提起東京・秋葉原，大家首先會諗起乜嘢呢？係電器街、動漫，定女僕café呢？唔少人都會將秋葉原同動漫、遊戲、地下偶像等源自日本嘅次文化劃上等號，不過就喺最近，「次文化聖地」秋葉原內就出現咗一間以「音樂、藝術、飲食」為概念嘅酒店！FUN! JAPAN編輯部聽到呢個消息，當然唔會放過為大家介紹嘅機會啦！「NOHGA HOTEL 秋葉原 東京」裝潢走時髦路線，傢俬擺設都極具設計質感，睇完呢篇介紹後，話唔定從此就會改變您對秋葉原嘅印象！
有關NOHGA HOTEL 秋葉原 東京
「NOHGA HOTEL 秋葉原 東京」隸屬於NOHGA HOTEL旗下，以「透過與地區深入交流，衍生卓越住宿體驗」為理念，將秋葉原獨特次文代融入於酒店設計當中。酒店距離JR秋葉原站電器街口僅6分鐘步程、佔盡地利，而且周邊林立多間家庭電器量販店，外國遊客最鍾意朝聖爆買嘅「Donki Quijote 唐吉訶德」（香港分店稱為「DON DON DONKI」）亦位於徒步圈內！建築物外觀採用黑白簡約設計，館內亦佈滿嶄新空間設計等多款時尚元素。
步入酒店，第一眼出現嘅竟然唔係接待處，而係瀰漫高貴格調嘅酒吧！夜晚時分一邊喺到過著慢活，一邊飲返杯心水美酒，爽呀！
全情投入藝術音樂世界
位處2樓嘅接待處附近以霓虹燈裝飾，中庭放有足球機，而露天雅座則被盎然綠意包圍，可謂內內外外都流露著時尚氣息。官方除咗會於館內展出美術作品，今後預計仲會邀請音樂分享家舉辦音樂活動𠻹！
客房滿佈精心講究之處
客房以「放鬆身心嘅鑑賞音樂下榻空間」為主題，全部客房內皆設有相當講究音質嘅喇叭，保證您無論身處房間邊個角落，都可以聆聽到優質音樂！
房型方面，酒店提供單床雙人房及雙床雙人房等多種選擇以迎合唔同遊客嘅需要。床褥選用蓆夢思出品助您消除旅途疲勞，仲唔一覺瞓到天光？
房間內亦備有日本製造梳洗用品，例如沐浴用品使用天然有機品牌，更令人驚喜嘅係， 酒店已為您準備超人氣「BALMUDA」電熱水煲！驟眼望上去簡約設計嘅房間，原來隱藏著唔少貼心細微之處呢！
租借單車探索秋葉原周邊地區
酒店亦有提供租借單車服務，非常適合想要踩著單車探索秋葉原周邊地區嘅朋友。您都不妨就趁呢個機會到曾經被多套動漫及電視劇取景嘅神田明神、谷中、墨田川河畔等景點朝聖啦！
到PIZZERIA & BAR NOHGA享用新鮮出燼爐佛卡夏麵包早餐
正所謂「早餐係旅途美好一天嘅正確打開方式」，所以出發行程前好應該先食餐豐富早餐、為自己注入能量！NOHGA HOTEL 秋葉原 東京嘅早餐會場設於1樓「PIZZERIA & BAR NOHGA」餐廳，除咗有一大朝早就出鮮出爐嘅佛卡夏意式麵包（Focaccia）外，住客仲可以同場從egg benedict、蘑菇奄列等共5款雞蛋料理選擇心儀款式呢。
睇到呢到，您對秋葉原嘅印象係咪已經完全被改寫呢？踏出酒店門外，即可以接觸到獨特文化；玩到攰返到酒店，又可以透過音樂、藝術、飲食等多方面文化，感受秋葉原文化交錯嘅多元化及挑起好奇心嘅創意一面。記得下次去東京旅行時，一定要入住NOHGA HOTEL 秋葉原 東京，感受唯獨NOHGA HOTEL先能夠體驗到嘅秋葉原特色喇！
酒店資訊
- 名稱：NOHGA HOTEL AKIHABARA TOKYO
- 地址：東京都千代田區外神田3-10-11
- 客房數目：120室
- Wi-Fi：有
- 交通：JR「秋葉原站」電器街口徒步約6分鐘，或東京Metro銀座線「末廣町站」3號出口徒步4分鐘
Comments