日本47都道府縣特輯Vol.15 群馬篇「群馬嘅〇〇好厲害！」
日本北至北海道，南到沖繩，地型夾窄，跨越南北唔同嘅氣候地理。隨住每個地方嘅氣候唔同，亦會影響價值觀同性格習慣等有所差異。由習俗文化，到當地美食，因為居住環境地方唔同而會產生變化。如果我哋熟知當地人嘅習慣嘅話，遊日本各地時相信可以更有趣更順利。今次呢個系列文章將會為大家介紹群馬縣。
好勝唔認輸 要臉愛虛榮？！
群馬縣縣民嘅個性大多數係呈強、唔服輸。亦因為咁，有好多群馬人可以出人頭地，喺社會上爭一片天下。群馬縣曾經出過四位總理大臣。據說群馬人開車，如果被其他車追過，肯定會再追返過去，然後演變成互相追逐嘅場面。群馬縣縣廳大樓係全日本縣廳大樓入面最高。群馬縣縣廳—高崎市役所，係一棟高約102.5米嘅巨塔，由側面望過去，就似一部超薄液晶電視，好引人注目。
另外，群馬縣縣民似乎好鍾意睇電視，好多人屋企會擺設約60吋至70吋大型電視，亦有啲人屋企竟然有4部32吋電視。
全日本魅力度排行榜 經常爭包尾？
群馬縣擁有好多自然資源，亦有溫泉同世界遺產，但一諗要住群馬縣，就有好多人為之卻步。群馬縣可算為唔太受歡迎，成日被人揶揄為「未開發之地」、「日本最後秘境」，甚至有啲日本人真係唔知群馬縣嘅存在。但係，群馬縣縣民本身認為，自己嘅群馬縣絕對唔會輸畀鄰近嘅茨城縣同栃木縣。
擁有Häagen-Dazs 雪糕工廠而自豪！
Häagen-Dazs 嘅工廠全世界只有四座，分別喺美國、紐西蘭、日本同法國，而珍貴四座工廠入面，日本工廠就設置喺群馬縣高崎市。大家喺亞洲地區享用到美味Häagen-Dazs雪糕，其實都喺自日本群馬縣，係群馬縣縣民嘅驕傲。
另一自豪：知名企業嘅寶庫所在！
群馬縣亦係好多有名大企業嘅起點。例如家電量販店嘅龍頭—山田電機、BicCamera、或者係以「札幌一番拉麵」而聞名嘅三洋食品等，仲有出產人人熟悉嘅「即食Peyoung炒麵」嘅Maruka食品，而大家都可能食過嘅「築地銀章魚燒」其實起源唔係築地，而係群馬縣。其他仲有汽車廠商Subaru速霸陸等等，如果無群馬縣推廣呢啲科技、企業，日本產業可能都無咗回事。
奇特當地美食 吸引眾人目光！
群馬縣有好多單聽名嘅話，好難想像係乜嘢味道嘅食物。例如，群馬縣引以為傲嘅「HIMOKAWA」，其實係好似布咁闊嘅烏冬。其他仲有加咗草莓糖漿嘅文字燒、黑漆漆嘅炭拉麵。據說係為咗想要吸引其他縣嘅目光，所以開發咗好多不可思議嘅料理菜式。
喺日本全國有好多令人難以置信嘅各地縣民特性，喺其他縣民眼中係非常有趣嘅事。本系列文章將會陸續刊登，敬請期待！歡迎有任何意見或感想，都可以喺右邊嘅留言欄話我地聽！仲想知道邊啲縣嘅獨特縣民個性，都歡迎留言唷！