東京原宿而家有好多任食嘅甜品餐廳，受到唔少女生歡迎。但今次FUN! JAPAN要介紹嘅甜品店唔係任食咁簡單。入到去餐廳會見到有好似迴轉壽司店嘅輸送帶，但上面放嘅並唔係壽司，而居然係甜品！呢間「MAISON ABLE Cafe Ron Ron」喺2018年7月開幕，喺社交媒體上面一直人氣高企，係知名嘅打卡影靚相嘅熱點。究竟呢間舖頭有乜嘢魅力呢？等我地一齊去探個究竟！

日本首間迴轉甜品店

唔係迴轉壽司而係迴轉甜品，真係前所未有嘅新諗頭。有好多唔同款嘅蛋糕、班戟等，可以滿足大家樣樣試食嘅慾望。喺限時40分鐘入面，可以無限享用全長38米嘅輸送帶上轉嚟轉去嘅甜品、蛋糕、馬卡龍、甚至薯片等。另外，店名「Ron Ron」，其實係嚟自法文入面，形容貓咪喉嚨響嘅聲音。睇住甜品喺目前「CHICHUK（彳亍）咁轉」，係咪都店名一樣，都會漏口水，喉嚨發出聲響呢？！

除咗粉色都係粉色嘅新世代裝修 就喺要攻陷少女心

行入店之後，會見到全部都係粉色系同柔和色系嘅裝修佈置，令人完全變返少女咁。周圍都係粉！粉！粉！超級可愛。真係一入去就先興奮。而位於2樓嘅洗手間同埋補妝區，裝修就用咗白色系，畀人高雅嘅感覺。

店入面有好多影靚相打卡嘅空間，連裝嘢飲個樽都特別靚！！另外，店入面仲有準備咗唔同嘅道具，例如貓尾、對話雲，畀你用嚟影相，同朋友一齊留下美好回憶嘅紀念！

餐點種類豐富 令你每樣都想食

除咗最例牌嘅馬卡龍、蛋糕同班戟之外，仲有貓咪特別造型嘅甜品同埋薯仔沙律，仲有啲鹹點小食，再加埋季節限定嘅菜式，大概有25種唔同款式。每件都係大概一啖食哂嘅大細，細細件好可愛。如果食得太多甜嘢太膩，又可以食個咸點，換吓口味再戰，食幾多都得。

入餐廳後嘅流程

由入餐廳開始，侍應就會嚟帶位。

步驟一 購買餐券

自動售賣機只接受現金，如果想用信用卡嘅話，可以另外同店員講。

步驟二 揀飲品

可以揀一個印有店名嘅凍飲樽飲品，而呢個樽係可以拎返屋企架。

另外，餐廳仲有自助飲品吧，提供咖啡、紅茶同凍水。

步驟三 入座

入座之後就開始可以享受40分鐘迴轉甜品任食！

※人多需要排隊時，可能會派數碼牌等候。

※餐點款式有可能因為季節而改變。

餐廳嘅原創商品都好靚，唔好錯過

除咗可以食甜品之外，餐廳入面都有賣餐廳原創嘅商品，包括保溫瓶、馬克杯等，全部都好夾餐廳個feel好靚，買嚟送禮都得！

下次有機會嚟到原宿，可以嚟睇下呢間「MAISON ABLE Cafe Ron Ron」，單係嚟睇超可愛嘅貓咪造型蛋糕，影啲呃LIKE相SHARE都扺♡

費用

40分鐘任食+保溫樽(凍飲用)1支+飲品吧

女性： 2,100円（包稅）

男性： 2,400円（包稅）

小童： 1,700円（包稅）

※女性限定優惠，只要加入LINE官方帳號「MAISON ABLE」做朋友，每次可以減100円

※小童為6歳以上 12歳以下

僅40分鐘任食

6歳以下小童：500円（包稅)

※飲品另外付費

店鋪資訊

• 店名：MAISON ABLE Cafe Ron Ron
• 地址：東京都澀谷區神宮前6-7-15
• 營業時間：11:00 - 19:00 （L.O. 18:00）
• 電話號碼：03-5468-8290
• 座位數：44席