Day 3~4 山形藏王溫泉、樹冰、滑雪
由仙台坐巴士出發到藏王, 車程大約一個鐘。望住沿路景色，由原本一片焦黃色嘅枯樹森林，慢慢接近白茫茫嘅藏王雪山，好似一次過欣賞晒秋天冬天美景咁～
藏王溫泉
我哋今次住嘅旅館係「五感之湯TSURUYA(五感の湯 つるや )」，位置方便，喺正藏王溫泉巴士轉運站嘅對面。
旅館嘅溫泉風呂全部都係自家源泉100%天然溫泉，源泉嘅酸鹼度為pH1.5，呢個pH值排行全日本溫泉第2名！除咗大浴場同露天溫泉, 仲有另外4間私人溫泉風呂：洞窟之湯、北斗寢湯、木香之湯、惠之湯。如果想預約私人溫泉風呂，可以詢問櫃檯職員可預約時段，之後留低你嘅房間號碼就OK㗎喇。
今次我哋就試左木香之湯，浸落去感覺好易適應，比起其他哋方嘅溫泉無咁高溫，原來係因為旅館全部嘅溫泉風呂都係直接自然湧流出嘅溫泉，無經過加溫加水，所以源泉溫度大約52度。一路浸仲可以一路欣賞窗外落嘅雪，好寫意！
除咗溫泉之外，每次入住溫泉旅館令人期待嘅仲有——旅館晚餐！「五感之湯TSURUYA」用山形名產同當季食材用心製作唔同嘅山形鄉土料理。今次我哋享用嘅係藏王牛shabu shabu！湯底係昆布高湯，因為材料新鮮，材料自身嘅鮮味已經非常足夠，唔使用上濃味嘅湯底。藏王牛肉好大塊，油脂分佈平均，配上一碗山形大米煮成嘅白飯，係幸福嘅味道，超級滿足～除咗主菜之外，仲有好多道料理，非常精緻，俾我哋試到好多山形出產嘅新鮮食材。
乾杯～
享受完shabu shabu後，我哋就坐shuttle bus去睇藏王樹冰。樹冰係日本東北限定嘅奇景——冬季嘅時候藏王山頂嘅松樹俾白雪包覆，變成好似一個個矗立喺冰原雪地上嘅雪怪。要近距離欣賞佢哋就要坐藏王纜車登山。纜車一共分成兩節：第一節登上高原站，接續第二節就會登上山頂站。
雖然遇上寒風真係好凍，但係可以漫步喺一望無際嘅雪地，真係覺得自己去咗童話世界咁！
呢張相係我哋回程時去咗等候室，圍住暖爐取暖解凍嘅時候XD 好期待第二日喺呢度玩snowboard!
Day 4 SNOWBOARDING!
由房間眺望如詩如畫嘅雪山景色
首先出發去食早餐為一陣嘅活動準備能量。早餐一樣好豐富，有豆腐金菇shabu shabu、三文魚、玉子燒、薯仔沙律等嘅各種和風料理。
黎到期待以久嘅滑雪時間！！！我哋到達嘅時候唔同學校嘅滑雪班都名額全滿，好感激我哋嘅FUN!JAPAN Cody Sensei (日文意思為老師) 提出由佢親身上陣教我哋snowboard！
著好裝備，準備好就開始喇～
今次係我第一次玩snowboard，果然好似朋友所講咁，要學識自己企起身都有難度～所以要靠人拉起我先企到起身，不過滑落去嘅時候真係好爽、好好玩。好彩因為前一晚有落雪，雪質都幾粉，所以跌倒都唔係好痛。
我哋玩得好開心～多謝Cody！決定下個冬天都要再繼續挑戰！
Comments