日本人酒精類飲料消費量，喺全球基準嚟睇係平均值以上。但係日本人飲完酒之後，係唔會乖乖返屋企瞓覺。咁日本人飲完酒會做啲咩呢？下面就要同大家介紹一下喺日本嘅奇怪「酒後結尾」（「お酒の締め」）習慣同其理由。
日本人大多數都係以「拉麵」埋尾
一般日本人好多都會喺居酒屋等邊食飯邊飲啤酒或Highball（威士忌同蘇打水混合而成嘅雞尾酒），最後再去拉麵店食碗拉麵先算係真正結束。不過唔係所有日本人都會咁做，但係飲完酒再去拉麵店呢件事，對日本人嚟講一啲都唔出奇。而且無論係炎夏定係寒冬都一樣會咁做。喺東京市中心有好多拉麵店嘅營業時間都係接近電車末班車時間添。
沖繩縣民飲完酒則係去食「牛扒」
沖繩縣民飲完酒唔係食拉麵，而係去食牛扒先係真正嘅結束。呢點係連日本人都好驚訝。沖繩縣內嘅牛扒店有成150間，以人口比率嚟睇，數量係日本第一。不過，因為沖繩縣內亦有美軍基地，有咁多牛扒店又唔係好奇怪。
但係，對沖繩縣民嚟講，似乎都無飲完酒就一定要食牛扒先有結束嘅感覺。只係有好多牛扒餐廳營業至深夜。或者因為沖繩觀光服務業發達，而且有好多人工作結束時間比較夜等等因素，所以咁夜都有人去食飯都唔出奇！？
飲完酒食芭菲做結尾風潮 源自北海道！
講起日本3大歡樂街，就係東京．新宿嘅歌舞伎町、九州．福岡嘅中洲，同埋北海道．札幌嘅薄野。飲完酒之後去食芭菲係薄野嘅新常識。雖然有啲居酒屋等都會有甜品餐單，但專程去咖啡店食芭菲似乎已經係結束聚會嘅指定動作。
電視節目同雜誌最近都成日報導，所以呢個習慣亦逐漸出現喺東京同名古屋等地。
飲酒之後點解要食啲咁重口味嘅食物呢？
攝取酒精之後肝臟會努力分解，呢個時間酒精分解就需要血糖。飲越多酒血糖越低，同時體內嘅鉀、鈉、鹽分亦隨之降低，所以會變得想要攝取糖分、丙氨酸同鳥胺酸。
而包含唒上述想攝取嘅成分嘅豚骨類同柴魚類湯頭加上富含糖分麵條嘅拉麵，可以講係最適合不過喇。另外，酒類飲料亦會產生脫水症狀，身體會變得想要水份同鹽分，所以拉麵真係可以講係最啱嘅食物嚟喇。
雖然水份較少，不過同樣道理，牛扒同芭菲似乎喺調整身體狀況方面都有幫助吖。
睇完之後係咪解答到你嘅疑惑呢？不如諗一諗，其實香港又有無呢啲酒後要食啲咩嘅習慣…？
Comments