日本水果不嬲都非常受港人歡迎，喺日本當地農園親身感受「即摘即食」嘅採摘體驗，更加係港人去日本遊嘅熱門行程之一。
相信大家一提起日本青森縣，好自然會即刻諗起蘋果，皆因日本青森縣盛產蘋果，箇中美味程度更係令人一試難忘。青森蘋果咬落爽脆香甜，聞落散發著陣陣清甜果香，簡直係令人回味無窮。青森蘋果鼎鼎大名更加係飄揚過海，當地除咗會將青森蘋果出口到國外，仲吸引唔少遊客親身去青森果園體驗摘蘋果，享受即摘即食嘅樂趣。跟住落嚟，不如就跟著小編腳步，帶您網上摘青森靚蘋果，兼話您知青森蘋果相關嘅小知識啦！
遊青森必摘蘋果理由
其實青森縣自1875年開始種植蘋果以來，一直都抱以精益求精嘅態度，不斷改良栽培及管理技術。時至今時今日，已經掌握如何種出既清脆甜美、又香氣濃郁嘅「靚蘋果」訣竅。一場嚟到青森縣，您除咗可以喺當地買蘋果嚟食之外，當然仲係要一試即摘即食有幾過癮！
試想像一下當您置身喺蘋果園裡面，陣陣蘋果香從四方八面湧埋嚟嘅同時，仲可以自己揀想食嘅心水蘋果兼且即摘即食。當中部分果園除咗可以摘蘋果之外，仲有其他水果都可供採摘，因此建議喺出發前做定功課，睇睇當造嘅水果種類以及開放時間。下次青森之旅，「摘蘋果」地道體驗又點可以錯過？
點解青森蘋果咁出名？
日本最大蘋果產地青森縣所出產嘅蘋果，除咗品種豐富多元化，產量更係佔日本全國一半以上。位於日本本洲北面嘅青森縣氣候涼爽， 晝夜溫差大，加上青森岩木山為蘋果阻擋著由西北吹嚟嘅海風，過往多次噴發時亦帶嚟火山灰、為土壤增添礦物質，令到蘋果擁有豐富養分。
青森蘋果之所以擁有卓越品質，除咗得天獨厚嘅生長環境然之外，栽培過程中細心呵護著毎一個蘋果嘅青森農夫們亦係不可或缺。蘋果種植過程相當繁複，每個蘋果喺收割之前甚至要經歷多達10個階段，過程非常講究。青森農夫咁盡心竭力地保護蘋果、細心呵護嘅精神，津輕方言稱之為「Joppari」，用於形容為每一個蘋果付出無窮心血，不斷追求美味之道，因此先能夠成功栽培出一個又一個香甜可口、外型又靚仔嘅青森蘋果。
青森蘋果收成季節
青森蘋果種類繁多，無論係味道、形狀甚至收成時期都唔一樣。青森蘋果最早從6月就開始進入收成時期，而大部分果園會喺7月至11月期間提供摘蘋果體驗活動，等大家可以親身感受即摘即食樂趣。想了解更多有關青森蘋果種類嘅話，可以參考以下文章 【日本青森】點解青森蘋果特別出名？3大原因您要知，話唔定會遇上情有獨鍾嘅蘋果品種喔。
1. 岩木山觀光蘋果園
岩木山觀光蘋果園位於岩木山山腳，園內有成約2,000多棵蘋果樹，品種有富士、津輕、土岐、弘前富士等等高達40種。蘋果園景色優美，處處散發著果香，絕對係您摘蘋果體驗嘅最佳選擇。除咗蘋果，根據唔同季節及月份仲會有車厘子、梨、水蜜桃、粟米等等多款蔬果採摘體驗活動可以參加。
更特別嘅係，每年只需16,250日圓就可以認養一棵蘋果樹，每位蘋果樹主人更可以喺蘋果樹上掛上您個大名。果園會向您匯報蘋果樹嘅生長狀況，仲會幫你收成、運送蘋果。當然你都可以趁機體驗一下「自己果樹自己收成」，別有一番風味。成為蘋果樹主人嘅話，每年就有約30kg嘅蘋果送到您屋企，相當吸引。
蘋果採摘時期為7月中旬至11月中旬。體驗費用每人800日圓，含手信則為2,000日圓。
景點資訊
- 景點名：岩木山觀光蘋果園
- 地址：青森縣弘前市百澤字寺澤120-3
- 交通方式：從JR弘前站駕駛出發約20分鐘
- 營業時間：09：00～17：00（摘蘋果體驗 09：30～16：30）
- 體驗費用：800日圓
2. 黑石觀光蘋果園
黑石觀光蘋果園位於八甲山山脈中心，遊客可以喺到採摘蘋果及車厘子。果園裡面種植嘅蘋果品種有王林、北斗、喬納金、富士、津輕等多款種類，大家可以邊摘邊食，再順便比較唔同品種嘅口感、味道有何不同。
蘋果採摘季節落喺9月初至11月中，蘋果園會依照收成時期提供各種蘋果畀大家採摘。體驗費用係1,100日圓，而且可以任摘任食之餘，仲可以拎走4個蘋果返屋企，相當抵玩！
景點資訊
- 景點名：黑石觀光蘋果園
- 地址：青森縣黒石市大字淺瀨石龍之口
- 交通方式：自駕出發嘅話，從東北自動車道黑石IC下，轉右往十和田方向，從國道102號線至果園，車程約5分鐘。
- 營業時間：09：00～16：00
- 體驗費用：每人1,100日圓，體驗內容包括蘋果園內任食，並可拎走4個蘋果返屋企
3. 弘前市蘋果公園
弘前市蘋果公園係弘前市絕佳旅遊景點之一，園內大約1,300多棵蘋果樹，品種有成65種，而且有專屬嘅體驗區，遊客可以親身體驗種蘋果過程中嘅每個環節，例如採摘、分揀、裝袋等等。園內嘅蘋果之家亦設有蘋果商品專賣區，內裡陳列嘅蘋果主題商品高達約1,200種；另外仲有輕食、喫茶區，可以品嚐得到多款精心烹調下所製作嘅蘋果創意料理。同場嘅展示與學習區內，則有展示蘋果種類嘅模型以及蘋果栽培歷史等等關於蘋果嘅知識。弘前市蘋果公園於9月下旬嘅週末會舉辦蘋果豐收節，唔單止可以品嚐蘋果批，仲可以欣賞偶像團體「蘋果少女組」嘅精彩演出。
採摘蘋果季節係8月至11月，入園門票免費，但摘到嘅蘋果以量計價，每公斤為350日圓。如果喺5月初去玩嘅話，正逢蘋果樹開花季節，可以趁機體驗摘花樂趣；如果喺5月底至7月初前往，則可以同工作人員一齊摘走唔需要嘅蘋果，目的係為咗令蘋果樹生長得更好，相當有趣。
景點資訊
- 景點名：弘前市蘋果公園
- 地址：青森縣弘前市大字清水富田字寺澤125
- 交通方式：從JR弘前站搭「ためのぶ號」，車費200日圓。
- 營業時間：09：00～17：00（採摘至16：00）
- 體驗費用：公園門票免費，但摘咗嘅蘋果以量計價，每公斤係350日圓
4. 青森蘋果之里
青森蘋果之里種有1,000多棵蘋果樹，提供35種青森蘋果，係體驗摘蘋果嘅另一好地方。採摘季節係為8月至11月，每人200日圓即可獲得2個蘋果。每年6月底至7月期間，您亦可以選擇摘車厘子，體驗費用係每人1,000日圓，限時1小時任食（小童可享優惠價格）。
景點資訊
- 景點名：青森蘋果之里
- 地址：青森縣青森市田茂木野阿部野1-6
- 交通方式：從JR青森站3號巴士站，搭青森市營巴士嘅中筒井線至田茂木野公民館前站落車，車程約35分鐘。
- 營業時間：09：00～16：00
- 體驗費用：摘蘋果每人200日圓；摘車厘子每人1,000日圓
Comments