溫暖氣候與耀眼太陽，一望無盡嘅大海景色…作為日本最大內海而聞名嘅瀨戶內海周邊地區，唔單止有著如地中海般嘅氣候加無敵海景，仲有唔少文化遺產及史跡，絕對係一個可以盡享旅遊與度假風光嘅好地方。 今次，FUN!JAPAN編輯部會為大家介紹瀨戶內地區嘅魅力，嚴選出春夏必去旅遊景點、必玩活動推介！
瀨戶內海喺邊度？ 何謂瀨戶內地區？
瀨戶內海係日本最大嘅內海，被本州、四國以及九州所包圍， 面積為23,203平方公里，海岸線總延長約為7230公里，海域中分佈著約700個大小不一嘅島嶼。
瀨戶內地區係指瀨戶內海嘅沿岸地區，一般包括兵庫縣嘅播州地區、岡山縣、廣島縣、山口縣、香川縣以及愛媛縣嘅合計地域。部分情況下，亦會包含淡路島、德島縣、福岡縣北部、大分縣。
瀨戶內地區氣候與降水量
南北被山地包圍嘅瀨戶內海沿岸地區，全年平均氣溫大約16度，平均降水量約1,000～1,600毫米，以氣候溫暖降雨量少及全年晴天率非常高而聞名。夏天時四國一側、冬天本州一側（中國地區）群山遮擋住季候風，所以好少會落雨。眾所周知，惡劣天氣係旅行嘅大敵，如前文提到瀨戶內地區全年晴天率非常高，因此嚟瀨戶內地區就唔怕會受天氣影響，打亂晒一早計劃好嘅戶外活動旅遊行程，咁就可以盡情玩您想玩喇！
瀨戶內地區旅遊特色逐個捉
瀨戶內地區近年成為相當受歡迎嘅旅遊目的地。跟住落嚟，將會為大家介紹瀨戶內地區嘅旅遊特色及推薦景點。
特色1 豐富海鮮與美食！
海鮮
講到瀨戶內海嘅魅力，首先令人聯想到就係豐富嘅海鮮。
瀨戶內海以盛產美味海鮮聞名，箇中美味原因除咗因爲瀨戶內海屬於淺灘地區，屬於容易產生浮游生物嘅環境之外，仲有因為從四周巒山流入大量富含營養成分嘅河水、魚類喺激烈嘅海流中遊動下，令魚身變得更緊緻更好食等等各種各樣嘅說法。
由於喺唔同季節下，水溫亦會有所變化，因此遊客一年四季都可以享受到各式各樣嘅魚鮮。 例如，從4月到5月會捕獲到藍點馬鮫、玉筋魚、當地料理中不可缺少嘅黑鯛魚、橄欖鰤魚等養殖繁盛嘅鰤魚、無論魚生或燘煮都一樣咁好食嘅翎鯧魚等。魚類之外，廣島縣嘅蠔產量仲係全國第一呢！ 大大隻廣島蠔無論係用嚟整燒蠔、炸蠔、法式焗菜等等都好滋味，廣島蠔可以話係瀨戶內嘅頭號美食代表，令人一食永難忘！
晴天率高、氣候溫暖嘅瀨戶內地區，柑橘類嘅栽培亦相當豐盛，當中嘅柑橘種類竟然多達49種！
特別係愛媛縣嘅蜜柑、伊予柑、廣島縣嘅檸檬等等聞名全國，亦有大量生產果汁、果醬、點心、調味料等等加工品，用嚟做手信就啱晒喇！
特色2 打卡勝地！多個唯美海洋絕景
小豆島天使之路
天使之路係小豆島嘅代表性絕景，亦係必去旅遊景點之一。一日兩次退潮期間，海中會出現名為「天使之路」嘅沙灘小徑，潮漲時只能夠望見大海，退潮時卻廣闊大海中竟然就會出現一條白色道路！蔚藍天空大海與白色沙灘形成嘅對比非常浪漫，因此此處成為著名能量景點愛情聖地，亦曾經作為電影裡面嘅外景場地。
小豆島係香川縣島嶼中最大嘅一個島。 從岡山縣高松港搭高速船約35分鐘或搭渡輪約70分鐘即可抵達。
從鷲羽山欣賞瀨戶大橋
1988年，連接本州岡山縣與四國香川縣嘅瀨戶大橋正式通車。 瀨戶大橋係海峽部9.4km處所架設嘅6座橋總稱，分成上層為自動車道路與下層為鐵路嘅兩層構造，亦係全世界最長嘅兩層公路鐵路兩用橋。
識睇景嘅，一定係去最佳觀賞位－岡山縣倉敷市嘅鷲羽山。從山上，您可以盡情享受雄偉嘅大海絕景，飽覽瀨戶內海上50多個大小不一嘅島嶼所形成嘅「多島美」，延伸到瀨戶內海大海嘅瀨戶大橋。呢度亦係人氣嘅打卡景點。 特別於夕陽黃昏時分嘅景色格外迷人！
瀨戶大橋亦被選為「日本夕陽百選」。 從JR兒島站乘搭路線巴士約30分鐘，或者從兒島交匯處駕駛約5分鐘即可到達。
鳴門漩渦
鳴門漩渦係每當漲潮及退潮時，由瀨戶內海與紀伊水道所形成嘅水位差而產生高速激烈嘅流動下所形成嘅自然現象。春天與秋天嘅大潮時，鳴門漩渦最大直徑可高達20米，規模堪稱世界第一。
如果想近距離觀賞鳴門漩渦嘅話，推薦去大鳴門橋車道下方嘅海上遊步道「渦之道」。企喺距離渦流45米高嘅玻璃地板俯瞰，就好似能親歷被漩渦捲入其中一樣嘅驚險。
如果想從海上欣賞鳴門漩渦嘅話，推薦您搭大型觀潮船或小型水中觀潮船（※需要事先預約）。
順帶一提，因為無潮水流動嘅時段喺見唔到漩渦，所以記得要事先喺潮汐表上確認好最佳觀賞時間帶再出發喔。從德島縣JR鳴門站搭巴士，至鳴門公園站落車後徒步5分鐘，即可到達「渦之道」。
特色3 走訪世界遺產與日本史跡，感受懷舊日本風情！
講到日本旅行景點，日本當地特有景色以及世界遺產巡禮亦係不可或缺。 從JR倉敷站徒步10～15分鐘即可抵達倉敷美觀地區，沿河柳木並排嘅姿態加上日本傳統建造物林立嘅街道充滿日本舊日風情，相當古色古香，難怪被國家指定為重要傳統建築物群保存地區。
首推必睇位係以白壁倉庫景色與觀光川舟停泊嘅倉敷川，先以河川為背景影返幾張靚相留倩影，再邊睇景再邊行邊食漫步一番。
另外，位於島波海道本州方位嘅尾道懷舊街道風情亦令人目不暇給。市區內車輛無法通行嘅坡道與石階簡直就好似迷宮一樣！小巷裡面亦有唔少翻新過嘅錢湯或由古民家改建成嘅Café，路上仲可以偶遇唔少貓咪喔。
除此之外，您仲可以參觀廣島縣廣島市原爆圓頂館以及廣島縣廿日市市嘅嚴島神社等各個世界遺產史跡呢。
特色4 人氣戶外活動與話題藝術景點滿戴！
瀨戶內海晴天多、海浪比較平穩，因此水上活動初學者都可以輕鬆體驗各種海上運動，當中包括皮划艇與划艇、 SUP 立槳，又或於高透明度嘅海中享受浮潛及潛水等。
踩單車橫越島波海道嘅島波單車之旅，以及一邊睇景一邊「食好西」嘅豪華級BBQ＋豪華露營等行程近年亦備受矚目喔。
瀨戶內散佈著多個藝術景點，其中有多處美術館及博物館可以畀遊客欣賞等到現代藝術與開揚感十足嘅室外藝術。 著名景點包括香川縣直島，又或從島波海道通往嘅生口島與大三島等地方。
瀨戶內地區範圍廣闊，處處都有旅遊景點，亦有唔少縣與縣之間嘅交通移動方式。 除咗電車之外，需要搭船移動嘅情况亦會經常出現，所以喺交通移動與停留時間方面要預留充足嘅時間喔！
Comments