日本時代已從平成走到令和，隨著天皇陛下世代交替，年號（日本獨特制度，象徵君主在位期間）亦隨之變更。例如現時每年固定日本公眾假期之一、4月29日「昭和之日」當中嘅「昭和」，就曾經都係年號之一。至於「昭和之日」到底係一個點樣嘅假日呢？就等我哋一齊嚟睇睇「昭和之日」嘅由來與歷史啦！
關於「昭和之日」
被訂為公眾假期嘅「昭和之日」，旨在期許「回顧經歷動盪後經濟復甦嘅昭和時代，並思索國家未來」。昭和時代（西元1926年～1989年）第二次世界大戰開打，廣島、長崎被投放原子彈，對日本而言係一個非常困苦艱難嘅時期。其後戰爭結束，日本慢慢復甦，經歷高度經濟成長期之下，最終經濟先得以發展顯著成長。
「昭和之日」曾經係天皇誕生日
實際上「4月29日」曾經改過3次名，到咗第4次先被固定為現時嘅「昭和之日」。「天皇誕生日」前身為「天長節」，直至1948年7月「關於國民假日之法律」頒布並即日生效後，由於4月29日屬於昭和天皇生日，因此就被稱為「天皇誕生日」。1988年昭和天皇駕崩後，為紀念愛好自然嘅昭和天皇曾經為一名生物學學者，天皇誕生日亦隨之更改並重新命名為「綠之日」。其後再歷經18年到2007年，為使國家於第二次世界大戰戰敗後經歷經濟復甦、充滿激烈動盪嘅昭和時代不被國民遺忘，於是政府又將4月29日改為「昭和之日」。
「昭和之日」係大型連假嘅開始！
每年4月底至5月上旬，都係日本「黃金週」大型連續假期，而4月29日「昭和之日」就屬於黃金週第一日。除咗「昭和之日」之外，黃金週內亦有5月3日「憲法紀念日」、5月4日「綠之日」以及5月5日「兒童節」等多個公眾假期呢。
睇到呢到，心水清嘅讀者可能會問：「『綠之日』唔係被取消咗咩？點解又變咗做5月4日？」。原因就係，原本4月29日「天皇誕生日」本來應該係平日，但如此一來黃金週假期日數就會比以往更短，考量到對國民生活會帶嚟影響，因此日本政府就專程將「綠之日」作為公眾假期保留；一方面，隨著名稱變更，2007年起「綠之日」被移動至5月4日，啱啱好夾喺5月3日「憲法紀念日」及5月5日「兒童之日」中間，形成連續假期。
國營昭和紀念公園於「昭和之日」開放免費入場
為紀念昭和天皇在位50年，橫跨東京都立川市與昭島市嘅知名景點國營公園「昭和紀念公園」於1983年開園營業。將近180公頃嘅寬敞遼闊腹地內，設有各式各樣設施並分為免費區域與付費區域，適合春天賞櫻、秋天眺望紅葉。每年嘅「昭和之日」，付費區域都會開放公眾免費入場，咁啱呢一日會喺東京嘅讀者記得要把握機會！
Comments