講起日本黏黏地嘅食材就會聯想到納豆，跟住就係淮山蓉(tororoとろろ)同秋葵。但對香港人嚟講，可能好驚訝帶有黏度嘅食材竟然喺日本人日常用餐上係咁常見。其實真係好奇怪，睇落都唔覺好食，而且黏狀應該都唔易食落口，但日本人點解咁鍾意食嘅呢？
世界上都好唔受歡迎嘅納豆
大豆發酵而成嘅納豆，含有豐富嘅食物纖維同促進成長荷爾蒙分泌嘅精胺酸。此外，仲含有維生素E，透過抗氧化作用、抗老化效果都可以期待。原本大豆就含有異黃酮，同對女性嚟講相當重要嘅女性荷爾蒙有類似嘅功效㗎。
雖然喺日本一部分地區，例如關西地區等，都有部份人唔鍾意食納豆，但喺日本大部份超級市場等，納豆商品嘅上架面積係比想像中大好多。從細細粒到大大粒、醬汁口味偏甜或鹹鹹嘅鼓油等，有多款口味任君挑選。另外，3盒裝嘅售價都只係100円左右，平價令佢更加成為日本人餐桌上常備嘅食品之一。
因為營養價值高又經濟實惠，所以令日本人咁愛不釋手！
將淮山磨成嘅淮山蓉
淮山蓉嘅營養成分當中，特別值得一提嘅就係皂素，有助於自然殺手細胞嘅活性化及抗氧化作用，同埋可以帶走附喺血管入面嘅脂肪，效果可望促進血液循環。
淮山切塊食用都唔錯㗎，但磨成淮山蓉更能幫助消化吸收。就好似上圖見到嘅淮山蓉撈飯係日本家庭最常見嘅食法，做法簡單。而其他仲有撈蕎麥麵或者配吞拿魚刺身片等等各種唔同嘅淮山食譜。
星型切面好可愛~會牽絲嘅秋葵
秋葵富含食物纖維、鈣、鉀、維生素A、維生素B等，係一種營養價值好高嘅食材。講到秋葵專屬特有嘅營養素，咁就梗係生物素（維生素B7）啦，佢嘅作用就係令疲勞物質嘅乳酸轉化為醣類。所以，食秋葵可以有助消除疲勞同舒緩肌肉痠痛㗎。
秋葵煮熟後，切片再淋上鼓酒，就可以做出一道顏色外觀都討好嘅小菜啦。對於每日費心煩三餐菜色嘅日本家庭主婦嚟講，係一道令人開心嘅簡單料理呢。
黏黏食材有咩共通效用呢？
增強免疫力
可以保護眼睛黏膜，改善乾眼症，而且可以保護胃部黏膜，預防胃炎或胃潰瘍等作用。亦可以防止病毒入侵，有助預防感冒等效果。
恢復疲勞效果
有促進蛋白質分解同吸收嘅作用，能將其他蛋白質嘅食材，有效率地轉換為能量來源㗎。
睇完以上介紹覺得點呢？日本人健康同長壽嘅秘密，話唔定意外地就係隱藏喺呢啲黏黏嘅食材當中呢！？
Comments