色調，分成2個樓層（4樓係女性專用樓層，5樓係男性專用樓層）。由店主親自搜羅得來嘅約5,000本漫畫書排山倒海堆滿每個角落，邀請住客進入漫畫世界。由於男性樓層與女性樓層嘅漫畫書種類配置會有所不同，所以當日究竟會遇上咩作品完全係未知之數，增添唔少住宿當日嘅樂趣。
*1：住宿僅限中午12點~晚上7點期間到訪異性樓層拎漫畫書。
全情投入漫畫之海！
數之不清嘅漫畫堆到天花板咁高，而且重點係住客可以全部任睇！！！ （小編興奮到瘋狂於內心吶喊）
《3月的獅子》、《四月是你的謊言》、《東京白日夢女》、《總有一天要在蒂芙尼吃早餐》、《只想住在吉祥寺嗎？》… 以上全部都係被拍成電視劇或電影嘅人氣漫畫。（上圖係只有睇過電視劇、想借此大好機會去睇埋相關漫畫嘅小編搵緊心水作品時被偷拍嘅。想要從頭到尾，一口氣睇到完結篇，但又心思思唔知揀邊款作品好…。
作品旁邊通通都會放有工作人員嘅推薦評語（而且附有英文翻譯！）。由不折不扣嘅漫畫愛好者所揀嘅心水作品，安心感&信賴感度瞬間提升。
相信大家都曾經試過沉迷於漫畫時光中，抬頭驚覺原來已經天黑嘅經歷吧。
上下2層夾埋有一共35間房（*2），正好實現「邊睇漫畫邊住宿然後一覺瞓天光」嘅奢侈夢想。挑選心儀嘅作品帶入床舖，於腦內將連圖帶字嘅漫畫世界擴展到如太陽系般無邊無際吧。
（小編實際體驗過後，只可以話每揭開每一頁都會洋溢興奮感，記得要注意腎上腺素分泌過多而瞓唔著喔。）
*2：女性專用樓層有16間房，男性專用樓層有19間房。
以白色為基礎色調嘅浴室與洗手間。好！小編決定今晚一於捱夜。
體驗完「漫泊（まんぱく）（*3）」嘅第二日，深深明白到一樣道理ー
可以完全放hea同漫畫共度一宵，呢到簡直係天堂呀！
*3：將「漫畫」與「宿泊」結合嘅日本新詞彙，意思係「漫畫住宿體驗」。
MANGA ART HOTEL, TOKYO
- 地址：東京都千代田區神田錦町1-14-13 LANDPOOL KANDA TERRACE 4F/5F
- 交通方式：從東京METRO神保町站A9出口徒步7分鐘
- 費用：請於預約網站確認詳情
- 官網：https://mangaarthotel.com/index-en.html
去BOOK HOTEL更新個人最高讀書時間記錄吧！
不愧係神保町，原來仲有更多被書本包圍嘅住宿設施！
下一站嚟到從漫畫天國徒步約10分鐘即可抵達，預定於2022年夏天盛大開幕嘅「BOOK HOTEL 神保町」。
見到接待處後面與入口附近放著大量書本，多到令人內心忍唔住懷疑「乜呢度係圖書館嚟嘅咩！？」。預感話畀小編知—呢個「書海」一定係寶藏多到搵唔晒。
入住嘅時候，工作人員會推薦與住客生日有關嘅書本。
您有無聽過「綠茶之日（5月5日）」、「國際减肥日（5月6日）」、「電視放送記念日（2月1日）」呢？（小編通通都係第一次聽……）
館內擺放超過1,000本書，當中包括健康、旅行、小說等多種主題類別，最多一次過可以帶3本書上房。另外，因為部分房間有提供按摩椅（！），所以可以喺床上或按摩椅上一邊睇書，一邊度過悠閒放鬆好時光。
有書（同按摩椅）作伴，今晚仲唔瞓返個好覺？
經歷完以上足不出戶「書海」嘅生活後，感覺到自己嘅讀書時間又再創新高。好！決定返歸途中再去神保町附近嘅書店揮霍一下！
BOOK HOTEL 神保町
- 地址：東京都千代田區神田神保町2-5-13
- 交通方式：從東京METRO神保町站A1出口徒步1分鐘
- 費用：請於預約網站確認詳情
- 官網：https://bookhoteljimbocho.com/
Comments