大家有無睇過日劇《朝5晚9》呢？靚仔帥和尚狂追英文補習社女老師嘅劇情，一睇時係咪有人會覺得好疑惑，和尚點可以結婚㗎？呢個世界上，喺寺院工作嘅和尚，依釋迦牟尼嘅佛教教義係禁止娶妻。除咗唔可以娶老婆之外，仲有同女性單獨共處一室都唔得。但係，日本嘅和尚幾乎都可以結婚，仲會生埋囝囡。同埋和尚為咗搵結婚對象仲要參加婚活添(為咗結婚而進行嘅各種聚會活動)。嗯？點解嘅？點解嘅？其實咁係有原因嘅…
結婚都OK嘅緣由在於…國家方針
過去喺日本，部分宗派除外，都係禁娶妻禁食肉。到咗明治時期嘅1870年代，政府提倡廢佛毀釋運動(想要消滅佛教嘅運動)。之後，據說喺1872年發布命令指出，「應該自己決定食肉娶妻」，俾和尚擁有同一般市民相同嘅待遇。結果，和尚們就變得可以食肉娶妻喇。
參加婚活派對尋找另一半
日本呢幾年流行「職業類婚活派對」。就好似只有醫生、只有律師或者都係喺金融公司返工嘅人。派對會限定參加派對嘅男性職業，仲有以呢啲職業為基準搵另一半嘅一般女性會參加。所以，都有「和尚」嘅婚活派對。意外地都幾受歡迎㗎。受歡迎嘅原因，據說係和尚「能夠信賴」、「比上班族家庭更穩定」等等。
一般男性有好多都係玩玩吓嘅心態去參加派對。而和尚因為會擔心無人接班，所以好多都會好認真咁參加婚活派對。
已婚和尚係過著點嘅生活嘅呢？
已婚嘅和尚同一般人過著相同嘅生活與家庭環境。可以食肉可以飲酒，無飲食限制。另外，小朋友都可以普通返學或出國留學，唔會受限只可以接受宗教教育。只係好多數情況都會由個仔繼承返衣缽。
但從宗教嘅觀點嚟睇，咁樣真係可行咩…？
其實過去都有宗教派系認同和尚結婚
明治時代(1867年)以前，似乎只接納淨土真宗可娶妻。淨土真宗「親鸞」認為，結婚係唔會妨礙念佛、而且妻子能夠成為支撐念佛嘅存在，咁就無問題啦。
實際上，親鸞都有老婆，似乎係以「觀音菩薩嘅化身」嚟看待，有著互相尊重嘅夫妻之道。
另外，日蓮宗不受不施派，喺佛教中係戒律特別嚴格嘅宗教派別，目前係唔可以食肉亦唔可以娶妻。
明明同樣都係佛教，點解咁唔同？
日本嘅佛教係大乘佛教。大乘係大型嘅搭載物，即係「無論任何人都可以開悟」嘅意思。簡單嚟講，唔理係邊個都可以入佛門。日本以外，部分香港同台灣地區、印度、越南部分地區都有信仰大乘佛教嘅人。
喺泰國信仰佛教有227戒律，相比起日本只有五戒，真係蚊比同牛比，順帶一提五戒即係「不殺生、不偷盜、不邪淫、不妄語、不飲酒」。
日本和尚點解可以飲酒食肉仲可以娶妻，原來就係咁解…！
Comments