想要出發一趟南九州之旅、欣賞自然風光明媚，盡情品嚐當地美食之餘再嘆個靚溫泉…但又唔想成日忙著「趕行程」咁東奔西跑？FUN! JAPAN推薦您乘搭來往九州鹿兒島中央站與指宿站之間嘅「指宿之玉手箱」觀光列車，將交通時間轉化成旅遊時光，移動嘅同時順便欣賞沿途風光，令您嘅旅程計劃更靈活更精彩！即刻跟著小編搭上JR九州「指宿之玉手箱」，前往鹿兒島薩摩半島南端擁有著名砂蒸溫泉嘅「指宿」，享受一個悠閒南九州之旅吧。
關於「指宿之玉手箱」
「指宿之玉手箱」觀光列車係以流傳於薩摩半島嘅龍宮傳說為主題所設計嘅觀光列車。每日3個班次來往鹿兒島中央站與指宿站之間，由兩節車廂編制而成，所有座位都係指定席（須劃位預約），從搭車前1個月就開始開放訂位。車程約50分鐘，朝著薩摩半島南方前進期間，沿途可以眺望錦江灣與櫻島美景。
「指宿之玉手箱」列車名稱取自於日本童話故事《浦島太郎》傳說。《浦島太郎》故事內容係描述漁夫浦島太郎，因為出於善意地救咗一隻烏龜，烏龜獲救後為咗報恩決定帶浦島太郎去海底龍宮一遊。浦島太郎去到龍宮後受到熱情款待，每日嘆盡山珍海味，突然有一日浦島太郎開始思念起家鄉父母，於是決定啟程返去家鄉。臨走前龍宮公主送咗一個寶盒（日文：玉手箱）畀浦島太郎，並且千叮萬囑浦島太郎唔可以打開。但係無諗過浦島太郎返到岸上發現人事已非，原來喺龍宮幾日等於人間幾百年，面對咁大嘅改變，浦島太郎亦忍唔住一時情急之下將玉手箱打開，結果冒出一縷輕煙，浦島太郎瞬間變成白髮蒼蒼嘅老翁。據聞《浦島太郎》傳說中嘅多個景點就係發生喺指宿呢個地方，而「指宿之玉手箱」正正就係以《浦島太郎》為背景去設計打造出嘅觀光列車。
指宿之玉手箱特色①：大膽黑白雙色車身設計，營造歡樂搭車氣氛！
傳說中浦島太郎喺打開玉手箱之後，因為玉手箱冒出嘅煙霧而變老，黑髮即時變成白髮，因此「指宿之玉手箱」觀光列車嘅概念就係「黑髮變白髮」，將車身設計為黑白雙色非常大膽前衛。喺搭車嘅時候車門嘅上方仲會噴出水霧，就好似打開玉手箱時冒出嘅縷縷輕煙，營造出歡樂氛圍。
指宿之玉手箱特色②：獨特車廂裝潢設計 吧檯座位可以欣賞面海觀景
車廂整體採用溫暖木質空間設計嘅風格，希望乘客可以度過一個舒適嘅搭車時光。除咗坐得舒適，亦設置面向海景嘅吧檯座位以及公共開放空間內嘅梳化位，書架上亦擺滿關於指宿嘅書，可以喺車裡面一邊睇書，一邊欣賞海景，更顯得悠哉悠哉。
指宿之玉手箱特色③：鹿兒島視覺味覺大滿足
從車窗眺望出去嘅優美景色亦係「指宿之玉手箱」一大特色。列車行駛中會穿梭過鹿兒島市區街景，天氣晴朗嘅話，仲可以遠望得到鹿兒島嘅象徵「櫻島」，眺望錦江灣蔚藍嘅海景令人大飽眼福！鐵路沿線以及列車行經嘅車站，仲會遇上當地居民都會向著列車熱情揮手歡迎，親切嘅互動更加係「指宿之玉手箱」觀光列車之旅程嘅一大樂趣。另外，「指宿之玉手箱」裡面有提供甜品、飲品等多款當地美食嘅車內販售，仲可以買到唔少限定商品，而且係只有搭「指宿之玉手箱」特急觀光列車先可以買得到喔。為咗令乘客有個美好搭車回憶，仲會免費贈送乘車紀念嘅明信片，請車內員工幫您印返個印章，就可以帶返屋企做紀念。
言靈服務傳遞心意！
車廂內有一個玉手箱，可以喺紙仔上面寫低自己想傳達嘅心意，放入玉手箱之後，有機會遇上車上職員用車內廣播幫您讀出，傳達心意喔！
再續「指宿之玉手箱」之旅：抵達終點「指宿」後必玩行程
乘搭「指宿之玉手箱」抵達終點站「指宿」後，記得再要試埋「砂蒸溫泉」。「砂蒸溫泉」即係利用沙灘所湧出嘅溫泉去加熱沙粒，非常罕有少見，就好似天然嘅桑拿，推薦您一定要去體驗一番。
除咗砂蒸溫泉之外，亦推薦您去一趟龍宮神社。龍宮神社位於浦島太郎出發去龍宮城嘅海角，據聞喺貝殼上面寫低自己嘅願望供奉於神前，就可以獲得神明庇佑。
- 更多關於指宿嘅旅遊資訊：https://www.ibusuki.or.jp
- 更多關於指宿砂蒸溫泉嘅介紹：【日本鹿兒島】九州溫泉攻略！鹿兒島縣指宿溫泉出發前4大須知
如何購買「指宿之玉手箱」車票
如果想要購買「指宿之玉手箱」觀光列車特急券嘅話，可以喺JR售票處「綠色窗口」或者從JR九州訂票網站上購買。
鹿兒島中央至指宿西大山站嘅區間，可以用比較實惠嘅價格去購買購買「JR來回」或「單程JR+單程路線巴士」嘅「指宿鐵路＆巴士套票」，來回票價為3,150日圓。不過最抵玩始終係購買可以無限次任搭嘅周遊券！
博多出發行程時間與班次
08：30 博多站九州新幹線瑞穗號601號 → 09：46 抵達鹿兒島中央站 → 09：56「指宿之玉手箱」1號 → 10：47 抵達指宿站
列車資訊
- 指宿之玉手箱 特急觀光列車
- 行駛區間：鹿兒島中央站～指宿站
- 行駛班次：每日3班來回
- 搭車所需時間：約50分鐘
- 票價：單程2,180日圓
- 官網：https://www.jrkyushu.co.jp/chinese/train/ibutama.html
Comments