坐擁紅磚倉庫、日清杯麵博物館「合味道紀念館橫濱」等等設施嘅遊客熱點「橫濱港未來21新港區域」自2021年起再添加一項全新設施「YOKOHAMA AIR CABIN」，令橫濱從此變得更好玩！原本由櫻木町站行去以上觀光設施，路途可能比較遙遠，但全新纜車落成後，就可以唔使再用雙腳行，而係直接帶你「空中散步」5分鐘直達港未來區域，絕對係懶人福音～
日本首座 世界最新都市型循環式纜車「YOKOHAMA AIR CABIN」
「YOKOHAMA AIR CABIN」全長約630米，單程行車約5分鐘，就可以由櫻木町直線前往港未來人氣設施「YOKOHAMA WORLD PORTERS」。纜車車站僅設有兩個站，分別為「櫻木町站」以及位於新港地區入口嘅「運河公園站」，並由上空纜車車廂一架接一架往來循環行駛、中途不停站。與其話係交通設施，反而比較似遊樂設施，剩係搭續車就已經令人非出發先興奮！
從JR櫻木町站東口出站後，即可見到上圖呢棟時尚2層高建築物，上面大大寫著「YOKOHAMA AIR CABIN」，亦即係櫻木町站纜車車站。
售票處同登車位置都係位於2樓，除咗有售票員窗口外，亦設有自動售票機並輔設英文等外語顯示。門票上印有QR碼，過票口閘門時只需掃描QR碼即可入場。小編就覺得，纜車站設計甚至有啲似機場，好似「出發 Departures」指示牌咁，入閘一刻起就令人非常期待「升空」之旅！
登上纜車後，大概5分鐘就能夠抵達運河公園站，亦係前往新港地區各項觀光設施嘅中心點，可以話係新港地區入門玄關，出入新港地區相當方便。
乘搭纜車的話，由運河公園站步行至紅磚倉庫、YOKOHAMA HAMMERHEAD、橫濱太空世界(YOKOHAMA COSMO WORLD)、合味道紀念館橫濱等設施都唔會太遠，為各位旅客大幅縮短移動時間之餘，仲可以順便體驗全新移動方式，真係一舉兩得！如果落雨，或者身體狀態唔好、行到攰等情況，搭纜車都不失為一個好選擇。
「YOKOHAMA AIR CABIN」 5分鐘悠閒空中散步
「YOKOHAMA AIR CABIN」最大特色就係約5分鐘車程將橫跨橫濱港未來高空，帶領乘客踏上一趟悠閒空中漫步。新設施係日本首座連接高樓大廈之間嘅都市型循環式纜車，從纜車車站附近可見纜車車廂跨馬路、行人路等景色，而纜車最高點更高約40米，安坐纜車入面即可以從40米上空俯望港未來美景！
一團人一個車廂 車廂內空間舒適
「YOKOHAMA AIR CABIN」車廂限8人乘搭，最多有36輛車廂同時運行。車廂整體以玻璃製造，方便各位由空中360度欣賞港未來景色；而乘搭時，工作人員亦會以團體為單位引導排隊人士，因此各位可放心唔需要同陌生人一齊搭車，可以更自在地好好體驗纜車時光。
車廂內設有冷氣，就算係炎熱夏天亦無須擔心，可以清涼舒適咁享受纜車之旅。車站環境同車廂更採用傷健人士都方便使用嘅無障礙空間設計，就算推BB車或者坐輪椅人士都無需擔心。
營業至夜晚 觀賞夜景最佳搖滾區！
橫濱夜景遠近馳名，大約由黃昏時分開始，位於港未來嘅各項設施就會變得燈光璀璨， 剎那間景色變得浪漫夢幻。因此識揀嘅，一定係揀夜晚時間搭纜車，先可以由空中角度欣賞到與日頭時間截然不同嘅夜景！「YOKOHAMA AIR CABIN」營業至晚上，為各位提供充足時間欣賞港未來浪漫夜景，因此小編相信好快就會成為全新約會聖地，深受情侶歡迎！
車廂本身亦設有燈光照明，記得落車後抬頭回望纜車，為空中之旅留下美好回憶喔。
設施資訊
- 名稱：YOKOHAMA AIR CABIN
- 地址：神奈川縣橫濱市中區新港2丁目1番2號
- 營業時間：10：00～22：00 ※由於縮短營業時間，目前僅營業至20:00為止・最新營業時間請上官網查詢
- 休息：全年無休
- 票價：單程票 成人（中學生以上）1,000日圓、兒童（3歲～小學生）500日圓／來回票 成人（中學生以上）1,800日圓、兒童（3歲～小學生）900日圓
- 交通方式：櫻木町站- JR「櫻木町」站東口徒步約1分鐘／運河公園站- JR「櫻木町」站東口徒步約15分鐘、橫濱高速鐵道港未來線「馬車道」站徒步約7分鐘
Comments