青森縣溫泉源泉數量喺日本全國排名第6 （溫泉地數量為全國排名第5），因此如果有機會去青森玩但唔去浸溫泉嘅話，就未免太可惜喇！想體驗可以觀賞到大自然嘅秘境溫泉？呢篇文章就係您嘅引路明燈！
青森溫泉特色
青森溫泉特色之處，在於幽靜環境與清澈冰冷空氣。於青森縣內各個城鎮之間來往，即使交通方便，都會畀人一種偏遠感覺，令人可以逃離繁忙日常，悠閒舒適地休息一下。
青森溫泉種類非常多，想要一邊眺望海景一邊浸溫泉、置身於森林深處呼吸芬多精享受溫泉，或檜木千人浴，任何心願都可以滿足得到；而泉質更係由硫酸鹽泉至鹼性泉應有盡有，可以舒緩身體不適。只要浸喺溫泉裡頭，膊頭上嘅重擔瞬間卸下，係一個城市人可以好好休息嘅空間。
淺蟲溫泉：傍海溫泉渡假
淺蟲溫泉就好似關東熱海度假勝地，係一個唔算好大嘅溫泉度假勝地。淺蟲溫泉靠近海邊，分為兩個區域—東邊係傳統溫泉勝地，西邊則係海灘度假勝地。賓客可以享用溫泉煮雞蛋、品嚐當地美食，仲可以浸個足浴，體驗一下傳統溫泉活動。海灘區域內，您可以入住豪華度假村、飽覽一大片海景，或者喺公路休息站「 ゆ～さ浅虫」邊浸溫泉邊欣賞海景！
淺蟲溫泉以泉質清澈無味、觸感順滑而聞名，能夠舒緩神經痛、風濕病及日常莫名痠痛。
除咗浸溫泉，遊客仲可以享受滴水不沾嘅森林浴。如果想要嚟場森林浴，您可以去獲選為「森林浴之森百選」嘅淺蟲溫泉森林公園，盡情吸收芬多精嘅、為身體補充元氣，轉換心情。
景點資訊
- 名稱：淺蟲溫泉觀光案內所
- 地址：青森縣青森市淺蟲螢谷70
- 地理位置：位於本州北海岸，鄰近陸奧灣
酸湯溫泉：檜木千人大浴池
酸湯溫泉並唔係真係如字面般塞得落一千個人，而係一座248平方米嘅大型公共浴池，用「千人」去形容寬敞程度。
酸湯溫泉擁有約300年歷史，於西元1954年被列為國民保養溫泉地第一號。酸湯溫泉最出名就係混浴「檜木千人大浴池」以及男女獨立浴池，大浴池於朝早8點至9點限定開放女性客人入場。泉質為酸性硫磺泉，有助舒緩、改善風濕、神經痛、胃腸疾病、婦女病、便秘及哮喘等等不適。酸湯溫泉為當地溫泉日式旅館嘅一部分，提供即日來回浸溫泉服務。營業時間由早上七點至下午六點，門票為成人1,000日圓。
景點資訊
- 名稱：酸湯溫泉旅館
- 地址：青森縣青森市荒川南荒川山國有林酸湯澤50
- 營業時間：大浴池 07:00～18:00；男女獨立浴池 09:00～17:00 （最後受理時間為結束營業前30分鐘）
- 門票：成人 1,000日圓，孩童 500日圓
古牧溫泉：白雪覆蓋溫泉景色
古牧溫泉位於青森縣東部，靠近三澤機場，位處於星野集團青森屋內。青森屋打造出景色絕美嘅露天溫泉，遊客仲可以順便欣賞青森知名睡魔祭。唔洗等到八月舉辦青森睡魔祭！只要嚟到青森屋，即可以全年欣賞青森呢場熱鬧繽紛夏日祭典。
室內溫泉飄散著一股青森檜木香味，而室外浴池則位於一座寧靜池塘中。秋天景色令人驚嘆，楓紅以外，樹梢枝頭嶺長滿無數橘子，景色美不勝收。冬天時，您會發現自己有如處身喺一片人間仙境裡面，仲可以浸足浴，欣賞公園美景。
要留意，古牧溫泉浴池只會開放畀住客，原本傳統元湯浴池現已關閉。泉質屬鹼性泉，有助舒緩神經痛、肌肉酸痛、關節痛、促進血液循環等功效。
景點資訊
- 名稱：星野集團 青森屋
- 地址：青森縣三澤市古間木山56
- 交通資訊：從三澤站步行約15分鐘。房客可乘搭來往三澤站、八戶站與三澤機場之酒店接駁車服務。
黑石溫湯溫泉：秋天賞楓好去處
擁有400年以上歷史嘅溫湯溫泉，充滿懷舊氣息，係黑石溫泉鄉當中最古老嘅溫泉，位置十分靠近知名賞楓景點中野楓葉山。
溫湯溫泉作為溫湯木偶發祥地而聞名，入口處就可以見到一尊面帶微笑嘅溫湯木偶歡迎遊客蒞臨。溫湯與落合、板留、青荷四座溫泉組成黑石溫泉鄉，當中又以溫湯位置較為偏僻，位於淺瀨石川旁。除咗溫泉，當地仲有公共澡堂、木介子博物館以及津輕傳統工藝中心。每逢秋天，溫湯溫泉都會化身熱門秋季旅遊景點，睇紅葉就真適合！
溫湯溫泉呈淡綠色，水溫約為57℃，泉質係弱鹽份泉質，有助舒緩類風濕、神經麻痺、消除疲勞、胃虛等等症狀。
景點資訊
- 名稱：鶴之名湯 溫湯溫泉
- 地址：青森縣黑石市溫湯鶴泉79
- 交通方式：從黑石車站乘搭往溫川溫泉弘南公車，於上溫湯或下溫湯落車
- 營業時間： 05:00～22:00
- 門票：成人（中學生以上）250日圓、小童100日圓（3歲以下免費）
大鰐溫泉：800年悠久歷史
大鰐溫泉係相當受歡迎嘅溫泉小鎮，溫泉選擇眾多，而且距離弘前車程唔算遠。平川流經成個小鎮，寧靜街道上遍佈多間擁有自家溫泉設施嘅青年旅館與日式旅館。部分旅館提供即日來回浸溫泉服務，當然亦有公共浴池提供浸溫泉服務，倒如大湯會館等。
行到腳酸嘅時候都唔洗擔心！皆因街上有三處足湯任君挑選，將雙腳放入溫熱嘅泉水裡面舒緩一下雙腳疲勞，又可以行多幾步。大鰐流傳著一個古老傳說，相傳當地領主患上眼疾，據聞用泉水清洗可以痊癒，領主照著做之後眼竟然就真係痊癒（當然基於衛生觀點，唔建議大家照做！）。
大鰐溫泉水溫約為75度，泉質為含石灰食鹽泉，有助改善類風濕性關節炎、腰痛、痔瘡以及神經痛等症狀。
景點資訊
- 名稱：大鰐溫泉
- 地址：青森縣南津輕郡大鰐町
- 交通資訊：從JR大鰐車站徒步約5分鐘
Comments