神奈川縣橫濱港景色迷人，係日本關東好受歡迎嘅人氣觀光景點，而到夕陽西沈入夜後，美景就更加耀眼，變得璀璨動人。橫濱夜景喺日本國內，亦係數一數二咁特別，有精心設計高樓大廈同各種閃閃燈光，令橫濱成為情侶約會嘅其中一個最佳選擇，同時令遊客對橫濱夜景留下深刻印象。
橫濱出名嘅景點，包括大棧橋國際客船碼頭、港未來景觀、橫濱紅磚倉庫以及山下公園等，日頭靚景不在話下，入夜後更會搖身一變成為浪漫約會地點。同時橫濱夜景仲經常出現喺電視綜藝節目或者日劇入面，有機會去睇夜景的話，保證絕對唔會令你失望！今次就等小編為您介紹，橫濱夜景應該要去邊到睇？以及邊度打卡影夜景最靚？
橫濱夜景璀璨耀眼有原因？
橫濱夜景迷人絕非偶然，而係一早已經計算靚景漫步對遊客有一定吸引力，所以官方喺規劃城市時，一早就特別考慮到點樣打造景觀。橫濱港一帶利用燈光設計、加上大海倒影同互補設計，令橫濱城市整體成為一個著名地標。橫濱港獨特建築配搭，由古色古香紅磚倉庫、工廠至現代玻璃塔等等構成橫濱獨特又令人注目嘅夜景。唔同建築物嘅形狀、顏色創造出各式各樣嘅組合，令人由各種角度都可以欣賞到唔一樣嘅橫濱景緻，所以夜晚喺橫濱港散步，可以享受到非一般嘅樂趣。
精選五大橫濱夜景
1. 港未來
港未來係一個好有魅力嘅海濱，顧名意義，就係指「未來港口」，嚟呢度睇夜景，絕對唔會失望。原本呢個地域係造船廠，經過重新開發之後，而家呢個區域有齊大型購物中心、戲院、酒店同餐廳等設施。最值得一提嘅係「橫濱摩天輪Cosmo Clock 21」，摩天輪璀璨耀眼嘅程度，絕對唔會輸比其他摩天大廈，而且更會一直開燈至晚上10點，橫濱頭號地標當之無愧！其他地標仲有曾經係日本最高大樓、名為Land Mark嘅地標塔，以及天文台以及外表以船為造型嘅洲際酒店（InterContinental Yokohama Grand）。
遊客嚟到呢到除咗可以散步外，仲有好多景點可以玩。例如萬國橋就係一座古老水泥拱橋，您喺橋上可以欣賞水中倒映出美景；橫濱港未來萬葉俱樂部亦係相當受歡迎嘅景點之一，您可以喺度浸浴放髮一下，而登上9樓觀景台的話，仲可以一邊睇景一邊浸足浴，行到攰時就正好嚟呢度休息舒緩下。場內引用湯河原以及熱海嘅溫泉泉水，最適合一邊享受溫泉一邊睇橫濱絕美景色。除咗就咁浸溫泉外，亦可以選擇喺到住返晚、慢慢嘆！
景點資訊
- 名稱：橫濱港未來萬葉俱樂部
- 地址：神奈川縣橫濱市中區新港2-7-1
- 交通方式：乘搭港未來線至「馬車道站」或「港未來站」，位處橫濱合味道紀念館（即日清泡麵博物館）對面，靠近橫濱摩天輪Cosmo Clock 21
2.橫濱紅磚倉庫
橫濱紅磚倉庫其實亦屬港未來地區嘅一部分，但呢度最令人印象深刻嘅，就係紅磚倉庫同璀璨繽紛嘅高樓建築形成強烈鮮明對比。英式風格紅磚倉庫建築經常會出現喺電視、電影場景之中，其實呢座建築最初係用於海關檢查，而家就變成購物中心、餐廳以及定期舉辦活動嘅場地。夜晚喺燈光照射之下，營造出溫暖柔和嘅色調，到咗冬天時就更賞心悅目。遊客可以漫步穿越倉庫廣場，探索紅磚倉庫，仲可以由附近嘅紅磚公園眺望靚景。
景點資訊
- 名稱：橫濱紅磚倉庫活動廣場
- 地址：神奈川縣橫濱市中區新港1-1
- 交通方式：乘搭港未來線至「馬車道站」或「港未來站」，位於相連島嶼東南側。
3. 地標塔空中花園
地標塔空中花園（SkyGarden, The Landmark Tower）下面就係大大個令人歎為觀止嘅橫濱全景，係欣賞橫濱港夜景嘅最佳地點。空中花園位於69層樓高，身處內裡時有如君臨天下、高過哂周圍嘅大廈，可以俯瞰成個橫濱港嘅璀璨夜景。喺咁特別嘅角度睇夜景，真係會影相影到停唔到手呀！呢度仲有一間「天狼星天空酒吧」，可以一邊用餐，一邊享受外面嘅一流美景。唔用餐，亦可以單買觀景台門票入場。
景點資訊
- 名稱：空中花園
- 地址：神奈川縣橫濱市西區港未來2-2-1 橫濱地標塔
- 交通方式：乘搭JR根岸線或橫濱市營地下鐵藍線至最近車站「櫻木町站」；或乘搭港未來線至港未來站。
- 營業時間：10:00 - 21:00 （部分日子延後至 22:00）
- 門票：成人 1000 日圓、高中生及65歲以上人士 800日圓、小童 200日圓（可透過JTB 線上提前購買折扣票，入場可省100日圓。）
4. 大棧橋碼頭
大棧橋碼頭外觀有如從水面伸延出來，因此亦係當地另一大獲好評嘅特色建築以及絕佳觀景地點。碼頭現時作為橫濱主要客輪碼頭，隔住大海與紅磚倉庫遙遙相望，其設計源自國際設計競賽得獎作品，並出自獲獎「Foreign Office Architects」建築師事務所手筆。傾斜草皮觀景台、木造隧道結構，多張休憩長椅，想要悠遊咁欣賞橫濱景色的話，呢度係一個絕徍選擇。您仲可以喺到眺望到「國王」、「皇后」、「傑克」三塔，即係「神奈川縣廳」、「橫濱海關」、「橫濱市開港紀念會館」，一眼飽覽港未來璀璨燈光。
※小編按：呢到亦係日劇《大叔的愛》內，黑澤武藏向老婆求婚嘅訂情地喔～
景點資訊
- 名稱：大棧橋國際客船碼頭
- 地址：神奈川縣橫濱市中區海岸通1-1
- 交通方式：乘搭港未來線至最近的「日本大道站」
5. 漫步汽車道
跨海行人道由橫濱最繁華區域一直延伸到適合休閒活動嘅海濱旁，喺呢條步道散步，慢慢細看橫濱景色，相當浪漫！其實呢條漫步路，係利用日本國鐵1911年建造嘅鐵路路線部分，再喺上面設置木板，令行人更加易行。推薦睇景路線為由帆船日本丸開始欣賞繽紛璀璨燈飾，經由汽車道上鐵橋，再前往運河公園，仲可以一路散步至象鼻公園，就可抵達大棧橋碼頭，再繼續行就抵達紅磚倉庫。
景點資訊
- 名稱：汽車道
- 地址：神奈川縣中區新港2-9
- 交通方式：乘搭JR根岸線或橫濱市營地下鐵藍線至最近車站「櫻木町站」，起點為日本丸紀念公園。
上天下海欣賞橫濱夜景
除咗去指定景點外，您仲可以上天下海咁眺望遼闊橫濱夜景！推薦以下幾個活動體驗，保證可以打造一個令人難忘夜晚，非常經典浪漫。
橫濱 Sky Cruise（空中巡航）
想要盡情享受浪漫海港夜景，不妨可以考慮選擇搭直升機，嚟一趟「橫濱空中巡遊」，打造一場難忘浪漫夜晚！乘客可以選擇日落時分享受短暫「皇后之旅」（約5分鐘）或入夜後「國王之旅」（約5分鐘），想要搭耐啲嘅話，更有長達10分鐘嘅「黃金之旅」，提供最頂級夜景體驗之旅，喺空中俯瞰一整片美輪美奐嘅景色。皇后之旅收費為28,000日圓、國王之旅為42,000日圓、黃金之旅則為55,000日圓。另外亦設有私人包機，造訪江之島或東京等較遠程嘅飛行路線。
景點資訊
- 名稱：港未來臨時直昇機停機坪
- 地址：神奈川縣橫濱市西區港未來1-7
- 交通方式：乘搭港未來線至最近「港未來站」或「新高島站」，位在臨港公園。
- 營業時間：僅於週末假日提供飛行航程，部分平日亦有可能營業。
- 票價： 28,000日圓～55,000日圓。
橫濱市夜景巡航＆工廠叢林夜景巡航
想由海面欣賞橫濱璀璨燈光，可以由鄰近紅磚倉庫嘅紅磚港口乘搭逢週末出發嘅遊輪欣賞著名景點。景點名單包括橫濱三塔、紅磚倉庫、橫濱海灣大橋、紅燈塔以及港未來景緻，船上仲有飲品同零食提供。
仲有一項比較特別嘅行程，就係可以探索夜晚工廠夜景。工廠夜晚運作時，會點亮燈光並打造出有別於一般夜景嘅風光。另類乘船遊覽，相信會係為您帶來前所未見景色體驗！喺橫濱工廠繽紛燈光照射下，您更會感受到夜晚活力生機，透過夜景觀察出工廠運作之複雜呢。船班航行時間約90分鐘，沿途亦可欣賞到港未來景色。門票仲包咗一杯flare-stack無酒精雞尾酒飲料，貼心助您悠閒品嚐飲品，一邊欣賞眼前嘅特別夜景。
2種行程均由Reserved Cruise營運，僅於週末出發，請事先確認舉辦時間。
景點資訊
- 名稱：Reserved Cruise
- 地址：神奈川縣橫濱市西區北幸2-15-1 東武橫濱第2大樓 7F
- 交通方式：乘船地點位於紅磚港，請先乘搭港未來線至「日本大道站」。
- 營業時間：依季節船班出發時間而異，詳情請參考官網
- 船票:
- 橫濱市夜景巡航：成人2,500日圓、小學生1,500日圓。
- 工廠叢林夜景巡航：成人4,600日圓、3-11歲小童2,300日圓。
橫濱纜車「YOKOHAMA AIR CABIN」
全新開幕嘅「YOKOHAMA AIR CABIN」空中纜車，直接連接櫻木町站與港未來，係另一從空中欣賞橫濱景色嘅新蒲點！纜車總長630米、高40米，於2021年開始運行；纜車路線將經過橫濱太空世界Cosmo World、HAMMERHEAD以及紅磚倉庫。直達橫濱最熱鬧繽紛嘅中心地區，仲係絕佳夜景觀覽景點。單程票1,000日圓、來回票1,800日圓，纜車起點站同終點站都可以買到飛，但纜車現時營運只行駛至晚上8點，想搭就要趁早。
景點資訊
- 名稱：YOKOHAMA AIR CABIN
- 地址：神奈川縣橫濱市中區櫻木町1-200
- 交通方式：乘搭JR根岸線或橫濱市營地下鐵藍線至「櫻木町站」，JR櫻木町站東口徒步1分鐘，橫濱市營地下鐵藍線櫻木町站北1口徒步1分鐘。
- 營業時間：10:00 - 20:00
- 門票：成人單程 1,000 日圓、來回 1,800日圓，小童單程 500 日圓、來回 900日圓
Comments