口感爽脆多汁、味道清甜嘅梨向來都多人鍾意。如果你都係愛梨之人，就一定要去「二十世紀梨」嘅故鄉——鳥取縣喇！呢篇文章除咗會介紹可以了解各種有關梨嘅小知識「二十世紀梨紀念館」，仲會介紹提供任摘任食梨體驗嘅梨園「SANKOUEN」兩大景點，想要親身了解鳥取縣產嘅梨之魅力，就一定唔可以錯過今次嘅介紹啦！

點解鳥取縣「二十世紀梨」會咁出名？

日本梨嘅種類非常多，大致可分為「紅皮梨」（赤梨）與「青皮梨」（青梨）兩種，每年8月上旬至11月下旬都係梨嘅當造季節。日本紅皮梨嘅代表有「幸水」和「豐水」等品種，相信大家都可能有聽過，甚至品嚐過，不過大家可能唔知道，其實呢啲著名嘅日本梨品種，都係青皮梨「二十世紀梨」嘅子孫喔！亦代表著「二十世紀梨」喺日本梨當中嘅地位係無可取替，而鳥取縣正正係「二十世紀梨」全國生產量第一嘅著名產地。

於1888 年，一名居住喺現時千葉縣松戶市嘅少年松戶覺之助，偶然發現一棵梨樹幼苗，喺細心栽培下種出果肉柔軟、清甜多汁嘅梨，品質與過往嘅品種大有差別，農學博士渡瀬寅次郎認為呢款梨將會成為新時代代表品種，因此將其命名為「二十世紀」，二十世紀梨就此誕生。後來喺農夫北脇永治嘅栽培與普及之下，二十世紀梨於鳥取縣內人氣大增，開始栽種二十世紀梨嘅農夫亦愈嚟愈多。鳥取縣喺地理環境方面正好有好多斜坡，符合種植二十世紀梨需要喺排水性高嘅斜坡上生長嘅要素，並經過百年努力後，二十世紀梨就成為鳥取縣嘅代表性水果。

二十世紀梨恰到好處嘅甜味、豐富口感與淡淡清爽酸甜味相結合，而產生絕妙平衡嘅好滋味，係大人們一定會鍾意嘅味道。如果有機會去鳥取嘅話，記得要試一試二十世紀梨啦！

二十世紀梨紀念館：學習關於梨嘅小知識，大人小朋友都盡興嘅好地方

千祈唔好以為睇展覽會好無聊，二十世紀梨紀念館最特別嘅地方，係有提供多個可以畀參觀者親身體驗與互動嘅展區。首先，如果你係帶著小朋友一齊嚟嘅話，可以先到2樓嘅「不可思議的庭園」（不思議ガーデン）參觀，裡面展示出多個放大比例嘅模型，令人好似踏入小人國一樣，可以一邊冒險一邊發掘梨園嘅小秘密。1樓嘅「種梨展示區」（梨を育てる），除咗可以了解農家喺一年裡面，各種種梨嘅步驟與過程外，仲可以體驗為梨模型進行「封袋」工序，睇落好似好簡單其實相當需要技巧喔！

另外，喺「梨子廚房走廊」（梨のキッチンギャラリー）區域內，仲有提供3款當造二十世紀梨畀大家免費試食，比較一下唔同品種嘅味道差別。1樓圍繞著中央二十世紀梨樹巨木而設置嘅多個展示室，展覽內容亦相當豐富。當中，除咗有梨嘅歷史起源、與梨有關嘅藝術作品之外，仲有世界各地與梨相關嘅小知識等展覽內容，並使用展示版、模型、影片方式以簡單又有趣嘅方式向參觀者介紹。有興趣嘅朋友可以喺度慢慢參觀學習。1樓出入口處設有Café與手信店，參觀完之後，不妨喺度享用一份特製梨甜品啦！有時間嘅話，記得去埋室外嘅梨園（梨ガーデン）行個圈，可以實際觀察不同品種嘅梨嘅栽種環境，係一個非常難得嘅機會喔！

景點資訊

• 名稱：鳥取二十世紀梨紀念館・NASHIKKO館
• 地址：鳥取縣倉吉市駄經寺町198-4 倉吉PARK SQUARE內
• 營業時間：9:00～17:00
• 交通方式：從JR倉吉站巴士總站2號巴士站，乘搭巴士於「倉吉PARK SQUARE」或「倉吉PARK SQUARE北口」落車徒步5分鐘
• 官方網站：http://1174.sanin.jp/

「SANKOUEN」梨園：任摘任食梨體驗

想要體驗一下摘梨樂趣嘅話，小編推薦你可以去超過100年歷史嘅梨園「SANKOUEN」（さんこうえん）。梨園自創業起，致力於二十世紀梨嘅栽種培植。職人們唔單止出盡勞力與汗水去種梨，亦花費多年時間去反覆研究培育最佳靚梨嘅條件。職人們咁辛勞嘅目的只有一個，就係要種出最鮮甜好味道嘅梨！希望所有品嚐過嘅客人，臉上都可以浮現滿足嘅笑容。現時，SANKOUEN成為當地人每年秋天摘梨必到之地。只要係去過一次嘅客人都會念念不忘，亦會期待第2年嘅梨季快啲到，可以再去SANKOUEN摘梨喔！

SANKOUEN園內有20幾個區域，種滿幸水、新甘泉、二十世紀、新興等11個唔同品種嘅梨。由於種植品種繁多、收成期長，所以大家喺7月下旬至11月中旬期間嚟SANKOUEN嘅話，都一定可以品嚐到當季最新鮮嘅品種。只要先付好入場費，就可以喺SANKOUEN裡無限時任摘任食梨啦！摘梨唔需要太多技巧，輕輕地將梨向右或向左方轉動，就可以輕易地將梨摘落嚟。入場時店家會提供膠刀與垃圾桶，方便大家去皮再享用。親手摘梨既好玩有趣，又能品嚐新鮮美味嘅梨，有機會嘅話一定要去體驗啦！

景點資訊

• 名稱：SANKOUEN（さんこうえん）
• 地址：鳥取縣鳥取市福部町湯山1973
• 營業時間：9:00～17:00
• 摘梨體驗收費：（大人）1200日圓、（小學生）1100日圓、（3歲以上）700日圓
• 交通方式：從鳥取砂丘駕駛出發，或搭的士約5分鐘
• 官方網站：https://www.sankouen.com/

鳥取除咗砂丘之外，仲有各式各樣嘅美食，當中爽脆清甜嘅梨，更加係令人食完一次永難忘。下次有機會去鳥取縣嘅話，記得要親身去以上所介紹嘅景點一遊啦！