春天期間有機會去長野縣旅行嘅話，又點可以唔盡情把握時間追櫻？距離JR長野站1小時以內車程嘅高山村內至今仍然保留著豐富農村景觀及大自然原風景，作為「枝垂櫻之里」大受遊客好評，作為賞櫻目的地就最適合不過。跟住落嚟，編輯部就要為大家介紹高山賞櫻推薦時期，以及櫻花季期間必睇嘅「信州高山櫻」等詳細情報！
長野縣高山村小檔案
高山村位於長野縣東北部，距離長野市約20公里，從JR長野站乘搭電車・巴士約50分鐘即可抵達。雖然小村莊人口僅約7,000人，但就一共坐擁8座溫泉，因此被冠以「信州高山溫泉鄉」美譽，有唔少日本人都為求「湯治（溫泉療養）」而專程到訪喔！
高山村整體面積約85％被森林・原野覆蓋，大部分森林地區更被指定為上信越高原國立公園一部分。除此之外，高山村亦已噝2010年9月27日於岐阜縣白川村舉行嘅「日本最美麗的村莊聯盟」臨時總會上獲正式承認加盟，山田牧場、松川溪谷等村內充滿日本風情嘅原風景皆獲得高度評價，可見靚景絕對有一訪價值。
長野縣高山村賞櫻時期
想去高山睇櫻花？識睇一定係揀4月中旬！
歷年開花日大部分情況下都集中於4月第1、2個禮拜，並於4月中旬至下旬迎接滿開。配合櫻花滿開，當地每年4月中旬至下旬更會舉辦「信州高山櫻花祭」，由圍繞村内賞櫻重點嘅「徒步導覽之旅」、櫻花點燈以及農產品直銷販賣等多項活動，為賞櫻遊客添上地道特色氣氛。（受新冠肺炎疫情影響，2022年僅舉辦徒步導覽之旅）
長野縣高山村必睇「信州高山五大櫻」
高山村內一共種有約20棵枝垂櫻，當中半數樹齡已超過200年。由於村內標高相差較大，因此花期亦相對其他賞櫻景點較長！
云云櫻花樹中，最值得一提嘅必定要數到有「信州高山五大櫻」之稱嘅5棵「一本櫻」櫻花樹。「五大櫻」以樹齡推斷超過600年、樹幹周長達8米嘅「坪井枝垂櫻」為首，加上「水中枝垂櫻」、「黑部江戶彼岸櫻」、「赤和觀音枝垂櫻」以及「中鹽枝垂櫻」，令高山村作為數一數二嘅「枝垂櫻之里」而聞名日本全國。每逢賞櫻時節，村內都會擠滿大批「龍友」，場面極度墟冚！以下，就等小編為大家簡單介紹「信州高山五大櫻」各自嘅特色啦～
坪井枝垂櫻
高山村內最長壽嘅櫻花，推定樹齡超過600年。已被列入高山村指定有形文化財。
- 地址：長野縣上高井郡高山村大字中山4117
水中枝垂櫻
位於鹿島神社範圍內，曾作為電影拍攝取景地。又名「鹿島枝垂櫻」。
- 地址：長野縣上高井郡高山村大字高井1259-1
赤和觀音枝垂櫻
赤和觀音枝垂櫻位於赤和觀音堂下方，至今已擁有200餘年歷史。攀上櫻花後方約150級石梯，您就會嚟到建於中腹內、紅色屋頂外觀嘅赤和觀音堂。
- 地址：長野縣上高井郡高山村大字高井2514-3
黑部江戶彼岸櫻
佇立於高地田園內嘅古老一本櫻，樹齡超過500年。樹幹於過去一次雷擊中被一分為二，現時主幹一邊垂直生長，另一邊則斜向發展。
- 地址：長野縣上高井郡高山村大字高井3740
中鹽枝垂櫻
中鹽枝垂櫻推斷樹齡約為150年，為「高山五大櫻」中最中開花嘅櫻花樹。
- 地址：長野縣上高井郡高山村大字中山4758-4
「信州高山櫻花祭」4月下旬起跑
如果想要感受120％賞櫻樂趣，就絕對唔可以錯過賞櫻期間舉行嘅「信州高山櫻花祭」！
「徒步導覽之旅」設有一次過帶您行勻「信州高山五大櫻」嘅「五大櫻花巡禮路線」、「滿開櫻花巡禮路線」等根據唔同主題劃分而成嘅賞櫻步行路線，即使係第一次去高山旅行、人生路不熟嘅遊客都可以大飽眼福，盡情飽覽村內大自然景色。除此之外，櫻花祭屆時亦會有枝垂櫻點燈活動、收集印章活動、當地農產品販賣等各式娛賓節目，唔單只係櫻花愛好者能夠滿載而歸，鍾意日本鄉間風土人情嘅遊客都必定大滿足！
景點資訊
- 名稱：高山村
- 地址：長野縣上高井郡高山村
- 交通：
【從東京方面出發】
JR北陸新幹線・東京站（約1小時20分鐘）→ 長野站 [長野電鐵（約30分鐘）] → 須坂站 → 路線巴士或的士 →高山村
【從名古屋方面出發】
JR中央西線・名古屋站（特急酊車約2小時50分鐘）→ 長野站 [長野電鐵（約30分鐘）] → 須坂站 → 路線巴士或的士 →高山村
Comments