提起名古屋旅行，名古屋定必屬於頭號必去景點！名古屋城位處日本中部地區愛知縣，屬於江戶時代最重要城堡之一，唔單只係名古屋市象徵，更係鼎鼎有名日本三大名城之一，其中屋頂上嘅裝飾「金鯱」更係非常大受遊客歡迎呢！如果您對日本豐富歷史與古老文化有興趣的話，咁就一定唔可以錯過名古屋城！
歷史愛好者朝聖首選—名古屋城
名古屋城於江戶時代係尾張藩藩主居城，別名「金城」、「金鯱城」，與大阪城、熊本城合稱為日本三大名城。名古屋城係關原之戰後由創建江戶幕府嘅初代將軍德川家康下令建造具有代表性嘅平地城堡得來，城堡始建於1610年，主要建築物於1612年大致完工，但城內大多數建築物（包含大、小天守閣及本丸御殿）皆於第二次世界大戰中燒毀，因此現時大家所見到嘅天守閣係1959年重新建造而成。名古屋城過去一度係天皇使用嘅離宮，被天皇下賜名古屋市後，神秘高貴嘅面紗先得以被揭開！
天守閣內部從地下1樓至7樓都各有特色展覽，展品內容包括名古屋城模型、本丸御殿障壁畫、城內城下日常生活、名古屋歷史等。天守閣7樓為展望室，您可以眺望名古屋城周邊景色，而行動唔方便或唔想爬樓梯嘅遊客亦可以選擇乘搭電梯，完全無需要擔心參觀上嘅不便。此外，內部亦有售賣部分名古屋城限定商品呢！
註：名古屋城天守閣於2018年5月7日至2022年整修關閉
名古屋城象徵—「金鯱」
日本城堡大多都有懸掛金鯱，但當中人氣最高嘅，非名古屋城上嘅金鯱莫屬！提起名古屋，好多人第一印象就係圖上呢對金鯱。金鯱即係頭部為虎，身體為魚嘅架空生物，其漢字「鯱（シャチ）」亦由魚與虎組合而成。起初相傳因為金鯱於建築物發生火災時可以噴水滅火，所以就成為建築物守護神，喺日本住宅、寺院、城堡等都可以見到金鯱身影。原本安置於名古屋城嘅金鯱於第二次世界大戰與天守閣一同被燒毀，目前金鯱則係西元1959年10月由大阪造幣局重建。
天守閣以外必睇重點：隅櫓
名古屋城範圍內除天守閣以外，亦包含東南隅櫓與西南隅櫓。西北隅櫓巨大建築屬於重要文化財產，白色耀眼外牆於日光下顯得非常清爽！
天守閣以外必睇重點：豪華絢爛金色內部裝飾「本丸御殿」
原本嘅本丸御殿已於1945年5月遭受美軍空襲時與天守閣一同被燒毀，現時嘅本丸御殿則係由2009年開始重建工程，再於2013年正式開放入口玄關以及大廳表書院，最終再於2018年對外開放參觀。本丸御殿與京都二条城二之丸御殿並列稱為「武家風書院造雙璧」，被譽為近代城郭建築最高傑作。由於內部建築材料都非常珍貴，所以如果遊客攜帶較大型嘅背囊手袋、鞋履時都必須先寄儲於置物櫃，以防造成建築物受損。進場後，您就可以喺到欣賞到工藝品背後嘅迷人故事與細節，以及武士歷史文化！
設施情報
- 名稱：名古屋城
- 地址：愛知縣名古屋市中區本丸1-1
- 開放時間：開放時間：09:00 - 16:30
- 定休日：12月29～1月1日
- 門票：成人500日圓、中學生以下免費。
- 交通方式：地下鐵名城線 「市役所」站落車，從7號出口步行5分鐘
同場加映：名古屋名店美食街「金鯱橫丁」
「金鯱橫丁」即係指名古屋城門外兩條美食街，分為「義直」、「宗春」兩個區域。「義直」以建造名古屋嘅尾張藩首任藩主「德川義直」命名；「義直」區內則可以品嚐到極具名古屋特色嘅美食（日本人稱名古屋道地菜式為「名古屋飯」），例如著名「味噌豬排」與「鰻魚三食」等名古屋傳統美食，而且店家亦都係名古屋知名老字號名店。如果想品嚐正宗又傳統嘅名古屋美食，mark實義直區就包無出錯！
「宗春」區域以尾張德川家第7代藩主「德川宗春」命名，由於德川宗春對華麗物件情有獨鍾，並以大膽有效嘅獎勵政策鞏固名古屋基礎，因此此區有別於主打傳統經典嘅義直區，改為以新創、變化為主題。由未來將帶動名古屋飲食文化嘅年輕經營者開設嘅café與或西式日本料理餐廳一字排開，遊客可於店內以品嚐到創意意大利粉、創作炸串、熟成肉牛排，以及近期成為「名古屋飯」一員嘅「勾芡意大利粉」與鐵板意大利粉等新派美食～
設施情報
- 名稱：金鯱橫丁
- 地址：愛知県名古屋市中区三丸1丁目2−3～5號
- 開放時間：（義直區）10:30 ~ 名古屋城閉城後30分鐘，（宗春區）平日 11:00 - 22:00；六日及公眾假期 10:30 - 22:00
- 交通方式：（義直區正門區域）地下鐵名城線 「市役所」7號出口徒歩10分鐘或地下鐵鶴舞線 「淺間町」 1號出口徒歩10分鐘；（宗春區東門區域）：地下鐵名城線 「市役所」7號出口即達
Comments