無論係北海道嘅螃蟹，抑或係山口縣嘅河豚，去日本食海鮮、嘆壽司絕對係大部份遊客嘅指定動作！日本每個都道府縣都有屬於當地特色嘅海鮮美食，今次小編就精選出幾個地區嘅必食海鮮心水清單，大家記得Mark低，以後去日本「覓食」時就可以大派用場！
北海道：螃蟹種類大集合
講到北海道美食，又點可以唔提鮮甜又夠分量嘅「螃蟹」！北海道擁有優越地理位置，鄂霍次克海與太平洋寒冷嘅海水，造就完美環境畀螃蟹生長。北海道著名螃蟹產地有廣尾、釧路與雄武，每逢螃蟹捕撈旺季就變得非常忙碌。
俗稱為「北海道蟹」嘅螃蟹種類相當豐富，毛蟹、鱈場蟹、松葉蟹等等都相當受歡迎，當中價位最貴嘅非鱈場蟹（帝王蟹）莫屬！港人鍾意去北海道，其中一個原因就係為咗要怒食螃蟹，小編即刻為大家送上各種螃蟹嘅盛產時間－
- 毛蟹：4月至8月、11月至12月
- 鱈場蟹（帝王蟹）：9月至1月
- 松葉蟹：11月至3月
- 花咲蟹：8月至10月
無論係，抑或係製作成新鮮海鮮丼，味道堪稱一絕！
相關文章：【日本美食】日本冬季必食美食之一「蟹」！精選日本6大名蟹
秋田：醃製日本叉牙魚
「叉牙魚（ハタハタ / ha-ta-ha-ta）」又稱為鰰魚，每逢日本叉牙魚嘅豐收季節，就知道冬天嘅腳步已經悄悄來臨。
日本叉牙魚係秋田縣縣魚，魚肉清淡鮮美。除咗可以切成刺身生食之外，調理方式仲有燒魚，鹽漬、甚至作為火鍋配料都相當鮮甜美味。由於可以捕獲日本叉牙魚嘅冬季時間就只有短短幾個星期，因此秋田傳統習俗會將叉牙魚醃製保存，製成叉牙魚壽司。將用醋或鹽醃製過後嘅叉牙魚，聯同白飯、米麹、當地蔬菜等其他食材放入鋪好竹葉嘅木桶裡面，冚上蓋再用重石壓著，經過一段時間發酵之後，秋田縣代表鄉土料理「叉牙魚壽司」即可完成。
另外，秋田縣縣民仲會用叉牙魚製作「鹽魚汁」，再加上日本叉牙魚肉、蔬菜等食材煮成「鹽魚汁鍋」；或者直接為菜式調味，提升食材嘅風味。對於秋田縣民嚟講，日本叉牙魚魚卵亦係一款係極具價值嘅經典食材呢！
富山：螢光魷魚
「螢光魷魚」可以話係富山縣最具代表性嘅海洋生物之一，每一年當中有長達3個月時間都係螢光魷魚嘅時令季節。
螢光魷魚有咩咁大吸引力？平時生活喺深海之中嘅螢光魷魚會喺4月至5月嘅產卵季節游到海面上，試想像一下當您置身夜晚嘅富山，海面呈現著一片螢光魷魚所發出嘅神秘藍色光芒，場景將會係幾咁夢幻！富山縣內有多間餐廳提供螢光魷魚料理，除咗就咁生食之外，仲會有天婦羅，燒烤、水煮等等，無論生食定係煮熟食都咁好味！
神奈川：吻仔魚
「吻仔魚」（香港俗稱「白飯魚」）係神奈川縣代表名產之一。吻仔魚本身並非指一特定魚種，而係混合眾多唔同種類嘅魚幼苗，統稱「吻仔魚」。
4月至12月係吻仔魚當造季節，推薦大家有機會嘅話，一定要親身去一趟神奈川縣靠海嘅湘南、鎌倉一帶，試一試當地著名又新鮮嘅「吻仔魚丼飯」喔。日本人習慣生食，味道略帶海水鹹味～
山口：河豚
河豚（香港俗稱「雞泡魚」）係日本經典美食之一，味道鮮美卻含有劇毒暗藏危機，因此日本提供河豚料理嘅餐廳為咗確保安全，廚師都必需經過多年培訓，仲要通過考試獲得相關認證、技術達到純熟精湛先可以烹煮相關河豚料理。如果嚟到日本想品嚐河豚嘅話，記得要揀信得過、有認證嘅餐廳，確保食得開心又放心喔。
河豚喺歷史上曾經一度被禁止食用，後來最先於山口縣沿海城市下關取消相關限制。時至今日，山口縣成為河豚主要產地，產量比率更佔日本全國80%，而下關亦係品嚐河豚嘅熱門勝地。河豚通常會製作成刺身，而且係切得非常薄呈透明；亦可以用蒸煮、燒烤，或當作河豚火鍋去烹調。河豚有著高雅清淡嘅美味，配搭日本清酒更係一絕，如果有機會嘅話可以試一試以河豚鰭釀製嘅魚鰭酒喔。
愛媛：鯛魚
鯛魚係愛媛縣嘅縣魚兼名產。由於鯛魚嘅日文發音「たい」可以衍伸為「めでたい」，有著祝賀、慶祝嘅含意，所以鯛魚嘅菜式成日都會出現喺日本喜慶或值得慶祝嘅場合裡面。
愛媛縣唔單止盛產鯛魚，當地人民仲好識得食鯛魚。各式各樣食法當中，最常見莫過於鯛魚飯。根據唔同區域，製作方法亦有所差異：例如愛媛中部會放入成隻鯛魚去鍋裡面，連白米一齊煮成鯛魚飯，再以醬油、鹽調味；愛媛南部則會將鯛魚刺身擺滿喺白飯上面，再淋上醬油與生雞蛋所調成嘅醬汁享用。
佐賀：彈塗魚
經常被拎作同鰻魚比較嘅彈塗魚係佐賀縣特產，當造季節落於每年5月至9月。一般煮法為燒烤、製作成蒲燒彈塗魚，日本人通常會趁彈塗魚仲係活生生嘅時候就用竹籤串好，放喺木炭上面燒，再搽上甜醬油燒到發出焦香味。
喺佐賀縣，彈塗魚可以話係「老是常出現」，無論係祭典、居酒屋以及海鮮餐廳嘅菜單，甚至唔少周邊產品都會見到彈塗魚嘅蹤影。彈塗魚雖然有少少其貌不揚，但千祈唔好「以貌取魚」，有機會去到佐賀縣記得要試一試彈塗魚嘅真滋味喔！
Comments