去日本食海鮮係唔少遊客嘅指定動作，講到日本海鮮又點會少得冬季美食代表兼有王者之稱嘅「蟹」！美味程度簡直係令人再三回味。烹調蟹方式非常多元化，無論係以火燒、水煮、或蟹火鍋，甚至炸成天婦羅、製作成壽司等都非常適合，食法相當豐富，令您可以盡情享受「舌尖上的蟹逅」。日本四面環海，沿海各地可以撈到唔少靚蟹，當中捕獲量最高係北海道、北陸、山陰3大區，係著名嘅日本螃蟹產地。今次，FUN! JAPAN編輯部會為大家詳盡介紹著名螃蟹種類、盛產地等資訊，為您下一趟日本蟹季覓食之旅做定功課，隨時都可以展開一場完美「蟹逅」。
日本盛產美味螃蟹嘅地區
日本螃蟹主要有三大產地，分別係北海道、北陸地區以及山陰地區。三大產地之一嘅北海道海鮮豐富、出名食蟹就係人都知，對比之下可能您對北陸地區同埋山陰地區會比較陌生，等FUN!編即刻講您知三大產地相關資訊！
山陰地區係指本州西部，面向日本海一帶地區，多數係指鳥取縣、島根縣及山口縣等面臨日本海嘅地區。當中，鳥取縣同島根縣係著名螃蟹產地，「松葉蟹」、「紅楚蟹」更加係日本海冬季必食靚蟹，新鮮美味遠近馳名。
北陸地區多數係指日本西邊嘅福井縣、富山縣、石川縣。面向日本海而且海水平穩寒冷，得天獨厚嘅地理位置，令到棲息於此嘅螃蟹肉質更加飽滿、鮮甜味美。北陸地區天然資源咁豐富，自然可以捕獲到鮮甜又美味嘅高等級靚蟹，例如：石川縣嘅「加能蟹」、福井縣嘅「越前蟹」等等。
由於北海道被日本海、太平洋、鄂霍次克海包圍，因此海產資源相當豐富，自然可以喺當地品嚐到新鮮海產。亦有各式各樣嘅甲殼類生物棲息喺北海道附近海域，當中「螃蟹」更獲得「冬季美食王者」嘅美譽，美味程度令人一食永難忘！
鱈場蟹（帝王蟹）
螃蟹品種琳琅滿目，多到數都數唔清，最出名莫過於有螃蟹王者「帝王蟹」之稱嘅「鱈場蟹」。大隻又鮮紅嘅帝王蟹，令人一諗起就食指大舉，流晒口水！而且體型龐大，最大全長可超過1米，棲息於水溫寒冷嘅海域，主要產地係鄂霍次克海。日本市場上販賣嘅帝王蟹多由俄羅斯入口嘅鱈場蟹，日本國內只有喺北海道先可以捕獲到鱈場蟹。
位於北海道最北面嘅漁港「稚內港」係可以捕獲到最多鱈場蟹嘅漁港，非常出名。其實新鮮捕撈上岸嘅鱈場蟹蟹殼係呈現暗啡色，當喺煮熟之後，蟹殼就會變成豔麗鮮紅色，內裡呈現白色，由於紅白雙色象徵吉祥好意頭，經常成為送禮首選，更加係日本正月新年喜慶洋洋時節必食嘅經典美食之一。FUN!小編溫馨提示，如果想食到最肥美鮮甜嘅鱈場蟹嘅話，記得揀喺4月～6月同11月~2月，呢2個期間去北海道覓食喇～
油蟹
油蟹主要分佈喺日本海、白令海、鄂霍次克海海域，蟹殼寬闊度約有20cm，同鱈場蟹相比，算係尺寸比較偏細嘅螃蟹，可以捕獲到油蟹嘅時期比鱈場蟹長，價格亦都比較親民，雖然味道略輸鱈場蟹一籌，但如果係新鮮即撈嘅油蟹，食落口感非常好兼且味道極鮮，感覺同鱈場蟹差唔多，推薦畀想慳住荷包又可以大量食滋味靚蟹嘅你！
松葉蟹
松葉蟹嘅公蟹比起鱈場蟹，亦算係體型偏細，將成隻蟹腳打開最多亦只有70cm左右。多數分布喺日本海海域，主要棲息於水深200m～400m嘅深海。
松葉蟹特色在於蟹肉非常鮮甜而且蟹膏既濃郁又綿密，當享用完生蟹肉或水煮蟹嘅蟹肉之後，推薦可以用蟹膏煮成其他美食，趁機品嚐另一種美味。例如可以煮成雜炊、燉煮美食、甚至搭配牛油焗烤菜式、或者炮製成意大利粉醬汁亦同樣出色。
另外，松葉蟹公蟹同母蟹嘅名稱，會依照所捕獲嘅產地唔同叫法亦會有所不同，例如：京都、兵庫、鳥取捕獲到嘅公蟹稱為「松葉蟹」；北陸地區所捕獲嘅公蟹稱為「越前蟹」。而母蟹稱為「香箱蟹」（セコガニ、コウバコガニ）、「親蟹」（親ガニ）、「帶卵螃蟹」（子持ちガニ）等，有非常多蟹卵同濃郁美味嘅蟹黃蟹膏，令人一食就上癮！11月至3月呢段期間可以食到最美味嘅松葉蟹，係日本冬季必食嘅經典美食之一。
毛蟹
毛蟹，又叫做「大栗蟹」，蟹殼全身都覆蓋著毛，同其他種類嘅螃蟹相比，體積尺寸細隻好多，一般毛蟹重量大概400g～600g左右，尺寸比較大嘅毛蟹重量最多亦只有700g～900g左右。如果喺網上購買嘅話，通常會寫上重量、價格等級出售。
相比起之前介紹嘅品種，雖然價格比較平，但美味程度一啲都唔輸蝕，稱得上係日本菜式中嘅頂級海鮮美食！毛蟹體型細細但蟹肉飽滿，味道濃郁，唔單止可以食到大量味美濃郁嘅蟹膏，蟹殼仲可以用嚟熬湯，非常滋味！推薦食完蟹肉之後，留低蟹殼去煲湯，甚至用嚟煮味噌湯或雜炊，由外至內徹底品嚐毛蟹嘅美味，一蟹多食非常過癮！
花咲蟹
花咲蟹產地主要喺北海道根室，只有喺北海道東部嘅部分地區先可以捕獲得到，係非常稀有珍貴嘅螃蟹品種，堪稱「夢幻螃蟹」。雖然喺分類上屬於鱈場蟹科，但蟹殼寬闊度同長度只有15cm左右，體型相當細小，煮完之後殼嘅顏色就好似鮮豔花朵盛開一樣艷紅，再加上捕撈上岸嘅漁港名稱嘅緣故，所以被稱為「花咲蟹」。
根室市往年喺8月至9月適逢花咲蟹盛產季時，仲會為咗慶祝而舉辦「根室螃蟹祭」，可以品嚐到水煮螃蟹同以花咲蟹所烹調嘅各種美食。
高腳蟹
高腳蟹，又稱為甘氏巨螯蟹，係棲息於日本近海深海嘅巨型螃蟹。體型巨大到左右蟹腳完全打開後寬闊度居然有成4m咁多，喺甲殼生物中嘅體積更加係世界之首。由於通常棲息喺深海裡面，加上烹煮難度高，令高腳蟹成為相當珍貴嘅精緻美食。
靜岡縣面對駿河灣嘅戶田地區就係日本盛產高腳蟹地區，去到當地有唔少餐廳同專門店，可以品嚐到高腳蟹蟹肉剌生同水煮高腳蟹等美食。
享受日本美味螃蟹美食
想要盡情享受螃蟹嘅美味，螃蟹品種同料理方式亦係一門學問。
帝王蟹「鱈場蟹」體型大、蟹肉充滿彈性且非常飽滿，推薦以最單純嘅方式去品嚐肥嫩蟹肉！例如：火燒、水煮，或搭配蔬菜、豆腐，嘆返個螃蟹火鍋。而濃郁鮮甜嘅「松葉蟹」唔單止可以水煮，新鮮捕獲嘅話亦非常推薦直接生食。
另外，日本食蟹唔單止淨係食蟹肉，充滿層次嘅「蟹膏蟹黃」更加係唔少「蟹癡」嘅心頭好！體積細細、價格實惠嘅毛蟹擁有飽滿美味嘅蟹膏、蟹黃，直接食就已經相當美味，或者將蟹膏放入蟹蓋，再加些少蟹肉放入焗爐焗一焗，或者放上燒烤架燒一燒，即場嘆返個「甲羅燒」，簡直幸福滿載！當然，炮製成火鍋、煮成蟹肉意粉、牛油焗蟹等食法亦相當推薦。
食剩嘅蟹殼記得要留低拎去煲湯，將蟹同海洋精華融入湯頭裡面，相當滋味！亦非常適合拎去煮火鍋、雜炊、味噌湯，鮮甜美味令人回味無窮～
Comments