正所謂「一日一蘋果，醫生遠離我」，蘋果有益健康就大家都知！如果有食過青森蘋果嘅話，你必定會驚嘆青森蘋果真係好味到魅力沒法擋！
位於日本本州最北面嘅青森，出產品種超過40種，蘋果產量更係佔日本全國一半以上。青森蘋果以味道香甜、口感清脆、外型又夠靚仔而遠近馳名。青森對蘋果嘅熱愛程度，除咗表達喺種植與品嚐蘋果方面，仲瘋狂到推出蘋果吉祥物與蘋果溫泉，用各種方式表達對蘋果嘅熱愛！
點解青森縣的蘋果特別出名？
由於青森縣冬季嚴寒，無任何一種農作物可以承受得到咁惡劣嘅環境，導致青森中部地區農業一片荒蕪。直到明治時代蘋果被引進津輕地區（即現時日本青森縣西部地區），自此之後就成為日本主要蘋果生產地。如果仔細留意，會發現日本蘋果體型比較大隻，青森蘋果嘅重量大多數落喺300g～350g之間。
種植環境得天獨厚
對於蘋果嚟講，青森縣生長環境可以稱得上得天獨厚、氣候涼爽，一年有三個月時間被積雪覆蓋，晝夜溫差極大，以上種種條件，正正就係最適合蘋果種植嘅氣候。青森氣候賦予蘋果明亮鮮豔色澤，而青森岩木山則為蘋果阻擋著由西北吹嚟嘅海風，而且岩木山喺過往多次噴發中帶嚟灰土、為土壤增添礦物質，令到蘋果擁有豐富嘅養分，健康茁壯地生長。
超講究種蘋果過程
除咗栽培環境之外，種植採摘嘅農夫亦都非常重要。青森農夫認真頑固又唔鍾意認輸，其極度保護蘋果嘅個性，津輕方言稱之為「Joppari」，用於形容為每一個蘋果付出無窮心血，不斷追求青森蘋果嘅美味之道，因此能夠成功栽培出一個又一個香甜可口、外型又靚仔嘅青森蘋果。每個蘋果喺收割之前都要經歷多達10個階段，由整枝挑選、施肥、灑藥除草到摘花、摘果，再到到為蘋果上色嘅階段需要摘葉、轉果，直到收成、包袋，將每個蘋果包入紙袋裡面，提升保存性與上色度，非常講究。未被包袋嘅蘋果被稱為陽光品種，因吸收到更多陽光令味道更甜。一連串過程費時11個月，由此可見青森農夫為咗蘋果係幾咁用心勤奮。
青森縣內蘋果名物及景點：有蘋果偶像、蘋果吉祥物、仲有蘋果溫泉？！
其實青森除咗種植同品嚐蘋果，亦有透過其他方面以各種方式表達對蘋果嘅熱愛。
偶像團體「蘋果少女組」
當地偶像團體「蘋果少女組」於2000年出道，每位成員都以頂級蘋果品種命名，目前成員有「土岐」、「王林」、「喬納金」以及「彩香」，以朗朗上口嘅歌曲配搭舞蹈，再透過成員服裝與歌詞推廣宣傳青森蘋果。
黑石市吉祥物「Nyango Star」
日本卡通鼓手「Nyango Star」係青森黑石市嘅吉祥物，造型由蘋果與貓咪融合而成，並擁有精湛打鼓技術，充滿溫厚傻氣嘅外表與打鼓時激動嘅姿態形成強烈反差，因此一度造成轟動，成為大眾討論嘅焦點！
弘前蘋果公園與蘋果批
青森縣弘前市內有多間麵包店販賣蘋果批，遊客們可以趁機品嚐、比較每間蘋果批之間嘅不同之處。另外，當地仲有推出蘋果批地圖，標記多達50幾間麵包店嘅所在位置，等大家可以隨心所欲地尋覓自己鍾意嘅蘋果批。每年櫻花祭期間，店舖更會製作一個長達3米嘅巨大蘋果批，分洪畀賞花人士，等大家欣賞櫻花之餘，仲可以品嚐得到蘋果批滋味。
如果您都係蘋果愛好者，編輯部推薦您前往弘前蘋果公園。園內有多達1300幾棵蘋果樹、一共65種蘋果品種，遊客可以體驗蘋果栽種過程，親手採收蘋果。而喺九月底會舉辦蘋果豐收節，仲會打造巨型蘋果批。
蘋果溫泉
日本有縣市會將香柚、香橙等柑橘類水果放入池水裡面，而喺青森縣，則有機會享受到放滿一大池蘋果嘅幸福溫泉浴。據聞除咗有美容效果，仲可以改善新陳代謝，更重要係喺溫泉裡面放入蘋果的話更有助打造獨特視覺效果，由芳香果香療癒身心。例如平川市南田溫泉酒店就全年都有提供蘋果溫泉，而位於大鰐溫泉區嘅星野集團所屬嘅界津輕亦會喺秋季提供蘋果沐浴。
到青森旅行必食推介！頂級青森蘋果品種介紹
青森縣種植嘅蘋果品種約有50種，當中40種流通日本各地，多數為鮮艷明亮嘅深紅色，少數為淡綠色，如夏綠、黃王和王林等品種。當中相當受歡迎嘅土岐顏色係金黃色，相當與眾不同，成為唔少人心中最愛。另外有部分品種嘅採收時間比多數品種都嚟得早，稱為早生富士，與富士品種相關，而且味道相似。
土岐蘋果
土岐蘋果顏色為金黃色，形狀偏大，重達400g。陽光下會呈現誘人淡粉紅色，果肉多汁酸甜適中，口感清脆。由王林與富士兩種品種培育而成，略帶王林香氣。
喬納金蘋果
喬納金酸甜適中，果身帶經典橙紅帶條紋，味道濃郁；果肉鬆軟多汁，適合新鮮食用或焗成蘋果批。由金冠與紅玉培育而成，收成時期為10月中旬左右。
王林蘋果
果肉綿密，香甜多汁。黃綠色外皮，成熟後會出現啡色斑點，形狀呈長圓形、長圓錐形。由金冠與印度兩種品種培育而成，收成期落喺11月上旬至中旬。
富士蘋果
富士蘋果佔青森蘋果產量50%，肉質紮實多汁，香甜可口，非常受歡迎，收成期落喺11月初左右，常見品種包括如太陽富士、弘前富士。
世界一蘋果
號稱世界最大嘅品種，重達500g，故命名為「世界一」。香味濃郁，略帶酸味，果肉結實多汁，最初喺盛岡種植，而家主要喺青森縣。每個售價約2,500日圓，被認為係世界上最貴嘅蘋果。使用蜂蜜清洗，由元帥和金冠培育而成，收成落喺10月下旬。
大紅榮蘋果
最大特徵為體型巨大，大紅榮可以生長到同小型哈密瓜一樣大，闊度可達9厘米。由於經由青森蘋果農夫採契約栽培，因此數量非常稀少，並多數出口去國外。味道方面香甜可口非常多汁，表皮呈現深紅色，每個售價約為2,500日圓。
津輕蘋果
津輕蘋果非常香甜多汁，口感十分清脆，紅色條紋與橢圓狀令津輕蘋果非常受歡迎，平均重量約300g，由金冠與紅玉兩種品種培育而成，屬早熟品種。每年9月中旬左右收成。
Comments