講到日本美食，相信大部分人嘅腦海都會閃過「拉麵」兩個字。知道各位讀者「都無拉麵不歡」，所以今次編輯部特別精選出東京5間人氣拉麵店，等大家下次去拉麵激戰區東京旅行嘅時候，就唔怕花多眼亂兼選擇困難症發作，記得mark低試試喇！

品川

博多拉麵由丸 品川港南店

「博多拉麵由丸」嘅靈魂所在，就係用豬骨熬足16小時嘅湯底，味道濃郁鮮甜得保證令人「食過翻尋味 」！配搭豬骨湯底嘅醬汁由店家精心調配而成，使用博多老字號薄口醬油（重鹽醬油）為基底，將香味以及甘醇味都發揮到極致。

除咗醬汁湯底之外，店家對拉麵麵條亦非常講究，使用自家製極幼麵有助麵條瞬間吸滿湯汁，食落啖啖都充滿濃郁高湯精華。至於拉麵不可或缺嘅叉燒，更加係選用豬肉部位中最甘甜嘅五花肉，以無添加醬油慢煮而成，食落肥而不膩。此外，調味料辣油亦係「博多拉麵由丸」自家製，將炒過嘅辣椒加上蔥油所製作而成，並無添加任何防腐劑，令人食得開心又放心！

• 店名：博多拉麵由丸 品川港南店
• 地址：東京都港區港南2-2-6 長山大樓2F
• 交通方式：從JR、京急本線 品川站（港南口）徒步約4分鐘
• 營業時間：
• 週一～週五 11:00〜23:00
• 週六、週日 11:00〜22:00
• 定休日：公眾假期
• 價位：博多拉麵 720日圓、由丸拉麵 870日圓
• 點餐制，櫃檯結帳
• 信用卡付款：可（VISA、Mastercard萬事達卡、 JCB、AMEX美國運通）
• QR碼付款：可（支付寶、微信支付、PayPay、LINEPay、d払い、auPAY、merpay）
• 交通IC卡：可（Suica、PASMO）

新宿

桂花拉麵 新宿東口站前店

源自熊本縣嘅「桂花拉麵」創業於1955年，唔單止深受當地人喜愛，喺東京亦有唔少支持者。「桂花拉麵」嘅湯底呈濃白色，係以豬骨、雞骨所熬製而成，加上選用中粗身、口感偏硬嘅麵條，食落非常彈牙，口感相當加分。

「桂花拉麵」於1968年於東京開店，成為將熊本拉麵衝出熊本，拓展至東京嘅先軀。拉麵上面大大塊厚切叉燒肉亦相當吸睛，唔講唔知，原來呢個將五花肉切成厚切叉燒嘅menu，係進軍東京時所開發嘅原創菜式，至今仍然深受歡迎，難怪成為日本當地係熱門經典招牌拉麵之一。

• 店名：桂花拉麵 新宿東口站前店
• 地址：東京都新宿區新宿3-25-6
• 交通方式：從新宿站東口徒步約3分鐘
• 營業時間：11:00〜20:00
• 價位：厚叉燒麵 1,000日圓
• 請於餐券機購買餐券，不可使用信用卡

金色不如歸

「金色不如歸」於2006年始創於東京，更於2019年獲得米芝蓮1星殊榮，係全球獲得米芝蓮1星評價嘅3間拉麵店之一。

「金色不如歸」自開業以來就不拘泥於食材種類，大膽嘗試各式食材並不斷創新，至今已使用超過60種日本國內外嘅食材開發拉麵口味。品牌對拉麵麵條亦相當講究，除咗一定要用日本國產小麥之外，亦堅持每日於店內親自製作麵條，就連對熬煮湯底時所使用嘅水，甚至係餐具等等每個細節位都經過精挑細選，務求向每位客人呈獻「金色不如歸」獨有好滋味。

• 店名：金色不如歸
• 地址：東京都新宿區新宿2-4-1 第22宮廷大廈 1F 105號室
• 交通方式：
• 從地下鐵丸之內線 新宿御苑站 徒步約2分鐘
• 從地下鐵都營新宿線 新宿三丁目站 徒步約7分鐘
• 從JR新宿站 徒步約15分鐘
• 營業時間：
• 中午 11:30～15:00
• 晚上 18:30～21:00
• 食材售完即止
• 定休日：六、日
• 價位：真鯛蛤蠣鹽味拉麵 950日圓
• 請於餐券機購買餐券，不可使用信用卡

池袋

麵屋Hulu-lu

「麵屋Hulu-lu」嘅店長對夏威夷情有獨鍾，為咗配合個人喜好，因此店長特登將店面外觀與室內裝修等等設計成夏威夷風格，時尚又獨特。「麵屋Hulu-lu」嘅湯底係使用原隻吉備黑雞，再加入香味蔬菜為基底精心熬煮而成，與使用夏威夷嘅水自家製嘅拉麵麵條非常搭配，成為「麵屋Hulu-lu」獨有味道！店家每日仲會推出限定版SOBA拉麵以及期間限定口味等等，無論去幾多次都令人有新體驗！大家有機會一定要去充滿夏威夷氣息嘅「麵屋Hulu-lu」嘆返個不一樣的拉麵。

• 店名：麵屋Hulu-lu
• 地址：東京都豐島區池袋2-60-7
• 交通方式：JR池袋站西口徒步約10分鐘
• 營業時間：
• 11:30～15:00 / 18:00～21:00
• 週日及假日 11:30～15:30
• 定休日：週二
• 價位：醬油SOBA 790日圓
• 請於餐券機購買餐券，不可使用信用卡、不可使用電子錢包

麵創坊 無敵家

香港知名度甚高嘅「麵創房 無敵家」，無論係日本人，抑者係海外遊客都一致好評。濃郁豬骨湯底加上自家製手工叉燒肉，唔單止厚度驚人，仲要係入口即溶，真係夠晒「無敵」！門口成日都大排長龍嘅「麵創房 無敵家」所提供嘅創意拉麵種類非常豐富，加上擁有超高人氣，因此年中往往吸引唔少人到此一嚐箇中好滋味。

• 店名：麵創坊 無敵家
• 地址：東京都豐島區南池袋1-17-1
• 交通方式：
• 從JR山手線 池袋站東口 徒步約3分鐘
• 從西武池袋線 池袋站南口 徒步約1分鐘
• 營業時間：10:30～凌晨04:00
• 定休日：12月31日～1月3日
• 價位：無敵家拉麵 1,200日圓
• 直接點餐，非餐券機購買餐券，不可使用信用卡