天守係日本城堡嘅象徵，到目前為止FUN! JAPAN編輯部曾經介紹過嘅天守，雖然驟眼睇會覺得每個都好相似，但實際上每一個城堡嘅天守樣式，依建築構造都各有不同！日本城堡天守大致上可分為4種：獨立式、連立式、複合式以及連結式，以下就由小編為大家簡單介紹各種樣式特色！睇完呢篇文章之後，下次去日本各地城堡嘅時候，話唔定您都可以簡單分辨出眼前嘅城堡係屬於邊一種天守呢？
獨立式
最簡單亦都係最好分辨嘅天守，就係「獨立式」。周圍並無其他附屬建築物，只有單獨一座天守，可以從天守嘅地下樓層或1樓直接進入。換句話說，「獨立式」樣式天守一旦被敵人攻佔本丸之後，就可以直接長驅直入天守，織田信長、豐臣秀吉掌握天下大權嘅時代，幾乎唔存在獨立式天守；直到天下統一，戰事平息嘅江戶時代之後，先至逐漸開始建造。現今仍然保留獨立式天守嘅日本名城有，青森弘前城、福井丸岡城、愛媛宇和島城、大阪大阪城以及高知高知城等。
連立式
「連立式」係大天守與2座以上嘅其他建築，藉由渡櫓連結呈現環狀嘅天守樣式，係所有天守樣式當中最複雜嘅一種。「連立式」嘅特色，係內側會建造類似中庭嘅空間，當遇到敵人侵襲時，城堡內嘅人就會誘導敵人行入去呢個空間，以便部署士兵們從櫓集體射擊擊退敵人。採用連立式嘅名城代表有兵庫姬路城、愛媛松山城以及和歌山和歌山城。
複合式
有附櫓、小天守附屬建築物連結大天守嘅樣式稱之為「複合式」。如果唔經過附屬建築物，就無法進入天守，所以就算敵人攻入附屬建築物，亦可以由天守內側迎擊敵人。至今現存複合式天守名城有：島根松江城、滋賀彥根城、愛知犬山城、岡山備中松山城等。
連結式
以渡櫓、橋台連結大天守、附櫓與小天守嘅樣式稱為「連結式」。與上述複合式天守相同，如果唔經過附屬建築物，就無法進入天守。符合「連結式」天守樣式嘅名城有福島會津若松城、熊本熊本城等。另外，例如愛媛大洲城般左右各有一座櫓或小天守連結嘅城堡，或愛知名古屋城般大小天守由土牆包圍著嘅樣式亦屬於「連結式」之一。
番外篇：結合「連結式」與「複合式」之「連結複合式」天守
位於長野嘅松本城擁有連棟天守群，城堡原本採用渡櫓連結大天守與乾小天守嘅連結式構造，其後於江戶時代進一步連接辰巳櫓與月見櫓、成為複合式，由同時採用以上2種椒式搭配出複雜構造，因此就被稱為「連結複合式」。
天守原意為展示城主權威，常見樣式大致可分為上文介紹嘅4種，但經過各種組合配搭後，亦有機會演變出複雜建築樣式。了解完各種天守樣式當中嘅分別之後，您都不妨回顧一下曾經去過嘅城堡與將來想去嘅城堡，有邊啲相同之處或不同嘅地方，話唔定會會令城堡之旅增添更多樂趣呢！
Comments