如果您正準備前往位於群馬縣澀川市伊香保，咁就絕不能錯過當地最著名嘅觀光景點「石段街」。位於「石段街」中央階梯嘅部分均由石頭堆砌而成，長約300米、級數多達360級以上。一路上林立日式旅館、酒店、紀念品店等等，成條街道仍然散發著舊時日式風情嘅濃厚氣息。此外，附近仲有風景名勝、神社以及主題公園等豐富景點𠻹！

伊香保小檔案

伊香保歷史悠久，自古以嚟就係溫泉勝地。區內唔單內坐擁多間溫泉旅館，仲有人氣嘅「伊香保溫泉 石段之湯」、足湯等溫泉設施。

另外，伊香保溫泉位於海拔約700米處，環抱豐富美麗嘅自然景觀，迷人風景處處。

伊香保必睇與必玩好地方

伊香保有各式各樣觀光景點，以下就為大家介紹必去景點！

「伊香保玩具和娃娃汽車博物館」、「伊香保綠色牧場」等觀光景點

伊香保內有遊樂園、博物館、美術館、牧場等等觀光景點。

「伊香保玩具、娃娃及汽車博物館」係一座大型綜合博物館，館內每個展區都各具特色，並依展區展出豐富珍貴館藏，例如「汽車博物館」展出咗70輛世界著名汽車，而「玩具及娃娃博物館」就展出咗懷舊鐵皮玩具及世界稀奇洋娃娃。

「伊香保綠色牧場」係一個人氣牧場，遊客可以係呢度同綿羊、山羊等動物互動，並參加騎馬及特色牛油製作體驗。

乘搭「伊香保纜車」前往物聞山山頂觀賞絕景

伊香保內亦有多個視野絕佳嘅景點。例如海拔800米高嘅長峰公園內嘅長峰天文台，以及海拔1029米高嘅高根展望台等等。

當中特別推薦香伊保纜車山頂「見晴站」附近嘅上之山公園(上ノ山公園)。從公園內955米嘅觀景台，您可以欣賞到武尊山、谷川岳等等周圍嘅山巒，腳下就係整片溫泉街景！

「伊香保夏威夷節」等活動、祭典

伊香保喺每個季節都會舉辦豐富活動或祭典，其中值得關注嘅有「伊香保夏威夷節」。每年7月到8月嘅其中四日，伊香保溫泉街上都會散發著濃濃夏威夷風情。遊客屆時可以到欣賞華麗草裙舞表演，例如由夏威夷草裙舞比賽嘅優勝隊伍負責嚟嘅草裙舞表演，仲有嚟自全國各地嘅參加者帶嚟嘅草裙舞表演呢。

「伊香保祭典」則係伊香保溫泉於每年9月舉辦嘅傳統祭典。眾多壯丁們會協力抬著裝飾華麗嘅傳統神轎，沿著365級「石段街」巡遊嘅光景震撼力十足！

伊香保美食及餐廳

嚟到伊香保，您可以品嚐到日本三大烏冬之一嘅「水澤烏冬」，以及群馬縣當地料理Okkirikomi（以闊烏冬放入大量蔬菜一齊燉煮而成嘅料理）。另外，溫泉饅頭始祖「湯之花饅頭」亦非常出名。大多數餐廳都集中喺溫泉街內，要覓食非常容易。

伊香保壽司

如果想喺伊香保食壽司，推薦您到「榮壽司」（栄寿し）或「壽司TOMO」（寿しとも）等壽司店。「榮壽司」菜式選擇豐富，當中包括使用新鮮海鮮製作嘅手握壽司、刺身及海鮮丼等等。另外，「壽司TOMO」則以海鮮餡料多、以及豐盛手握壽司而聞名。

於伊香保豆腐店品嚐手工豆腐

一場嚟到伊香保，更加唔可以錯過嘅就係手工製作嘅「段段豆腐」。豆腐原料使用優質大豆，味道醇厚、充滿大豆香氣。

豆腐製造商「山本作右衛門商店」提供新鮮「段段豆腐」。另外，喺店舖「豆腐茶房だんだん」裡，仲可以食到使用「段段豆腐」製作嘅豆腐排等各式各樣料理呢。

伊香保酒店及旅館

伊香保區內有多間溫泉酒店及旅館，每間都各有唔同特色，例如，有可以眺望群馬山脈絕景嘅溫泉浴池，又或被綠油油環境包圍嘅露天溫泉浴池。

住宿價格由每晚約5,000到30,000日圓不等。（資訊截至2019年9月）

伊香保交通方式

如要前往伊香保，請由JR澀川附近站搭巴士前往伊香保溫泉街。乘搭「關越交通巴士」的話，到伊香保溫泉巴士站約需25分鐘。

另外，由於伊香保地區距離觀光景點比較遠，建議可以多多利用連接溫泉街與周邊景點嘅「伊香保城鎮巴士」、「關越交通巴士」或「群馬巴士」。

景點資訊

• 名稱：伊香保（伊香保溫泉）
• 地址：〒377-0102 群馬縣澀川市伊香保町伊香保 
• 交通方式：澀川站→[關越交通巴士]約25分→伊香保溫泉巴士站...步行即達
• Wi-Fi：有
• 語言：中文、英文、韓文
• 信用卡：可以使用VISA, MasterCard, JCB, AMERICAN EXPRESS, Diners Club International, 銀聯卡 (依各設施而異)