京都府位於日本近畿地區，係日本首屈一指嘅代表性觀光勝地，遊客可以從街道、寺院、藝伎及京料理等等一一體驗傳統日本文化。京都府內有17個獲登錄為世界遺產嘅觀光景點，文化財產、森林、動植物資源都相當豐富，非常值得大家前來朝聖由文化財產與大自然交織而成嘅美景。
話雖如此，京都市同京都府係完全兩回事。京都府可被分為五個區域，而京都市就係其中之一，而本文就將會為您介紹京都府及京都市嘅旅遊重點。
關於京都府
京都府有百分之八十嘅面積都係山地及丘陵地，但就欠缺海拔1,000米以上嘅山脈，整體視野遼闊。地形可大致劃分為北部、中央部和南部，北部及中央部由山脈組成；而南部地區則以盆地為主。
京都主要觀光地點之一嘅京都市位於京都盆地北部、三面環山。自從八世紀以來，呢座城市一直都保留著棋盤式街道布局。
京都府主要歷史
京都府於八世紀起成被定為日本首都，係一座歷史十分悠久嘅城市。即使12世紀時日本政治中心遷移至鎌倉，京都仍然作為經濟樞紐持續發展。直至在14、19世紀，京都再次成為政治中心，並逐漸進化成一座現代化都市。
京都有唔少知名寺院都建於八世紀，例如清水寺、仁和寺及平等院鳳凰堂等等（先後次序按建造年份）。
京都旅行建議日數
京都府主要可分為五個地區，編輯部建議各位可根據安排嘅景點數量以及遊覽地點嚟決定住宿天數。下文所介紹嘅每一個觀光地區大概需安排三日兩夜，如果想要一次前往多個地區觀光的話，就最好安排住宿3～4晚。
京都府最北端地區為丹後地區，而最南端則係山城地區。從丹後地區最北嘅「京丹後市・久美濱站」搭火車到山城地區嘅主要觀光地「宇治市・宇治站」的話，單程就約需要三個半鐘頭。
考慮到移動時間以及各觀光景點停留嘅時間，我哋建議您預留一個禮拜以上嘅時間行程，先能夠充分感受到京都府嘅魅力。
京都觀光地區
京都府觀光地區可分為下列五個區域，您亦可以到京都府各城市觀光網站首頁下載到各地區嘅觀光地圖。
如需要京都地區觀光地圖，則可以前往京都車站內嘅京都綜合觀光諮詢處(京都総合観光案内所)索取。
| 觀光區 | 特色 |
| 丹後 (天橋立 等) | 風景名勝、溫泉勝地 |
| 中丹 (福知山城 等) | 自然景點眾多 |
| 南丹 (保津川 等) | 鄰近京都市、自然資源豐富 |
| 京都市 (京都車站 等) | 坐擁15個世界遺產 |
| 山城 (宇治) | 茶之京都 |
丹後（天橋立 等）
丹後位於京都府北部。該地區以丹後半島京丹後市為中心，亦係一處著名嘅風景名勝及溫泉勝地。
云云景點中，最出名嘅就必定係天橋立及立岩。天橋立係日本三景之一，而立岩則係一座高20米嘅獨立天然岩石，為當地風景名勝之一。
中丹（福知山城 等）
中丹位於丹後下方，由福知山、舞鶴及綾部市組成。中丹地區環保巒山、大海等自然景色，因此唔少旅客都會專程嚟體驗健行、乘搭觀光船等等熱門活動。
此外，該地區內亦座落著福知山城、安國寺等等歷史悠久嘅建築物。
南丹（保津川 等）
南丹與京都市相鄰，區內遍佈溪谷、原始森林等多個自然景觀，亦林立著多間神社及佛。
如果您下次要嚟南丹旅行的話，就請您唔好錯過滑翔傘、激流泛舟等等充滿京都自然風光嘅戶外活動。特別值得一提嘅係，保津川激流泛舟遊船路線覆蓋從龜岡到京都熱門觀光景點「嵐山」，最長可達16公里，保證可以為您帶嚟萬分刺激！
此外，有「另一個京都」之稱嘅美山町亦係南丹一大睇頭。您可以喺美山町搵到由多間茅草屋頂民家組成嘅村落，一邊欣賞茅草屋與周圍自然風光。
京都市（京都車站 等）
京都市位於京都府中部，該地區以京都車站為中心，區內有多個獲列為世界遺產嘅著名觀光景點。
京都市另一個特徵就係，即使同樣位處京都市內，但各個觀光地區都各具特色。
例如河原町就係京都最大嘅商業鬧區，遊客一般都以購物為主要觀光目的。
其他如祇園及東山亦係京都代表性觀光地。街上林立著多間傳統町家建築及店舖，並坐擁八坂之塔、清水寺等神社佛寺。
如果想要喺京都享受遠足行山樂趣的話，咁嵐山或鞍馬地區就會係您嘅好去處。
山城（宇治 等）
山城位於京都府南部。山城由12個市町村組成，有「茶之京都」嘅別稱。呢到更係日本名茶「宇治茶」嘅發源地，當地集結咗多間相關名店。
您亦可以喺山城內搵到多間神社或佛寺，其中最著名嘅就必定係獲列為世界遺產嘅「平等院」。遊客可以喺平等院內欣賞到國寶「鳳凰堂」及日式庭園。
京都旅行應該點樣選擇住宿？
京都府內住宿設施多不勝數，而且每個地區都各具特色，住宿選擇由高級酒店到民宿都一應俱全。
| 觀光地區 | 特色 |
| 丹後（天橋立 等） | 溫泉住宿設施充足 |
| 中丹（福知山城 等） | 民宿林立 |
| 南丹（保津川 等） | 以料理旅館、溫泉旅館等袖珍住宿為主 |
| 京都市（京都車站 等） | 酒店選擇多 |
| 山城（宇治 等） | 以旅館、民宿等價錢實惠住宿為主 |
想搵平價酒店，不妨先從京都市內嘅京都車站周邊、或山城地區等地著手。由於京都面積相當廣闊，因此與其按budget搜尋，我哋會建議先鎖定您想要下榻嘅觀光地區，再進一步搜尋適合嘅住宿。
京都府著名溫泉地及溫泉旅館
講到京都府溫泉，就不得不提京都市內以及鄰近日本海嘅京丹後市，上述兩地皆以擁有豐富溫泉資源而見稱。您可以喺位處京都市山區嘅「嵐山」附近搵到多間溫泉旅館，常見價格為一晚20,000～30,000日圓。（資訊截至2020年1月）
| 溫泉地 | 特色 | 主要旅館 |
| 嵐山溫泉 | 鄰近京都市區 | 渡月亭 |
| 湯之花溫泉 | 位於京都市西北部龜岡市山區 | Sumiya龜峰菴 |
| 天橋立溫泉 | 位於京都府北部著名觀光勝地天橋立 | 天橋立離宮星音 |
| 久美之濱溫泉郷 | 位於京都府北部京丹後市、靠近海邊 | 碧翠御苑 |
| 間人溫泉郷 | 位於京丹後市沿海、以間人蟹聞名 | 間人溫泉 炭平 |
出發京都旅遊前必睇實用資訊
京都市擁有相當豐富嘅觀光景點，因此編輯部建議喺出發前先去旅遊諮詢處蒐集資訊，咁就可以更加得心應手啦！為咗確保您嘅京都旅程更加充實，我哋亦建議您事先搵定派發地鐵路線圖嘅地點以及行李寄放處。
另外值得留意嘅係，京都市內所有7-ELEVEN及星巴克都已經登記為「京都街中觀光指南所」(京都まちなか観光案内所)。遊客可以喺店內免費索取店家周邊觀光景點資訊、交通資訊及地圖等等。
出發前先下載京都市地鐵路線圖
京都市內總共有4條地鐵路線。想要順利前往各大觀光景點？Download定地鐵路線圖就實無死！
您可以從京都市交通局網站首頁下載京都市地下鐵路線圖。
京都邊到可以寄放行李？
京都府內嘅車站大部分都設有投幣式儲物櫃，但可以存放大型行李嘅儲物櫃就比較少。由於京都市以外嘅地區一般都較難搵到投幣式儲物櫃或寄放行李嘅地方，因此建議最好事先查好相關資訊。
相反，要喺京都市內搵寄放行李嘅地方就相對較容易，尤其係京都車站周邊，以下為部分例子。
- JR京都站手提行李寄放處（Crosta京都・八条口・西口 日本旅行TiS京都西口支店）
- 京都中央郵局
- 京都塔 關西旅遊諮詢中心京都
- 京都站投幣式儲物櫃（24處・約4,200個）
費用方面，投幣式儲物櫃一次約300～700日圓，直接寄放手提行李的話則大約需要400～1,000日圓。（資訊截至2020年1月）
京都四季特色：天氣及行程重點
京都府北部與南部氣候截然不同。北部特徵為冬天降雪量多；相反南部夏季炎熱、冬季寒冷，遊客無論係邊個季節到訪都可以欣賞唔同嘅景色。
以下就要為大家介紹京都主要觀光地嘅氣候特色。
京都嘅春天（3〜5月）
京都春天平均氣溫約為攝氏14度。日頭雖然比較溫暖，但三月部分日子嘅早晚都仍然寒冷，因此建議帶上長袖。
春天時去京都嘅一大重頭戲當然要睇櫻花啦！每年四月左右，櫻花就係喺京都各地盛開；而5月中旬則會舉行京都三大祭典之一嘅「葵祭」。
京都嘅夏天（6～8月）
京都嘅夏季平均氣溫約為攝氏26度，就算早晚溫差都唔會太大，所以穿短袖就夠晒！唯一要留意嘅係夏季降雨量會比其他季節多。
京都市會喺夏天舉行多個祭典活動，例如7月嘅祇園祭、8月嘅七夕及京都五山送火，又或海水浴場開幕及花火大會等。
京都嘅秋天（9～11月）
秋天平均氣溫約為攝氏19度，9月及10月相對溫暖舒適，但11月嘅最低氣溫就有機會低於10度C，建議帶上長袖以備不時之需。
秋天係紅葉嘅季節，特別係11月下旬就更加係欣賞紅葉嘅最佳時機。屆時京都隨處都係美麗秋景，每個角落都開滿紅葉，其中位於京都市西北部嘅嵯峨野・嵐山地區，就係一大賞楓勝地。
京都嘅冬天（12～2月）
冬季平均溫度約為攝氏7度。氣溫雖然不至於會跌到零度以下，但最好都係著夠保暖嘅衫呀！
如果您係冬季到訪京都，夜間點燈活動會係非常值得一睇嘅節目。特別係京都市東山・嵯峨・嵐山地區嘅神社寺廟及觀光名勝夜間點燈，都係充滿夢幻氣氛嘅推薦地點呀！
京都行程攻略
您可以喺京都欣賞到多個文化財產又或體驗日本文化等等。以下係編輯部推介嘅部分例子。
- 欣賞歷史建築
- 於座敷與舞妓玩遊戲
- 於寺院體驗坐禪
- 到手信舖購買日式雜貨
- 一邊欣賞文化財產、一邊登山健行
接落嚟，我哋就會為您詳細介紹推薦嘅景點，請繼續睇落去啦～
京都之旅必睇神社佛寺
京都府坐擁多間神社及寺廟，其中又以京都市佔最多數量。遍佈市內各處嘅神社寺廟，有唔少都係獲認證為世界文化遺產或日本國寶嘅知名景點嚟㗎！
| 著名寺廟神社 | 特色 |
| 金閣寺 | 金色舍利殿 |
| 京都御所 | 歷任天皇曾於此居住超過500年 |
| 二條城 | 必睇國寶二之丸御殿 |
| 伏見稻荷大社 | 鮮紅色鳥居林立 |
| 清水寺 | 絕景舞台可以將京都市景盡收眼底 |
| 八坂神社 | 祇園祭嘅舉行地點 |
| 三十三間堂 | 長約120米嘅正殿內供奉著1,001尊千手觀世像 |
| 銀閣寺 | 採用雙層建築結構嘅觀音殿 |
金閣寺
金閣寺係位於北山嘅世界遺產寺院。其正式名稱為鹿苑寺，但由於其舍利殿鍍金嘅外觀，因此亦被稱為金閣寺。金閣寺倒映於水池中嘅優美姿態，亦係一大睇頭。
景點資訊
- 名稱：金閣寺（鹿苑寺）
- 地址：〒603-8361 京都府京都市北區金閣寺町1
- 交通方式：京都站前巴士站→[京都市營巴士急行101系統]約40分鐘→金閣寺道巴士站…徒步約5分鐘
- Wi-Fi：無
- 語言：中文 (簡體)、英文、韓文、法文、西班牙文
- 購票方式：現場購票
- 信用卡：不可使用
京都御所
京都御所位於京都市中心，於1331年到1869年期間曾被用作日本天皇住所。現時建築物內部重現出日本歷史各時代嘅建築風格，方便遊客一站式了解各時代變化。
景點資訊
- 名稱：京都御所
- 地址：〒602-8611 京都市上京區京都御苑3
- 交通方式：京都市營地下鐵京都站→[京都市營地下鐵烏丸線]約10分鐘→京都市營地下鐵今出川站…徒步約5分鐘
- Wi-Fi：無
- 語言：中文、英文
二條城
二條城位於京都市中心，係京都府世界遺產之一，城內嘅二之丸御殿更被列為國寶，屬頭號必看重點！需要注意嘅係，二之丸御殿內部禁止拍照；如果您持有地鐵一日券或巴士・地鐵一日券的話，就要記住喺售票處出示票券享用折扣優惠喇。
景點資訊
- 名稱：元離宮二條城
- 地址：〒604-8301京都市中京區二条通堀川西入二条城町541
- 交通方式：京都站→[市營地下鐵烏丸線]約6分鐘→烏丸御池站→[市營地下鐵東西線]約2分鐘→二條城前站…徒步即達／京都站前巴士站→[京都市營巴士101系統]約16分鐘→二條城前巴士站…徒步即達
- Wi-Fi：有（KYOTO Wi-Fi）
- 語言：中文（繁體/簡體）、英文、韓文、法文、西班牙文、德文
- 購票方式：現場購票
- 信用卡：可以使用VISA, MasterCard
伏見稻荷大社
伏見稻荷大社位於京都市南邊嘅伏見區，係一座歷史長達1,300年嘅古老神社。神社擁有本殿等超過10個重要文化財產，當中最為人熟悉嘅有由多座紅色鳥居並列而成嘅千本鳥居。
景點資訊
- 名稱：伏見稻荷大社
- 地址：〒612-0882京都市伏見區深草藪之內町68番地
- 交通方式：JR京都站→[JR奈良線]約5分鐘→JR稻荷站…徒步即達
- Wi-Fi：無
- 語言：中文（繁體／簡體）、英文、韓文
- 信用卡：不可使用
清水寺
清水寺位於京都市東邊，除咗係世界遺產之一，亦係京都最著名嘅觀光景點之一。本堂設有一個高13米嘅清水舞台，視野極佳。
景點資訊
- 名稱：清水寺
- 地址：〒605-0862 京都市東山區清水1-294
- 交通方式：京都站前巴士站→[京都市營巴士206系統]約15分鐘→五條坂巴士站…徒步約10分鐘
- Wi-Fi：有（KYOTO Wi-Fi）
- 語言：英文
- 購票方式：現場購票
- 信用卡：不可使用
八坂神社
八坂神社位於京都市東邊嘅祇園，以京都三大祭之一嘅祇園祭而聞名。本殿建於17世紀，現時獲列為重要文化財產之一。
景點資訊
- 名稱：八坂神社
- 地址：〒605-0073 京都市東山區祇園町北側625
- 交通風勢：京都站前巴士站→[京都市營巴士206系統]約20分鐘→祇園巴士站…徒步即達
- Wi-Fi：無
- 語言：英文
- 信用卡：不可使用
三十三間堂
三十三間堂位於京都車站東邊，屬蓮華王院本堂。本堂建築南北長約120長，內部供奉著1,001尊千手觀音像。三十三間堂亦係國寶之一。
景點資訊
- 名稱：蓮華王院 三十三間堂
- 地址：〒605-0941 京都市東山區三十三間堂廻町657
- 交通方式：京都站前巴士站→[京都市營巴士206系統]約10分鐘→博物館三十三間堂前巴士站…徒步即達
- Wi-Fi：無
- 語言：僅限日文
- 購票方式：現場購票
- 信用卡：不可使用
銀閣寺
銀閣寺位於東山。獲列為世界遺產嘅銀閣寺建於15世紀，觀音殿外觀雖樸素但叫人看得入迷。寺院內嘅東求堂同樣亦獲列入國寶之列。
景點資訊
- 名稱：銀閣寺（慈照寺）
- 地址：〒606-8407 京都市左京區銀閣寺町2
- 交通方式：京都站前巴士站→[京都市營巴士5系統]約30分鐘→銀閣寺道巴士站…徒步約10分鐘
- Wi-Fi：無
- 語言：中文 (簡體)、英文、韓文、法文、西班牙文
- 購票方式：現場購票
- 信用卡：不可使用
京都必去觀光景點
京都觀光重點又點只寺廟神社？以下就係您值得發掘嘅其他京都觀光景點。
| 著名景點 | 特色 |
| 京都塔 | 聳立於京都車站前方、為京都地標之一 |
| 京都國立博物館 | 重要文化財產建築物 |
| 京都各大日本庭園 | 以神社及私家庭園而聞名，附設京都府立植物園 |
| 錦市場 | 有「京都廚房之稱」嘅商店街 |
| 京都水族館 | 精彩海豚表演 |
| 京都鐵道博物館 | 體驗乘搭蒸氣機關車 |
| 京都市動物園 | 開放黑猩猩研究情況予遊客參觀 |
當然，除咗上述著名景點之外，京都府仲有好多美術館、博物館、自然風景等景點㗎。
京都塔
京都塔係佇立於JR京都站烏丸中央出口正前方嘅建築物，總高約131米。遊客可以從展望台俯瞰到京都市全景。三樓嘅關西旅遊諮詢中心京都提供寄存行李服務。
景點資訊
- 名稱：京都塔
- 地址：〒600-8216 京都市下京區烏丸通七条下る東塩小路町721-1
- 交通方式：京都站…徒步約2分鐘
- Wi-Fi：有（KYOTO Wi-Fi）
- 語言：中文（繁體/簡體）、英文、韓文
- 購票方式：現場購票
- 信用卡：VISA, Master Card, JCB
京都國立博物館
京都國立博物館位於東山區，館內主要收藏古董美術品、考古學資料等文化財產。展品以外，獲列為重要文化財產嘅博物館象徵「紅磚建築明治古都館」以及「正門」等等亦值得抽空參觀。
景點資訊
- 名稱：京都國立博物館
- 地址：〒605-0931 京都市東山區茶屋町527
- 交通方式：京都站前巴士站→[京都市營巴士206系統]約10分鐘→博物館三十三間堂前巴士站…徒步即達
- Wi-Fi：有（KYOTO Wi-Fi）
- 語言：中文、英文、韓文
- 購票方式：現場購票
- 信用卡：可以使用VISA, Master Card, JCB, AMERICAN EXPRESS, Diners Club, 銀聯卡
京都各大日本庭園
京都府坐擁多個日本庭園，當中大部分為寺院神社附屬，另外亦有部分歸私人擁有，例如由某位日本電影明星所建造嘅「大河內山莊」庭園就係著名庭園之一。
景點資訊
- 名稱：大河內山莊庭園
- 地址：〒616-8394 京都市右京區嵯峨小倉山田渕山町8
- 交通方式：京都站前巴士站→[京都市營巴士28系統]約45分鐘→野之宮巴士站…徒步約10分鐘
- Wi-Fi：無
- 語言：僅限日文
- 購票方式：現場購票
- 信用卡：不可使用
錦市場
錦市場位於京都市區東邊嘅河原町。被稱為「京都廚房」嘅錦市場係一條長約390米嘅商店街，街上店舖除咗出售漬物、菓子等京都特產，亦有售賣烹飪器具及生活雜貨等。
景點資訊
- 名稱：錦市場
- 地址：〒604-8054 京都市中京區錦小路通
- 交通方式：京都站→[市營地下鐵烏丸線]約4分鐘→四條站…徒步約3分鐘
- Wi-Fi：無
- 語言：僅限日文
- 信用卡：可以使用（依店舖而異）
京都水族館
京都水族館位於京都車站西邊嘅梅小路公園內。館內將京都河流及里山環境重現於遊客眼前，並展出大山椒魚等稀有生物。
景點資訊
- 名稱：京都水族館
- 地址：〒600-8835 京都市下京區觀喜寺町35-1
- 交通方式：京都站…徒步15分鐘 / JR京都站→[JR山陰本線]約2分鐘→梅小路京都西站…徒步約7分鐘
- Wi-Fi：有
- 語言：中文（繁體/簡體）、英文、韓文
- 購票方式：現場購票、便利商店購票、其他
- 信用卡：可以使用
京都鐵道博物館
京都鐵道博物館係一間位於京都車站西邊嘅鐵道綜合博物館。博物館不單展出著實際使用過嘅車卡以及駕駛模擬器等，同場亦有提供乘搭蒸汽火車體驗。
景點資訊
- 名稱：京都鐵道博物館
- 地址：〒600-8835 京都市下京區觀喜寺町
- 交通方式：JR京都站→[JR山陰本線]約2分鐘→梅小路京都西站…徒步約2分鐘
- Wi-Fi：有（museum[SL~TEC]）
- 語言：中文（繁體/簡體）、英文、韓文
- 購票方式：現場購票、便利商店購票、其他
- 信用卡：可以使用
京都市動物園
位於左京區嘅京都市動物園，係日本第二歷史悠久嘅動物園。園內飼育著約130種、580隻動物。京都市動物園有關黑猩猩嘅研究格外蓬勃，遊客可以喺園內參觀日常研究概況。
景點資訊
- 名稱：京都市動物園
- 地址：〒606-8333 京都市左京區岡崎法勝寺町
- 交通方式：京都站→[京都市營巴士5・32・100・110系統]約30分鐘→岡崎公園動物園前巴士站…徒步2分鐘
- Wi-Fi：有
- 語言：中文、英文、韓文
- 購票方式：現場購票
- 信用卡：可以使用（依店舖而異）
京都推薦購物景點：時尚潮流篇
如果您有打算到京都府購物，咁京都市就會係您嘅頭號目標，事關京都市集結咗百貨公司、購物商場等購物熱點，方便您一站式搜羅各式各樣嘅服飾衣物。
| 店名 | 特色 |
| 京都高島屋 | 集結眾多國際及高級品牌 |
| 大丸 京都店 | 貨品多為標價數萬日圓嘅單品 |
| 京都駅前地下街 Porta | 以20至30歲顧客為主要客群 |
| LAQUE 四條烏丸 | 以30至40歲顧客為主要客群 |
| 京都UNIQLO | 於京都府內擁有21間分店嘅快時尚連鎖店 |
想要搜羅成熟風格服飾嘅讀者，編輯部會向您推薦「京都高島屋」、「大丸 京都店」或「LAQUE 四條烏丸」。特別係「京都高島屋」、「大丸 京都店」，更貼心地設有專門為外國人而設嘅電話傳譯及中文傳譯等完善服務。
另一方面，年輕一輩則可到「京都站前地下街Porta」、「京都UNIQLO」。好似京都河原町店嘅「京都UNIQLO」，就提供大量平價衫褲鞋襪，您仲可以製作獨一無二嘅T恤𠻹！
京都推薦購物景點：雜貨篇
京都府內雲集多間走古樸風格嘅日式雜貨店、又或出售時髦西洋雜貨嘅店舖。除此之外，您亦有機會體驗自己手工製作雜貨，又或者探索各式各樣嘅漫畫、動畫相關商品。
| 店名 | 特色 |
| 京都手工藝品中心 | 提供京都傳統工藝品製作體驗 |
| 京都LOFT | 出售文具及吉祥物商品 |
| ANIMATE京都 | 動漫遊戲專門店 |
| 京都國際漫畫博物館 | 出售各式博物館原創商品 |
| Pokemon Center京都店 | 以官方Pokemon商品為主 |
| ASTY京都 | 京都手信雲集嘅車站大樓 |
如果要購買各式各樣的日本動漫產品，可以前往「NIMATE京都」；如果想要尋找京都的工藝品或是著名的甜點，則推薦「ASTY京都」。
想要參加製作手工藝品嘅寶貴體驗的話，就千祈唔好錯過「京都手工藝品中心」。溫馨提示：記得出發前先預約體驗喎！
於京都體驗各式日本文化
遊客可以喺京都府體驗各式各樣嘅日本文化，以下為部分推介。
| 體驗內容 | 特色 |
| 和服試穿 | 穿上和服於街上漫步、拍攝紀念照 |
| 藝伎耍樂 | 與舞伎或藝伎玩遊戲 |
| 料理教室 | 用英文學做日本料理 |
| 京都祭典及活動 | 觀賞街上巡遊山車 |
| 瑜珈 | 同時體驗瑜珈及坐禪 |
| 啤酒工房 | 參觀工房後試飲啤酒 |
| 卡拉OK | 店舖數量選擇眾多 |
| 坐禪 | 用英文體驗坐禪 |
京都和服出租店
京都市內有多間提供和服租借嘅店舖。店家已經為您準備好所有和服相關物品，只要兩手空空就可以輕鬆參加！
| 店名 | 特色 |
| 京都和服租借Wargo | 和服種類豐富而且租金實惠 |
| 岡本和服租借 | 京都町家建築充滿日式風情 |
| STUDIO心 | 提供舞伎及花魁裝扮 |
| 寺町美人 | 可以延長租借時間又或隔日歸還 |
想要以實惠價格租借和服的話，編輯迎推薦「京都和服租借wargo」（京都きものレンタルwargo）；如果想由專業攝影師為您拍攝和服照的話，「STUDIO心」則會係好選擇。
與京都藝妓玩遊戲
嚟到京都府，一定要體驗跟藝者（藝子・舞妓）玩遊戲！例如「座敷體験 宴」就設有用英文同舞妓玩遊戲嘅體驗。
店家亦有提供素食或清真料理，建議於希望體驗嘅日子前一到兩星期先行預約會比較穩陣。
景點資訊
- 名稱：座敷體験「宴- UTAGE-」
- 地址：〒605-0811 京都府京都市東山區大和大路通四條下る東入小松町594−3
- 交通方式：JR京都站→[JR奈良線]約2分鐘→東福寺站→[京阪本線]約5分鐘→京阪祇園四條站…徒步約10分鐘
- Wi-Fi：無
- 語言：英文
- 購票方式：現場購票
- 信用卡：可以使用
京料理・日本料理教室
京都市內有多間以英文教學嘅日本料理教室。一般而言，每間教室都大約需要於上堂前一到兩星期前預約。
| 推薦料理教室 | 特色 |
| Academy Kyoto (アオガミキョウト) | 使用當地食材製作家庭料理 |
| COOKING SUN | 町屋建築充滿日式風情 |
| 料理教室HARU | 於私人住宅內開班，予人賓至如歸感覺 |
| Uzuki Cooking Classes in Kyoto | 提供純素或素食日本料理製作課程 |
約3～4小時料理教室費用為成人每人約7,000～8,500日圓。（資訊截至2020年1月）
京都各大祭典
京都府有多個歷史悠久嘅祭典，當中又以「京都三大祭」規模龐大且場面壯觀而為人熟悉。
| 著名祭典 | 舉辦時期 | 特色 |
| 葵祭 | 5月 | 京都三大祭之一。由500人組成嘅巡遊隊伍可長達1公里！ |
| 祇園祭 | 7月 | 京都三大祭之一。於整個七月內舉辦各種大大小小嘅儀式祭典。 |
| 時代祭 | 10月 | 京都三大祭之一。巡遊隊伍會帶上日本歷史上八個唔同時代嘅服裝打扮及祭典用具。 |
| 五山送火 | 8月 | 山坡上出現以篝火描畫而成嘅巨大文字。 |
| 伏見稻荷大社 火焚祭 | 11月 | 於傍晚演奏嘅「御神樂」係必睇重頭戲。 |
除咗上述推介之外，當地仲有好多季節祭典。出發前往京都之前，不妨先到京都府網站首頁查詢最新資訊！
京都夜生活
京都府夜生活唔只限於同藝妓玩遊戲，仲有好多大型夜總會同酒吧畀你選擇！例如每逢夏季，鴨川河畔旁都會搭起稱為「川床」嘅露台，唔少當地人都會一邊乘涼一邊飲酒㗎。
京都嘅夜晚安全嗎？
京都府犯罪率逐年下降。特別是外國人經常遇到嘅搶手袋或扒竊案，都比10年前減少將近三分之一。官方亦積極實施警民互相合作嘅預防犯罪對策，因此京都入夜後嘅治安可以話係相對安全。
京都美食與餐廳
京都府美食以日式料理居多，例如知名嘅料理就有「精進料理」、「湯豆腐」、「鯖魚壽司」等等。遊客可以喺京都唔少地方可以品嚐到呢啲料理，當中又以祇園、鴨川沿岸一帶特別多相關餐廳。
京都壽司店
如果想喺京都市內食壽司，您可以前往迴轉壽司店、或係有吧台座位嘅壽司店。例如迴轉壽司店「無添藏壽司 二条店」，最低只需要100～200日圓就可以食到一貫壽司。
另外，如果您係想食壽司套餐的話，編輯部會推薦「祇園 鮨 忠保」或「鮨 かわの」。上述兩間店舖價格範圍大約為5,000～33,000日圓。（資訊截至2020年1月）
京都府丹後地方內有一種名為「散壽司」(ばらずし)嘅鄉土料理。佢係一種喺醋飯撤上又甜又鹹嘅鯖魚魚乾、香菇、雞蛋絲、紅生薑等製成嘅料理。丹後地方同時亦有好多鄉土料理嘅名店，尤其係京丹後市更係一大集地。每家店舖價位約從500至2,000日圓不等。
京都拉麵店
京都府拉麵喺日本被稱為「京都拉麵」，以香濃醬油味及濃厚雞湯湯底見稱。
| 店名 | 特色 |
| 馬鹿一代噴火拉麵 (めん馬鹿一代) | 招牌菜單「噴火拉麵」用上大量京都九条蔥製成 |
| 新福菜館本店 | 京都最早嘅拉麵店。醬油味中華拉麵為頭號招牌菜 |
| 京都 本家 第一旭本店 | 以叉燒肉及麵條搭配醬油湯底而成嘅拉麵非常美味 |
| Masutani (ますたに) | 醬油雞湯拉麵及細長麵條 |
雖然各家店舖嘅湯底濃度都大致相同，但由於麵條粗細及配料都各具特色，因此如果時間足夠的話，絕對值得試多幾間唔同嘅拉麵店、互相比較一下口味！一份拉麵大約盛惠600至2,000日圓。（資訊截至2020年1月）
京都米芝蓮星級餐廳
包含包括獲得「必比登推介」嘅餐廳在內，京都府內有份獲米芝蓮美食指南星級認證嘅餐廳大約有200間，例如「瓢亭」就係一間擁有400年歷史嘅老字號懷石料理店。西餐方面的話，則推薦「Hiramatsu高台寺」(ひらまつ高台寺) 、「RISTORANTE CHIMERA」(リストランテ キメラ)等實力分子。
京都烏冬・定食等日式料理店
京都有各種各樣嘅日式料理店。由於連鎖店較少，因此遊客可以趁機品嚐到唔少京都獨有嘅特色料理。
烏冬舖的話推薦「山元麵藏」，京料理的話則推薦「ごはん処 矢尾定」、「京菜味のむら」。兩者預算均為約900〜1,300日圓。（資訊截至2020年1月）
京都café
京都內遍佈多間大大小嘅咖，以及可品嚐到日式甜品嘅嘅café等等。
其中特別受人矚目嘅，就必定係喺日本全國各地都有分店嘅「星巴克」分店之一「星巴克京都二寧坂茶屋店」。二寧坂分店同其他普通分店一樣，都歡迎顧客於店內享用咖啡及蛋糕，唯一唔同嘅就係店舖由百年老屋改裝而成，古樸外觀與京都老街風情融合得恰到好處。
唔單只係懷舊外觀，其內部亦充滿濃濃日式風情，您甚至可以喺坐喺榻榻米上飲咖啡𠻹！
另外推薦「祇園羊咖啡」(祇をん ひつじカフェ)亦係一大推介。行到攰，您都不妨嚟到呢個充滿京都氣息嘅寧靜空間內，嘆返杯美味咖啡吖。
京都特色餐廳
難得嚟到京都旅行，除了經典餐廳係必食，您又有無諗過嘗試一下風格獨特嘅餐廳呢？
| 餐廳名 | 價位 |
| 壹錢洋食 | 210～800 日圓 |
| 士心 武士餐廳(士心 サムライレストラン) | 1,200～10,000日圓 |
| The洋食屋Kichi Kichi (ザ・洋食屋キチキチ) | 1,500～3,250日圓 |
壹錢洋食本身係一間陶藝品店，後來改建為大阪燒專門店。店內及店外放有別樹一格嘅人形模特兒。
「士心 武士餐廳」店內以盔甲及刀劍作裝飾，提供多款以武士為主題嘅特色菜式。
「The洋食屋Kichi Kichi」設有開放式廚房，食客可以現場欣賞蛋包飯製作過程。（資訊截至2020年1月）
京都早餐推薦餐廳
想喺京都市食早餐的話，您可以有鬆餅、日式早餐、自助餐放題等豐富選擇。日式早餐推薦「丹」、「喜心」；鬆餅等西式早餐的話，則推薦「Okaffe Kyoto」、「Cafe＆Pantry 松之助」。
想享受放題自助早餐的話，唔少酒店都有附設嘅餐廳就會係您嘅首選！
京都著名甜品店
京都府抹茶甜品非常出名。無論係日式定西式甜點都儲落一大班粉絲。例如「茶寮都路里」，就提供即叫即做芭菲，歡迎食客自行選擇以抹茶蜂蜜蛋糕或抹茶朱古力等做配料。
又例如「祇園小石 甘味處」，就除咗出售抹茶，仲提供餡蜜(あんみつ)等日本特有甜品。價格大約為630～1,500日圓左右。（資訊截至2020年1月）
京都推薦酒店
京都市住宿選擇五花八門，由入選「米芝蓮指南」評鑑嘅五星級酒店到膠囊旅館都有。以下就為大家介紹唔同價位嘅精選推薦酒店。
京都四星級及五星級酒店
京都府內嘅五星級、四星級酒店大多集中於遠離市中心、氣氛寧靜嘅京都市東山地區。價位大約為一晚10,000～90,000日圓之間。（資訊截至2020年1月）
| 酒店名稱 | 特色 |
| 京都大倉酒店 (京都ホテルオークラ) | 米芝蓮指南榜上有名嘅高質酒店 |
| 京都世紀酒店 (京都センチュリーホテル) | 鄰近京都車站、地點方便 |
| 京都麗思卡爾頓酒店 (ザ・リッツ・カールトン京都) | 會舉辦各種為住客而叔嘅豐富活動 |
| 京都凱悅酒店 (ハイアットリージェンシー京都) | 房間採用日式風格、功能完善 |
| 京都四季酒店 (フォーシーズンズホテル京都) | 擁有歷史長達800年嘅庭園 |
| 京都威斯汀都酒店 (ウェスティン都ホテル京都) | 鄰近東山觀光景點 |
| 京都藝術夢禪酒店 (ART MON ZEN KYOTO) | 由藝術品商家經營、走藝術風格 |
京都經濟實惠酒店
京都市經濟型酒店通常位於交通方便嘅地段，要前往觀光景點非常容易，而且仲有唔少酒店都充滿特色𠻹！價格大約為一晚8,000～12,000日圓。（資訊截至2020年1月）
| 酒店名稱 | 特色 |
| 京都格蘭比亞酒店 (ホテルグランヴィア京都) | 酒店主辦嘅特色旅遊團深受旅客歡迎 |
| 京都格蘭貝爾酒店 (京都グランベルホテル) | 可以欣賞舞妓表演 |
| 京都東急酒店 (京都東急ホテル) | 位於車站西邊、方便觀光 |
| 京都布萊頓酒店 (京都ブライトンホテル) | 位於京都中心地段 |
| 京都十字酒店 (クロスホテル京都) | 鄰近觀光地區、地點便利 |
| 京都索拉利亞西鐵尊貴酒店 (ソラリア西鉄ホテル京都プレミア) | 客房可以眺望到鴨川景色 |
| 京都祇園賽萊斯廷酒店 (ホテル ザ セレスティン京都祇園) | 客房梳妝用品非常講究 |
京都膠囊旅館
京都市充滿多間特色膠囊旅館，當中以河原町周邊特別多選擇，遊客要前往各地觀光都非常方便。價格每晚約為2,200～5,000日圓。（資訊截至2020年1月）
| 酒店名稱 | 特色 |
| Smart Stay SHIZUKU | 獨家床墊十分舒適 |
| 京都河原町格蘭斯特酒店 (グランジット京都河原町) | 鄰近祇園、錦小路、觀光方便 |
| 京都九小時旅館 (ナインアワーズ 京都) | 未來風格膠囊旅館 |
| Comicap京都新京極店 (コミカプ 京都新京極店) | 幾萬本漫畫任睇 |
| 京都百夫長膠囊間膠囊旅館及Spa (センチュリオン キャビン＆スパ) | 室內空間融入和風元素 |
| 京都廣場膠囊旅館 (カプセルリゾート 京都スクエア) | 膠囊房間設有加長床鋪 |
| 背包客京都膠囊旅館 (バックパッカーズ カプセル旅館京都) | 人氣酒店、超難預約 |
京都Airbnb與青年旅館
京都市民宿大部分都集中於京都車站到烏丸通一帶。常見價格範圍約為每晚2,000～3,000日圓，相當實惠。
市內亦有唔少hostel選擇，例如「旅寛HOSTEL 祇園」、「京都莫里斯旅舍（京都モーリスホステル）」、「京都四條河原町格利茲 （ホステル グリッズ京都）」等。常見價格範圍約為每晚2,000～4,000日圓。（資訊截至2020年1月）
京都特色酒店
京都有唔少特色酒店都會為住客精心打造各種主題式套房。
| 酒店名稱 | 特色 |
| 京都三條格拉斯麗酒店 (ホテルグレイスリー京都三条) | 歌舞伎主題套房 |
| 京都安迪魯酒店 (ホテル アンテルーム 京都) | 「藝術房間」由多位藝術家親手設計 |
| MIMARU美滿如家飯店京都 (MIMARU京都) | Pokemon主題套房 |
京都情趣賓館
京都府約有80家情趣賓館，大多集中於京都車站到南側伏見區一帶。定價範圍相對較廣，價錢由大約4,000～30,000日圓之間都有選擇。情趣賓館設備完善、梳洗用品豐富。（資訊截至2020年1月）
京都交通相關資訊
京都府與各地區之間交通方式懶人包如下。
如何前往京都？
從關西國際機場前往京都府（京都市）非常方便。只邢從關西機場乘搭關西空港交通巴士，約1小時30分即可抵達JR京都站。
京都巴士地鐵網絡夠晒方便（但同時亦都好逼…）
京都市觀光景點散落於各個區域，因此觀光時建議使用公共交通工具。
話雖如此，京都市公共交通普遍都非常擠逼，因此配搭巴士或地鐵一齊使用會比較好。喺呢種情況下，編輯部會建議您最好購買地鐵/巴士一日票（京都巴士一日券）。
費用為一日券900日圓、二日券1,700日圓。
除咗地鐵，如果您亦需要使用到JR的話，則可以選擇「暢遊京都・京都鐵道券」(Kyoto JR pass)。只要係京都市營地下鐵・JR西日本・阪急・京阪・嵐電指定搭乘範圍內，您就可以一日之內無限次乘搭以上列車。票價為1,300日圓，惟需要注意本張票券並不包含巴士無限次乘搭。（資訊截至2020年1月）
如何從京都前往日本其他主要車站及主要觀光地
從京都站前往日本國內其他觀光地嘅交通方式如下。
| 主要站名 | 交通路線 | 所需時間 |
| 東京 | JR東海道新幹線 | 約2小時20分鐘所需時間 |
| 大阪 | JR東海道新幹線 | 約13分鐘 |
| 奈良 | JR奈良線 | 約1小時1分鐘 |
| 廣島 | JR東海道新幹線 | 約1小時45分鐘 |
| 關西機場 | 關西機場交通巴士 | 約1小時30分鐘 |
Comments