奄美大島係位於九州南部嘅一個島嶼。與沖繩或屋久島相比，奄美大島知名度或者唔名前兩者咁高，但佢嘅靚景絕對一啲都唔輸蝕，喺日本更有「東方加拉帕戈斯群島」以及「距離天堂最近的島嶼」嘅美譽呢。
奄美大島所在位置
奄美位於鹿兒島縣南部，聯同周圍島嶼被統稱為「奄美群島」，係日本列島四個主要大島以外最大嘅群島之一。奄美群島嘅主島為奄美大島，但通常會省略「大島」二字，被簡稱為「奄美」。
從日本國內嘅羽田、成田、伊丹、福岡、關西機場都有航班直飛奄美。從東京出發的話，飛行時間約2小時50分鐘；從奄美飛往東京，飛行時間則只要2小時。
奄美大島絕色海灘
奄美大島嘅海灘被稱為「藍色天使」，湛藍海水與白色沙灘互相映襯，景色美不勝收。部分著名海灘深受遊客們歡迎，不過都仲有更多海灘可以讓人享受有如私人海灘般嘅清淨。遊客可以喺奄美大島周圍體驗潛水、滑浪或浮潛，欣賞海龜同魚群，各適其適。
相關文章：精選奄美大島11個絕美海灘
奄美大島優美山景
除咗海灘，奄美大島仲有群山都係必睇！奄美大約有85％面積屬於山區，您可能會發現奄美巒山同喺日本其他地區見到嘅唔太一樣—事實上，日本山上嘅樹木大部分都係經過人工種植（例：杉木。杉木木材加工方便，種植技術亦比較簡單），因為日本人喺日常生活中會使用大量木材，因此砍伐同時亦需要種植杉木；奄美居民雖然都會砍樹，但就唔會種樹，而係讓樹木自然生長、恢復，以維持大自然生態平衡。
宗教信仰文化及神聖地方
奄美至今仍然保留住眾多日本原始宗教信仰。例如當地有被稱為「ノロ（noro）」嘅女祭司與「ユタ（yuta）」嘅巫女嘅神職人員，又有部分通往村莊嘅路被稱為「神之道」（神の道）。「神之道」嘅意思即係「神的街道」，專為神靈而建。除此之外，奄美當地村莊亦設有「相撲場」，呢到講嘅「相撲」並唔只係一項運動，而係日本神道儀式嘅一部分。
奄美仲有更多神聖地方並唔會出現喺坊間旅遊書，正受到「ノロ（noro）」與「ユタ（yuta）」保護。
奄美大島推薦景點
奄美有好多靚景其實都係「無名氏」，亦有部分地方係遊客造訪之後先被命名。以下就為你介紹幾個深受外國遊客喜愛嘅景點！
奄美必去：AYAMARU岬
Ayamaru岬（あやまる岬）係奄美最著名嘅景點，距離奄美機場只有8分鐘車程。從小山丘上嘅展望台望出去，左手邊係笠利崎、正面係太平洋、右手邊係土盛海岸。將大海、珊瑚礁同太平洋靚景一網打盡完全不是夢！海角附近有一個公園，遊客可以順便游水或打高爾夫球。
景點資訊
- 名稱：AYAMARU岬（あやまる岬）
- 地址：鹿兒島縣奄美市笠利町大字須野682
- 交通方式：從奄美機場巴士乘搭開往「佐仁」之巴士，於「AYAMARU岬（あやまる岬）」落車後徒步約3分鐘。
奄美必去：土盛海岸
土盛海岸係奄美堪稱景色最靚、最享負盛名嘅海灘，距離奄美機場只有7分鐘車程。
景點資訊
- 名稱：土盛海岸
- 地址：鹿兒島縣奄美市笠利町宇宿
- 交通方式：從奄美機場乘搭開往「佐仁」之巴士，於「土盛站」落車後徒步約5分鐘。
奄美必去：原始紅樹林
奄美大島住用町內至今仍然保留著原始紅樹林，遊客可以參加紅樹林獨木舟體驗行程。紅樹林距離奄美機場約70分鐘車程，您亦可以從機場搭巴士前往。
景點資訊
- 名稱：原始紅樹林
- 地址：鹿兒島縣奄美市住用町石原
- 交通方式：於「名瀨West Court前」巴士站乘搭開往「古仁屋」方向之巴士，於「紅樹林公園前」落車。
奄美大島正式被列入世界自然遺產！
2021年7月26日，聯合國教科文組織（UNESCO）世界遺產委員會舉行會議，正式決定將日本鹿兒島縣奄美大島、德之島，以及沖繩縣沖繩本島北部與西表島森林等地列入世界自然遺產，成為繼鹿兒島縣屋久島、青森縣・秋田縣白神山地、北海道知床，東京都小笠原群島後，日本國內第5處世界自然遺產！
Comments