岡山縣除咗坐擁瀨戶大橋、倉敷美觀地區、後樂園等美麗自然風景，遊客仲可以喺縣內欣賞得到保留著日本風情嘅懷舊景致以及品嚐豐富美食，例如喺桃太郎故事登場嘅「吉備糰子（きびだんご）」等傳統日式點心，又或桃、提子等著名水果。今次，編輯部就要同大家分享去岡山旅遊時必買嘅當地手信喔！
源自於日本民間傳說『桃太郎』嘅岡山名產吉備糰子
講到岡山縣岡山市裡面最具代表性嘅手信，可以話非「吉備糰子（きびだんご）」莫屬。有關於吉備糰子嘅由來有好幾種講法，其一係由於以前嘅岡山被稱為「吉備之國」，因當時會以磨成粉嘅黍米（きび）製作成「黍米糰子」享用。其後而得名。以「黍米糰子」作為原型改良而成嘅求肥（以糯米粉、砂糖、水飴，所製作嘅日式和菓子材料，稱之為求肥）菓子，以其作為吉備津神社嘅茶座點心此舉，現時一般被認為係吉備糰子嘅由來。
雖然吉備津神社以日本家喻戶曉嘅民間傳說『桃太郎』而聞名，但由於並無留下任何相關證據等文獻記載，所以桃太郎傳說嘅真相至今仍然係一個謎呢。
吉備糰子係將加熱後嘅糯米、砂糖、水飴、黍米粉混合攪拌成糰子狀，表面撒上片粟粉（100%由薯仔製成嘅澱粉）嘅日式點心。最近亦有出現無加入黍米粉嘅商品，以及多種唔同味道任君選擇。例如黑糖味、黃豆粉味、日本象徵之一嘅抹茶味、岡山名產白桃風味等，推薦大家試多幾款唔同口味，睇吓邊款最啱您喔。
由1856年創業嘅老字號店舖「廣榮堂」所販售嘅「元祖吉備糰子（元祖きびだんご）」、「黑糖吉備糰子（黒糖きびだんご）」、「海鹽吉備糰子（海塩入りきびだんご）」、「白桃吉備糰子（白桃きびだんご）」、「黃豆粉吉備糰子（きなこきびだんご）」、「玄米吉備糰子（玄米きびだんご）」、「紅白吉備糰子（紅白きびだんご）」以及「昔吉備糰子（むかし吉備団子）」已於2015年取得清真（Halal）認證，讓穆斯林都可以安心品嚐既人氣獨特又有故事性嘅和菓子。
除咗「吉備糰子」，岡山仲有被譽為日本三大日式甜饅頭之一、擁有悠久歷史嘅「大手饅頭（大手まんぢゅう）」，又或以柔軟薄身嘅「Castella（カステラ）」（又稱為長崎蛋糕）包裹著於糯米中，再加入砂糖與水飴攪拌製作而成嘅求肥等工序製作嘅日式和菓子「調布」等。有機會記得要去入手返幾款，將岡山味道齊齊帶返屋企喔！
去兒島牛仔褲街進行岡山牛仔布體驗啦！
「岡山牛仔」係自古作為紡織業城市曾蓬勃發展嘅倉敷市兒島地區以及井原市附近嘅井原地區所生產嘅牛仔布總稱，以其高質材料而獲世界知名品牌及設計師界一致讚好，而提到岡山牛仔褲，就不得不提日本牛仔褲發源地兒島地區內嘅「兒島牛仔褲街」。街上除咗牛仔褲商店、博物館，仲有工房等店鋪林立，近年可謂備受矚目。
兒島牛仔褲街位於從JR線兒島站步行15分鐘左右嘅商店街一角。從車站行入市區再進入商店街，立即就會遇見吊喺屋頂上嘅牛仔褲出現喺您眼前！呢個就係牛仔褲街嘅入口。
兒島牛仔褲街裡面販賣著各種牛仔布料與藍染商品，除咗服飾類，仲有銀包、手提包、鎖匙扣、雜貨類等等，款式多到令人花多眼亂。根據唔同店鋪，唔單止可以購買現有商品，仲有提供度身訂造牛仔褲服務，牛仔布料或披肩等藍染體驗，以及原創掛飾製作等各種牛仔體驗，下次不妨親手製作出屬於您嘅岡山旅遊回憶啦！
令人驚喜嘅係，竟然仲有「牛仔藍肉包」與「牛仔藍梳打」等藍色美食，一場嚟到又點可以錯過吖！
白桃與提子！水果大國特有美食
岡山縣因溫暖瀨戶內氣候而孕育出多款優質水果，更作為「水果王國」而聞名日本全國。
提子方面就係當中著名俵俵者，皆因岡山縣內除咗喺生產亞歷山大麝香提子方面有成130年歷史之外，仲有生產新貓眼提子、無籽可以連皮品嚐嘅香印青提、被譽為「新世代提子」黑極光等，種類相當多樣化。
盛產提子嘅岡山縣內，除咗可以買到新鮮提子，仲可以入手唔少加工品或零食甜品類製品，啱晒用嚟做手信。小編推薦可以品嚐得到水果原有嘅果醬、罐頭、果汁，曲奇餅乾、啫喱、糖果類等選項亦相當受歡迎。
「OKAYAMA SHINE MUSCAT COOKIE(岡山シャインマスカットクッキー)」（小）540日圓（含税）/ 「株式會社TANABE（株式会社タナベ）」
岡山縣亦係白桃盛產地，與提子一樣相當著名。事實上，現今日本主流嘅「白桃」以及「清水白桃」等多個品種都係嚟自岡山縣！一般印象中呈現深粉色嘅桃，係以「無袋栽培」方式培育，惟岡山縣有別於其他縣，選擇將每一個桃都套上袋，以「有袋栽培」方式培育，令桃們不被陽光直接照射，成功栽培出擁有皮薄餡靚、顏色偏白，而且食落香甜柔嫩嘅桃。加入白桃製作成法式甜點費南雪（又稱為金磚蛋糕）、蛋糕、啫喱等甜品，無論係買嚟自用或送禮都相當合適！
岡山名產吉備糰子亦有香印青提味及白桃味提供。下個岡山之旅，記得要去買嚟試一試喔！
倉敷玻璃與紙膠帶…日常生活傳統工藝品亦係熱門手信！
倉敷市唔單止係以牛仔聞名各地嘅兒島所在地，更加係民間工藝品、工藝品製作嘅盛行地區。傳承並致力保護傳統工藝嘅製造商當中，有唔少係創業超過100年嘅老字號企業，喺重視傳統嘅同時，將傳統工藝與思想融入現代設計，並不斷創新與時並進，設計出現代生活與家居中都可以輕鬆使用嘅商品。
特別係經過職人們之手，細心製作嘅倉敷玻璃。雖然係民間工藝品，但堅固耐用兼設計簡單，適用於各種場合，因此相當受歡迎。另外，倉敷亦係著名嘅紙膠帶（masking tape）發源地，膠紙圖案相當豐富，有色彩繽紛嘅日式花紋、仲有倉敷街道、當地吉祥物等為主題嘅圖案，亦係日本獨有！如果有可愛膠紙陪伴著，相信您嘅學習與工作時間會變得更加美好吧？
其他不可錯過嘅岡山美食
講到瀨戶內海就梗係要食海鮮！必試「一年蠔」
瀨戶內海沿岸嘅四國、廣島等地，漁業相當盛行，因此岡山可以捕獲唔少美味海鮮。當中，又甜又肥美嘅蠔就最出名！
因為岡山海水營養豐富，通常需要2~3年養殖時間可以縮短到1年左右，亦稱為「一年蠔」。「一年蠔」特點係肉身呈白色、咬落肉質柔軟兼無任何海水腥味，加熱後亦唔會收縮。
遊客可以去日生以及寄島等漁港附近以及倉敷市內直銷地點買到新鮮蠔之餘，亦可以去機場或車站店舖將橄欖油醃漬蠔與煙燻蠔等加工品買返屋企做手信。
備中手延麵
最後介紹嘅係鴨方町及其周邊地區所製作嘅手延麵（日文中「手延」亦即「手拉」嘅意思）。
鴨方町自古就係手延麵嘅一大產地，每年都會舉辦「鴨方町手延麵祭」等活動。透過傳承古法製麵，重複「熟成」與「手拉」等費時工序，因此製作出嘅手延麵條份外口感軟滑中帶有彈性！
以上所介紹嘅多款手信、當地特產，大部分都可以喺岡山桃太郎機場和JR岡山車站內嘅商店購買得到，經過記得要去行個圈喔。
Comments