日本二手市場興盛，到處都可以見到中古商店。所謂「中古品」，即係指二手商品—二手服裝（古著） 、二手書（古本）或黑膠唱片等等都可以喺中古商店搵得到。對於「中古迷」嚟講，喺茫茫「中古海」中遇見情有獨鍾嘅二手商品時，就彷彿搵到潛伏於麥當勞紙袋底部嘅最後一條薯條咁，令人感到相當興奮！
東京以作為流行發源地而聞名，但至今仍然留有多間歷史悠久嘅舊書店。 從漫畫、文學作品到娛樂雜誌、黑膠唱片等等，舊書店簡直就好似一個個藏寶基地！今次就等編輯部裡面最熱愛中古物品嘅小編，帶大家一邊網上遊走、一邊講解東京3大舊書街旅遊指南入門篇。由於東京3大舊書街嘅所在地都可以乘搭東京Metro地鐵周遊，交通非常方便，因此下次東京之旅不妨可以訂立一個屬於自己嘅「書之日」，跟住小編潜入書海中喔！
出發旅行之前您要知道…「古本」同「古書」意思竟然唔一樣！？
喺帶大家潜入舊書海之前，首先想講解一下日文中「古本（舊書）」嘅定義。成日都會見到店舖招牌上出現「古本（ふるほん / ふるぼん / こほん）」與「古書（こしょ）呢兩個漢字詞彙，兩者雖然望落相似，但意思卻不大相同！
「古本」係指過去被某人購買過嘅書藉。 另一方面，「古書」係指距離絕版經已過咗一段長時間，無機會再入手得到新品嘅書藉。再更簡單明瞭嘅說明如下：
- 「古本」＝曾經落入過他人手中嘅書藉（例如喺書店買咗最新一期《少年JUMP》，嗰本《少年JUMP》就可以定義為「古本」）
- 「古書」＝「古本」中具有歷史價值嘅書藉。
無論係古「本」定係古「書」，以下介紹嘅三個地方，都一定可以滿足您對書嘅欲望。
舊書店之旅必去朝聖地！ 全世界最大規模「書街」—神保町（千代田區）
神保町與舊書嘅關係就如人體與水分般淵源甚深、密不可分。
東京都千代田區・神保町舊書店街唔單止係日本最大規模嘅書店街，亦係全世界最大規模嘅書店街。神保町舊書店街內林立多間各有特色、散發著獨特個性及風格嘅書店，當中更聚集咗上百萬件書籍與藝術作品。
三省堂書店 神保町總店、東京堂書店 神田神保町店、書泉Grande……以銷售新書為主地標性嘅書店，加上規模較細並以經營舊書為主嘅書店・舊書店，神保町內加加埋埋據聞有成約200間店舖。 當中玉英堂書店（1902年創業）、悠久堂書店（1915年創業）等更加係創業100年以上嘅老店！與此同時，亦有多間以小學館、集英社為首嘅大型出版社都集中喺神保町，名副其實可以話係愛書又被書所愛嘅「書街」。
「書街」最獨特嘅魅力，係每間店舖所陳列嘅商品及種類都唔一樣。書籍類別橫跨多項領域，除咗有以學生為對象嘅專門書，亦有文學、歷史、藝術、漫畫、宗教等等各個範疇極具個性嘅舊書。當地每年仲會舉辦「東京名物 神田古書祭」（東京名物 神田古本まつり），屆時將有幾十萬本舊書出現喺「東京名物 神田古書祭」當中，吸引全國書迷蜂擁而至，為求於幾十萬本書海中挖掘出至寶。
如果係第一次去神保町嘅話，推薦喺「神田神保町」官網上使用「神保町舊書店地圖」，依主題去尋找相關書籍。親身出發前，先喺網上「虛擬神保町散步」一番，體驗彷如店內尋寶嘅感覺，遇到心儀書店嘅話，不妨先網上旅遊行個圈吧！
景點資訊：
- 景點名稱：神保町舊書店街
- 交通方式：都營三田線・都營新宿線・東京Metro半藏門線神保町站附近
：：
與日本首間大學·東京大學淵源甚深—「本鄉古書店街」（文京區）
日本嘅大學旁邊匯集舊書店並不稀奇。例如上文提到嘅神保町附近就明治大學、日本大學、專修大學等校園，接下來介紹嘅日本數一數二名門・東京大學附近亦有本鄉古書店街。
正如字面「文京（ふみのみやこ）」一樣，以前文京區一帶有唔少文人居住，例如夏目漱石、樋口一葉等等。拜學術歷史悠久嘅地區背景所賜，本鄉三丁目車站附近現時有大約22間舊書店，以古典書籍及學術書藉為主，出售美術、建築、近現代史、烹飪、兒童書藉、學術書藉等等多個不同類型嘅舊書。
用多些少腳骨力行遠少少嘅話，根津・本駒込附近（東大前站・本駒込站）、音羽・茗荷谷附近（護國寺站・茗荷谷站）亦有唔少舊書店。不妨喺散步嘅同時，順便去舊書店行個圈吧。當您漫步喺集學問與舊書一身嘅文人街道上，可能會有一剎那化身成東大生嘅感覺？（100%係心理作用）
景點資訊：
- 景點名稱：本鄉古書店街
- 交通方式：東京Metro丸之內線本鄉三丁目站、或都營三田線春日站附近
文化與教育匯聚×學生聚腳點—早稻田古書店街（新宿區）
踏入尋找舊書之旅@東京嘅尾聲，最後出場嘅佳麗係早稻田大學嘅所在地早稻田。
從JR高田馬場站朝著東京Metro早稻田站方向行，就可以望見沿著早稻田通為中心嘅古書店街。因為距離早稻田大學非常近，所以客層方面聚集唔少學生、大學老師及其相關人士。早稻田古書店裡面擺放著嘅書藉類型，以教科書、考試參考書、英語教材等實用書藉為主，亦係早稻田古書店街嘅一大特徵。
包括昭和4年創業嘅稻光堂書店在內，早稻田古書店街有成30幾間店鋪林立。順帶一提，早稻田大學早稻田校園內亦會每年舉辦兩次早稻田青空古本祭。
景點資訊：
- 景點名稱：早稻田古書店街
- 交通方式： JR山手線・西武新宿線・東京Metro東西線高田馬場站附近，或東京Metro東西線早稻田站附近
Comments