京都人氣熱話新酒店「NOHGA HOTEL KIYOMIZU KYOTO」正式開幕！酒店客房雅致又寧靜，配上高雅室內裝飾，連早餐同晚餐都非常講究，而且必去清水寺就位於徒步範圍內、地理位置極佳，可以話係內外兼備嘅優質住宿。今次，FUN! JAPAN編輯部決定帶大家親身去體驗住宿，為大家詳盡報導酒店箇中特色！
清水寺&祇園就在徒步範圍內！京都旅行全新據點
「NOHGA HOTEL KIYOMIZU KYOTO」位於清水五條，世界遺產清水寺、祇園以及八阪神社等著名旅遊景點亦係徒步範圍內即可抵達。由於位置遠離商業區域，所以酒店附近一帶洋溢著一股寧靜舒適嘅氣息。
酒店大堂採用充滿溫暖氣息嘅木質材料打造，擁有廣闊又療癒嘅開放空間、相當舒適。置身於此唔單止瞬間忘卻都市煩囂，日系簡約環境相伴下更係會令您喺大堂嘅等待時間更加充實！
治癒旅行疲勞！於客房內盡情享受雅致設計與室內裝飾療癒氣氛
房型方面，酒店提供4種雙人房、3種雙床房、以及2種豪華套房。即使係最經濟實惠嘅雙人房，所選用嘅床亦屬Queen Size尺碼，夠晒好瞓。等您可以叉足電，舒緩旅途中嘅疲憊！
另外，所有客房均配備高質喇叭，可以將自己鍾意嘅音樂或NOHGA HOTEL原創樂曲作為背景音樂於房內播放。客房亦可以收睇Netflix，令您嘅房間時光更加充實（需註冊帳號）。
浴室使用「三分離」式設計，加上寬闊洗面台與大鏡組合，令您打扮過程更加順心滿意。
講求食材細節！於餐廳盡情品嚐當地新鮮日本食材與炭火烹調美食
位於1樓嘅餐廳「CICON by NOHGA HOTEL」設有一般餐檯位與Bar檯位，如果想以酒吧嘅角度去感受現場氣氛嘅話可以選擇Bar檯位，如果想以飲食為主，悠悠閒閒嘆美食嘅話可以選擇一般餐檯位，一於根據「您想」去選擇理想位置吧～
除咗有調酒師從世界各地嚴選嘅自然葡萄酒，仲有南美洲秘魯名菜醃漬生魚「Ceviche（セビチ）」3種拼盤（1,848日圓～），生火腿拼盤（1,452日圓～）等等嘅下酒菜式亦相當豐富。
餐廳仲有一個驚喜賣點，就係可以品嚐得到使用著名炭爐「JOSPER OVEN」去燒烤烹煮出嘅炭火美食，唔單止可以令蔬菜美味更昇華，烹煮出嘅肉仲相當Juicy，加上陣陣獨特炭火香為美食錦上添花，食完真係好滿足！
無論係炭火美食之一嘅「Mochi pork (Kyoto) - loin（京都産 もち豚 ロース）」（3,278日圓），抑或係「Whitebait (Shinojima) & dried mullet roe peperoncino :Spaghettini（篠島産 釜揚げシラスとカラスミのペペロンチーノ：スパゲッティーニ）」（1,452日圓）等主菜，都係使用日本產食材所烹製而成，等您可以盡享新鮮美食。
早餐時段所提供嘅「MORNING PLATE（モーニングプレート）」套餐（2,200日圓）主菜提供肉類或魚類自由選擇，同場仲有「CHOPPED SALAD PLATE（チョップドサラダプレート）」套餐（1,800日圓），以及「CROQUE MONSIEUR PLATE（クロックムッシュプレート）」套餐（1,500日圓）亦非常推薦。無論揀以上邊一款，都可以品嚐到來自酒店附設麵包店嘅新鮮出爐香噴噴麵包喔。
酒店服務相當充實！感受天台酒吧與出租單車嘅旅遊嶄新組合~
去到「NOHGA HOTEL KIYOMIZU KYOTO」住宿嘅話，就一定唔可以錯過酒店裡面嘅天台酒吧。除咗可以將京都市區與山景一覽無遺，仲可以嘆到多種唔同國度嘅美食，例如西班牙經典美食「PINCHOS」、墨西哥TACOS餅、手工啤酒等等，享受一個午後悠閒忘憂好時光（營業時間1:00PM-9:00 PM）。
想以不一樣角度遊覽京都，推薦租借無鏈電動單車「HONBIKE」（3小時1,200日圓～）遊走京都。雖然喺京都漫步別有風味，但係當地斜坡路非常多，長時間行走會相當消耗體力，選乘電動單車嘅話絕對可以令您旅程可以走得更遠，行得更輕鬆！
酒店大廳內所附設嘅麵包店，裡面提供大約50種麵包種類，喺香噴噴嘅麵包香包圍下，不禁令人選擇困難症發作，樣樣都想食但又唔知揀邊款好！買嚟當宵夜或者旅途移動過程中享用就最合適不過。
「NOHGA HOTEL KIYOMIZU KYOTO」距離人氣景點清水寺與祇園僅屬徒步範圍內，地理位置極佳之餘，仲擁有高品味客房與餐廳，可謂內外兼備，必定可以成為下一個京都之旅新據點！
酒店資訊
- 名稱：NOHGA HOTEL KIYOMIZU KYOTO
- 地址：京都府京都市東山區五條橋東4丁目450番1號
- 交通：從京阪本線清水五條站徒步7分鐘
- 入住/退房：3:00PM～/11:00AM
Comments