提到日本，應該有唔少人都會聯想起「抹茶」。的而且確，日本歷史悠久嘅抹茶文化幾乎係日本文化最廣為人知嘅標籤之一，FUN! JAPAN至今都有介紹過唔少有關抹茶嘅文章與食譜～今次，編輯部要為大家介紹嘅係抹茶Tiramisu，做法非常簡單，假日下晝整嚟嘆個靚靚下午茶就fit晒～

材料（約18×8×5cm份量）

• 100cc 鮮忌廉
• 200g 白朱古力
• 50g 無鹽牛油
• 3隻 雞蛋
• 60g 糖
• 20g 抹茶粉
• 2茶匙 粟粉

做法：

1. 將鮮忌廉倒入鍋中用細火加熱，當鍋邊出現小氣泡後即可關火。然後加入白朱古力碎攪拌直至溶化，最後再加入無鹽牛油再慢慢攪拌至牛油完全融化。
2. 準備另一隻鍋並注入熱水，再準備一隻碗放於鍋內。上方放置濾網，過濾事先打好嘅雞蛋，過濾完成後加糖並攪拌至融化。
   ※要輕輕攪拌，唔好令空氣跑入去啊～
3. 將融化咗嘅朱古力放入另一隻碗內，添加雞蛋攪拌，並加入篩過嘅抹茶與粟粉，均勻攪拌。
4. 將麵糊倒入鋪好烘培紙嘅模具中，將模具上下輕搖約2、3次，將麵糊內嘅空氣去除。若表面出現小氣泡，可用竹籤將表面小氣泡篤穿。
5. 將裝有麵糊嘅模具放於耐熱容器內，於模具四周倒入約1cm高嘅熱水。同時預熱焗爐至170°C，之後放入焗爐烘焗35至40分鐘，冷卻後放入雪櫃約5小時。
   ※可用手指觸摸表面，如果無任何東西沾上手指就表示已經凝固成形
6. 最後，撒上抹茶粉並用金箔裝飾就大功告成！