如果您有計劃，想暫別一下香港大城市煩囂、投奔大自然懷抱，青森僻靜嘅溫泉或者係最佳選擇！通常呢一類咁與眾不同嘅溫泉，都會出現喺河川旁、深山中，被綠油油嘅森林環繞，當中會有非常原始純樸，甚至無電力供應嘅溫泉，絕對係鍾意親近大自然嘅朋友仔嘅理想度假勝地。以下5處位於東北地區青森縣嘅溫泉好去處各有特色，正好滿足唔同遊客嘅需要！
黃金崎不老不死溫泉：無敵大海景×「返老還童」泉水
嚟到黃金崎不老不死溫泉，各位可以一邊浸溫泉、一邊眺望日本大海，絕對係令人畢生難忘嘅體驗！當地設有室內浴池可以欣賞到動人景色，亦有桑拿設備，不過注目度最高嘅就必定要數到露天溫泉。黃金崎不老不死溫泉嘅露天浴池座落於岩石海灘上，浸溫泉嘅期間就好似同大海融為一體，一邊享受清新海風，傾聽療癒海浪聲。要注意嘅係，夕陽西沉嘅黃金時段只有住房旅客先有幸睇得到，既然一場嚟到，唔爭在體驗一下日式傳統旅館，一於住返晚啦！順帶一提，「不老不死」就正如字面所解，象徵著浸過溫泉後就將會似返老還童一樣，覺得自己換然一新。
泉質包含鈉、鈣、鎂，泉水呈混濁啡色，有效舒緩神經痛、背痛、風濕病及皮膚病等症狀。
景點資訊
- 名稱：黃金崎不老不死溫泉
- 地址：青森縣深浦町艫作下清瀧15-1
- 交通資訊：從JR青森／新青森站乘搭白神觀光列車至JR WESPA椿山站，轉乘酒店接駁巴士。
- 營業時間：露天溫泉8:00～16:00、本館浴場8:00～21:00、新館浴池10:30～14:00
- 門票：即日來回 成人 600日圓、小童300日圓。住宿提供住房方案選擇。
燈火民宿 青荷溫泉：遠離現代、回歸簡樸
青荷溫泉亦稱為「燈之宿」，位於黑石與十和田八幡平國立公園之間嘅青荷川旁。其獨特之處，就在於燈火民宿完全唔使用任何電力，全館只係用上煤油燈，無網路訊號、電話亦都打唔通，係一個好機會可以暫別現代生活，放低手機遠離網路世界，嘗試重返大自然嘅最佳選擇。其實燈火民宿以前都有用過電力，但電力卻唔多穩定，於是老闆就索性唔用電，選擇最簡單原始方式。
四周森林環繞、河川涓涓細流，簡直係遠離世俗嘅隱世之地。最理想當然留宿一晚慢慢體驗，但針對行程趕急嘅遊客，民宿有提供跟餐嘅即日來回浸溫泉行程，費用由1,500日圓起，方便各位選擇淨係浸溫泉而唔住宿。
燈火民宿一共提供四種唔同溫泉，當中包含混浴露天浴池（有提供女性專用沖涼時段）。泉質單純、無味無色，有效舒緩風濕、肌肉骨骼疾病、神經麻痺與疲勞等症狀，據聞仲可以促進夫妻間嘅感情呢！
景點資訊
- 名稱：燈火民宿 青荷溫泉
- 地址：青森縣黑石市大字沖浦字青荷澤瀧ノ上1-7
- 交通資訊：從JR弘前站至弘南鐵路弘前站乘搭往黑石之弘南線，於黑石站落車後轉乘往溫州方向之弘南巴士於「虹之湖公園」巴士站落車，再轉乘免費接駁巴士（需事前預約）
- 營業時間：當天泡湯 10:00～17:00，住房Check-In 15:00／Check-Out 10:00
- 門票：即日來回 成人 540日圓，另提供附午餐的行程。住宿提供住房方案選擇，請上日文官網查詢。
湯野川溫泉：秋天賞楓最佳享受
湯野川溫泉係青森縣內一處恬靜嘅溫泉勝地，區內一共有3間旅館。秋高氣爽嘅時候，四周會染上一片橙黃、啡紅，景色美不勝收。此外，由於湯野川溫泉位於下北半島中心、冬天積雪深厚，因此可以趁冬天之前欣賞到秋天最動人嘅景緻。遊客可以選擇過夜或短暫停留放鬆一下，體驗美麗嘅露天溫泉，眺望楓紅美景，療癒一下身心靈。
例如「濃濃園」就提供即日來回浸溫泉服務，費用只需380日圓。浴池飄著青森檜木香氣，試想像一下浸喺檜木浴池當中，眺望涓涓流水和綠油油嘅森林，係幾咁寫意呢～
湯野川溫泉鄉泉質為鹼性單純溫泉，水溫約54.4℃，有效舒緩神經痛、肌肉酸痛、改善五十肩、手腳冰冷等症狀。
景點資訊
- 名稱：湯野川溫泉鄉
- 地址：青森縣陸奧市川內町湯野川15
- 交通方式：從JR八戶站搭青森鐵道至大湊站，轉乘巴士至川內町，乘搭川內至湯野川縣巴士。
- 門票：即日來回浸溫泉 成人380日圓
奧藥研溫泉：隱世秘境「河童溫泉」
奧藥研溫泉位於青森下北半島荒野內，地處偏遠，屬於人煙稀少嘅秘境溫泉。藥研與奧藥研由一條長約4.4公里嘅健行步道連接，遊客可以先喺露天浴池浸一浸，再行去同樣位於戶外嘅奧藥研浴池，嚟一場「藥研之旅」。當地一共有兩種浴池，分夠為免費嘅河童湯，同埋男女分開嘅夫婦河童溫泉。
相傳約一千一百年前，恐山開山始祖慈覺大師嚟到奧藥研時唔小心受傷，然後有一隻河童出現，將大師揹到去溫泉療傷．為咗感謝河童，大師因此就將溫泉命名為「河童溫泉」。
奧藥研溫泉為泉質單純泉，水溫約46℃，功效為神經痛、風濕病、皮膚病、婦女病、腸胃疾病以及恢復疲勞等。
景點資訊
- 名稱：奧藥研溫泉河童溫泉
- 地址：青森縣陸奧市大畑町赤滝山國有林
- 交通方式：從JR下北站揸車前往約60分鐘，或乘搭下北交通巴士（只於5月至10月期間服務）。
城倉酒店：一站式解決購物觀光所需
城倉係青森八甲田地區唯一全年無休嘅露天溫泉兼山林渡假勝地，冬季景色格外美麗動人。優美景色環繞下，眺望迷人嘅夜空將會為您打造一場獨特溫泉經驗！城倉酒店靠近奧入瀨溪流與十和田湖，四周一片遼闊自然景色亦令人讚嘆彷如人間仙境。遊客可以順便選購當地種植嘅農產品，又或使用前往八甲田纜車等景點嘅免費接駁車服務。
泉質係鈣、鈉、氯化物（低濃度、弱酸性），有效改善神經和肌肉疼痛、手腳冰冷以及疲勞。
景點資訊
- 名稱：城倉酒店
- 地址：青森縣青森市大字荒川字南荒川（八甲田山內）
- 交通方式：從JR青森站搭免費接駁巴士（每日15:30發車，需事前預約）；從JR青森／新青森站乘搭JR巴士「湖號」至城倉溫泉巴士站落車。
- 營業時間：即日來回浸溫泉11:30～16:00
- 門票：即日來回浸溫泉 成人1,000日圓、學生500日圓、小童（小學以下）300日圓
Comments