「水上町」── 擁溫泉秘境、山巒河川,豐富大自然景觀嘅綠洲之地

位於群馬縣最北部嘅「水上町」，係號稱日本河川面積最大的「利根川」之發源地。被山、河川、溪谷等大自然恩惠擁抱著嘅「水上町」，除咗可以欣賞到大自然美景，亦可以體驗得到滑雪‧溫泉‧泛舟等戶外休閒運動。

水上町小檔案

水上町森林面積佔百分之90以上，坐擁日本百大名山「谷川岳」及「武尊山」，可以感受到綠意盎然嘅氣息，亦可以欣賞到百大名山嘅雄偉的山巒景觀。

另外，水上町溫泉資源豐富，由猿京溫泉、水上温泉、上牧溫泉等18個溫泉區，統稱「水上18湯」。

水上町冬天積雪量大，平均氣溫會係介乎於冰點左右，非常寒冷。

如果主要係觀光旅行，建議春天~秋天期間出發，可以避過嚴寒氣侯。但如果旅行目的主要係想進行戶外活動嘅話，就一年四季都啱晒你去! 水上町嘅春天~秋天期間，可以去爬山、泛舟等，而冬天就可以進行滑雪等雪地活動，或者浸下溫泉都非常過癮。

當中要注意嘅係，6月~7月雨季以及9月颱風季期間，降雨量會比較大，記得出發前要留意返變幻莫測嘅氣候啦。

「水上町」自然景點豐富不在話下，另外仲富有日式風情嘅傳統古民家、遺跡和歷史資料館等觀光景點，令人目不暇給。以下將分享必睇景點和必玩活動好推薦。

利用水上町擁有嘅溪谷和湖泊等自然地形，去體驗溪降運動、泛舟和獨木舟等各種刺激有趣嘅戶外活動，當中溪降運動係人氣最高。沿著溪流上游移動到下游，當中可以係沿著溪流的瀑布下降、又或者跳入瀑布底下深潭，非常驚險刺激。

水上町有9個滑雪場，各有唔同特色。而「白色山谷滑雪場」嘅特色在於利用自然地形構成多元化的雪道。除咗冬天滑雪場嘅魅力，係其他綠意盎然嘅季節下，亦可以享受得到其他戶外活動，如高爾夫球、空中飛索、網球等等。記得有機會就去體驗一下啦!

水上町擁有唔少大自然靚景嘅觀光景點，例如「谷川岳」。可以喺山腳搭纜車直上「天神平」。喺天神平展望台，可以眺望谷川岳山頂，飽覽一大片雄偉的山景。另外，亦可以挑戰一下行山遠足，沿著山脊行亦可以抵達谷川岳山頂。

水上町有好幾個水壩人造湖，當中真心推薦「奈良俣湖(ならまた湖)」。湖光山色、怡人景色倒映於湖面上，美不勝收。「奈良俣湖(ならまた湖)」亦係賞楓名所，秋季時一大片被染成紅黃色嘅山巒，與湖水交織成醉人絕景。

「水上町」受惠於富饒優質水源，以及寒暖溫差大嘅大自然環境下，孕育出優質特產品牌米「水月夜」以及黃蘋果「群馬名月」。另外，以水壩聞名嘅「水上町」內，有一樣當地「壩」氣得意美食亦值得推介，就係「水上水壩咖喱飯(みなかみダムカレー)」；將飯當作水壩，咖喱當作水壩蓄水池，結合水庫等特徵而衍生嘅日式咖喱飯。

順帶一提，「水上町」嘅飲食店，以水上溫泉和JR水上站附近一帶嘅數量比較多。

「水上町」內住宿種類頗多，各個溫泉地區都有唔少附有溫泉嘅酒店和日式旅館，另外仲有簡易日式旅館，民宿等選擇。

水上溫泉和猿京溫泉嘅住宿設施數量特別多，亦有一些每晚5,000日圓左右、經濟實惠嘅住宿選擇。(截至2019年9月資訊)

從東京前往水上町，先以新幹線「JR上毛高原站」為目標。從JR上野站搭上越新幹線，車程約1小時即可以抵達上毛高原站。再從上毛高原站搭當地巴士前往各個觀光景點。