就算係以白米為主食嘅日本，都有唔少人會喺早餐時段選擇食多士。今次我哋要介紹嘅係，令您每日早晨變得好味又有活力嘅簡單多士食譜！

1. 蛋黃醬雞蛋多士

朝早永遠都需要急住出門口，所以早餐一於就整個簡單兩三下手勢就食得嘅多士啦！使用大量蛋黃醬嘅活力早餐做法非常簡單，首先喺方包邊緣擠上蛋黃醬梱邊，再打隻生雞蛋落去中間，然後成個放入焗爐，要整出荷包蛋多士就係咁簡單！請留意，如果只將方包中間整凹就打隻蛋落去焗嘅話，蛋汁會漏出嚟㗎！鍾意半熟蛋嘅朋友，可以用大火焗4～5分鐘；鍾意全熟蛋嘅就用細火慢慢焗，或者再依個人喜好加塊火腿做成腿蛋治都一樣OK。但由於需要承擔雞蛋嘅重量，推薦使用厚身方包。 

2. 吞拿魚蛋黃醬多士

將味道同蛋黃醬超夾嘅吞拿魚加喺方包上，就可以快手做出簡單多士，拎嚟做早餐最fit！同上面方法一樣，先用蛋黃醬梱邊，再喺中間加入已去水嘅罐頭吞拿魚，放入焗爐焗大約3分鐘，焗到麵包角落開始出現金黃色焦痕即可。最後灑上黑胡椒，就整出超邪惡又叫人上癮嘅味道！由於吞拿魚都有一定重量，因此亦建議用厚身麵包。

3. 紫菜芝士多士

第3個做法，不如換個風格，用和風食材令多士變得更有新鮮感！做法雖然超簡單，但味道卻係一絕！先喺方包鋪上芝士同紫菜，再用細焗爐焗溶芝士約3分鐘。如果想多士更入味，記得要用有味紫菜或韓國紫菜，會比烤過嘅紫菜更適合配麵包。薄片多士可以凸顯紫菜嘅存在感，肚仔餓時都好適合當做點心咁食。香醇芝士同微咸紫菜嘅配搭非常夾！

4. S'MORE風烤多士

以朱古力同棉花糖製成嘅S'mores係喺北美好受歡迎嘅甜品，當地人會喺營火晚會同BBQ時都幾乎一定會食。咪以為好難整，其實任何人喺屋企都可以簡單做出嘅道地S'mores味多士！將棉花糖同朱古力塊梅花間竹咁放喺方包上，然後擺落細焗爐焗5分鐘，焗到棉花糖出現金黃色焦痕就OK！記住棉花糖一出現焦痕就好快會燶，所以要小心睇實呀。

■系列文章：勁好味嘅日式多士食譜 Vol.１