推薦岐阜縣・高山嘅3間旅館

日本觀光旅遊勝地之一嘅岐阜縣「高山」。雖然喺日本當地係知名嘅觀光景點，但比起東京或大阪等大都市，相關資訊比較少。如果想到岐阜縣・高山旅遊嘅話，到底住宿邊度好呢？相信為此而煩惱嘅人都唔少。所以小編今次就要為大家推薦去遊高山時住嘅旅館酒店。歡迎大家參考一下！

高山嘅3間推薦旅館

高山以溫泉聞名。嚟到日本旅遊，唔可以錯過嘅體驗之一就係浸溫泉。

今次要推薦嘅旅館均附設溫泉，於觀光旅遊行咗成日之後，一於嚟浸下溫泉紓解疲憊啦！

溫泉、日本庭園、當地美食全部喺「高山綠色酒店」都可以搵到。

弱鹼性嘅天然溫泉，讓肌膚滋潤滑溜，相當受歡迎。夜間仲會有點燈，呈現夢幻氛圍。如果想要私人空間浸溫泉，建議訂附有露天溫泉嘅客房。

嚟到高山唔可以唔食嘅就係和牛「飛驒牛」嘅料理，仲有體驗圍繞喺日本傳統圍爐裏用餐，係推薦俾想品嚐美食嘅人嘅優質住宿。

位於高山嘅山丘上，海拔高640米嘅「高山Associa度假酒店」。係可以一覽無遺北阿爾卑斯山絕美景色嘅人氣旅館。

有木桶浴池，岩浴池等10種露天溫泉、2種室內溫泉，種類眾多，喺飛驒地區數一數二。一邊欣賞遠山美景一邊浸浴，絕對係一段難以忘懷嘅回憶。

以日本料理為首，仲有鐵板燒餐廳提供A5級飛驒牛，就喺食客面前現場烹調。使用當地食材嘅料理以及當地嘅酒品，帶來豐盛嘅美食饗宴。

距離高山站徒步約5分鐘，去高山旅遊時交通最方便之一嘅旅館有「飛驒高山溫泉廣場酒店」。

頂樓有露天溫泉，可以一邊欣賞北阿爾卑斯山美景一邊浸浴。位於地下一層嘅大澡堂，則以能登「羅漢柏」嘅漆塗同浮世繪等作為裝飾，充滿傳統日式風格。

旅館內嘅餐廳有日式、西式、中華料理3種餐點可以選擇。而飛驒牛嘅會席料理為最受歡迎。