立教大學嘅「書面審查」制度令外國籍留學生唔需要特登嚟日本，都可以報考入學考試。
實際上亦係頗受外國留學生歡迎嘅學校，留學生人數大約1000人左右，並設有祈禱室等設施。
同其他日本嘅大學相比，立教大學嘅就職率較平均值高出約10個百分點。
FUN! JAPAN團隊成員實際造訪立教大學，專訪來自海外嘅外國籍留學生。
--
FJ：你好，請同大家打個招呼，自我介紹。
Alyssa：大家好，我係來自馬來西亞嘅Alyssa。嚟日本大約3年，一開始就讀亞細亞文化會館（ABK）日本語學校。而家則係立教大學跨文化交流學科（College of Intercultural Communication，簡稱CIC）嘅二年級學生。
FJ：立教大學係一個點樣嘅地方呢？學習嘅環境如何呢？
Alyssa：校園好靚，特別係本館（１號館／莫里斯館）相當迷人有魅力。
喺我選修嘅學科當中有好多節課堂都係我鐘意嘅。內容廣泛，教授對於專任教學科目嘅知識豐富，而且對教學充滿熱情。課堂生動有趣。
FJ：池袋站係日本車站當中使用人數排名第3嘅車站，校區鄰近池袋站應該好方便啦！
Alyssa：係吖！立教大學校區嘅地理位置真係好方便。附近有超市，亦有好食嘅餐廳。距離車站行路只要10分鐘之內就可以抵達。喺10分鐘嘅路程範圍入面，日常生活當中所需嘅物品幾乎都可以搵到。
再行遠一啲，仲有我特別鐘意嘅南池袋公園。落堂之後嘅自由時間，喺嗰度同朋友一齊悠閒度過，可以話係最正嘅地點。喺南池袋公園嘅草地上休憩真係好舒適。
FJ：妳喺學校係用日文上堂同讀書喇掛。日文如何呢？難唔難呢？
Alyssa：以我嘅狀況嚟講，一年級嗰陣，上課內容幾乎100%都係日文。我嘅課程係雙語授課，亦可以揀選使用英文上堂。二年級嗰陣自己選修咗60%嘅課堂為英語授課。
因為住喺日本，日常生活對話上無問題。但係，遇到好似係健康保險、開設銀行戶口、辦理簽證等正式場合使用嘅日文單字就會覺得有啲困難。特別係用到專有名詞嗰陣，要理解對話內容都相當唔容易。
FJ：大部分嘅時間你都喺邊度度過呢？點樣融入日本嘅大學生活呢？
Alyssa：平日唔係喺大學上堂，就係喺度打工。
我喺池袋站附近嘅觀光旅遊導覽中心打工。有好多可以練習日文對話嘅機會。
喺大學校園入面，如果無課堂，我通常喺名為「Global lounge」嘅休息室做功課或者係同朋友傾計。
放假嘅時候雖然都要打工，但有時都會安排日本國內或國外旅行。
講到喺呢度嘅交友圈，透過加入嘅社團「JOINUS」，認識結交咗唔少日本人同外國人嘅好朋友。呢個社團係日本人同外國留學生交流嘅社團，成日舉辦野餐、露營或聚餐、PARTY等活動，非常有趣㗎！
FJ：針對想到日本留學嘅外國學生，你有什麼建議呢？
Alyssa：我覺得如果有機會嘅話，好值得一試！對我嚟講，日本係一個有趣而且特別嘅地方，如果有機會嚟日本，建議以開放包容嘅心態接受吸收新文化。敞開心胸去認識新朋友以及嘗試新體驗。喺呢度同來自完全唔同背景嘅人相遇，令我從中學習到好多。喺呢度獲得嘅經驗，令我喺做人處事上都有所成長。
如果有讀者正喺度煩惱要唔要嚟日本留學，我會講唔好恐懼害怕風險，不妨親自嚟日本體驗一下如何呢！
Comments