漫畫家・末次由紀嘅少女漫畫「花牌情緣」以「競技歌牌」(かるた，又名競技歌留多)為題材，大受好評，相繼推出動畫版以及真人電影版。而電影版嘅女主角由年紀輕輕嘅廣瀨鈴所演繹，一度造成熱門話題。日本人對於「歌牌」嘅印象仲係細個時喺正月新年嗰陣，親朋戚友聚首一堂，愉快咁遊玩嘅日本傳統遊戲。大家至少都有玩過一次，然而大部分人都未必認識「競技歌牌」嘅歷史，規則同佢迷人之處。今次，我哋就為大家徹底介紹「競技歌牌」！
「競技歌牌」係？
「競技歌牌」係指以印有「小倉百人一首」（おぐらひゃくにんいっしゅ）嘅「歌牌」所進行嘅競技紙牌遊戲。「小倉百人一首」係由活躍於平安鐮倉時代嘅詩人・藤原定家精選嘅詩集，選出100名詩人嘅一首和歌彙集成冊。
「競技歌牌」使用印有100首和歌嘅「上句」同「下句」嘅花牌。當朗讀者讀出歌牌「上句」時、遊戲參賽者需要迅速尋找「下句」嘅搶奪歌牌，當自己持有嘅花牌清空曬嘅話就代表遊戲勝出。
「歌牌」除咗用咗「小倉百人一首」和歌，仲有用咗伊呂波短歌嘅「伊呂波歌牌（いろはかるた）」，兩種都係至今大受歡迎嘅傳統正月遊戲。
「競技歌牌」嘅發展歷史
「競技歌牌」係日本自古流行嘅傳統競技紙牌遊戲。於1904年（明治37年），由記者黒岩涙香（くろいわるいこう）確立統一其規則。其後，於大正時代至昭和初期，風靡日本全國，於1948年（昭和23年），營運全國比賽嘅「全日本歌牌協會」成立。其中以「名人戰・女王戰」，「全國歌牌錦標賽」，「全國競技歌牌女流錦標賽」最有睇頭。而喺滋賀縣嘅近江神宮所舉辦嘅「名人戰・女王戰」中脫穎而出嘅贏家有「名人・女王」之稱，每年呢場激烈嘅決賽戰都會喺電視公開直播。
「競技歌牌」比賽流程同規則
■比賽流程
1）個人賽事即係指1對1對戰。首先將100張印有百人一首嘅花牌反轉攪亂，然後雙方各隨機選取25張花牌。而呢啲牌被稱為「持牌（持ち札）」，將持牌分為3行，自由排列於自己陣營嘅榻榻米上面。靠近自己呢邊嘅稱為「自陣」，而靠近對方陣營嘅稱為「敵陣」。凈低嘅50張唔會喺比賽當中使用。
2）會有15分鐘嘅背默時間，喺呢段時間之內要背好放置於自陣以及敵陣共50張花牌嘅位置。
3）比賽開始前先向雙方，朗讀者鞠躬行禮，朗讀者會誦讀一首唔包含喺百人一首入面嘅序歌上下句。然後比賽開始。
參賽者喺聽完朗讀者所講嘅上句，就要鬥快搶對應下句嘅牌，先掂到花牌嘅人就算係成功「奪牌」。如果花牌屬於自陣，持牌就可以減少一張。但如果花牌屬於敵陣嘅話，就將自陣嘅其中一張牌作為「送牌（送り札）」交俾對方。重複呢段流程，當自陣嘅花牌清空就代表勝出。另外，所誦讀嘅和歌上句，下句並無出現喺榻榻米上面嘅牌被稱為「空牌（空札）」，全部一共50首。
■比賽注意事項
1）當朗讀者讀出和歌但無呢張牌嘅情況下，若唔小心掂到任何一張牌，會被視為「手誤」。如果係對方「手誤」嘅話，就可以從自己陣營中揀一張牌送俾對方。
另外，如果掂到同指定牌同一陣內嘅任何一處都唔會被視為手誤。
手誤情況
- 明明誦讀嘅係自陣牌，但碰觸到敵陣牌
- 明明誦讀嘅係敵陣牌，但碰觸到自陣牌
- 明明係空牌，卻碰觸到任何花牌
2）比賽全程只可以使用單手，使用雙手視作違規。比賽開始後第一張所取得嘅花牌如果使用左手，就必須一直使用左手取牌。
3）比賽時，可以將花牌自由重置，但需事前告知對方。
於「競技歌牌」奪勝技巧
1）首先背熟好100首上句同「決字」！
想快速取牌，將百人一首所有上句同「決定字（決まり字）」背熟係重點。決定字即係指只要聽上句去到某個字，就可以諗到下句花牌嘅字眼。
- ちはやぶる かみよもきかず たつたがは（上句）
からくれなゐに みづくくるとは（下句） - ちぎりおきし させもがつゆを いのちにて（上句）
あはれことしの あきもいぬめり（下句） - ちぎりきな かたみにそでを しぼりつつ（上句）
すゑのまつやま なみこさじとは（下句）
例如由「ち」開頭嘅上句有以上幾句，而當中有兩句都以「ちぎ」開頭，但一句係以「ちは」開頭。所以，只要聽到「ちは」就可以得出「からくれなゐに みづくくるとは」嘅下句牌為正確花牌嘅結論。而呢兩個字眼就被稱為「決定字」。只要知道「決定字」，唔洗聽曬完整嘅上句，就可以知道下句，搵出下句牌所放置嘅位置，從而快而準確奪取花牌。
2）細心聆聽、然後靠嘅就係爆發力同專注力！
競技歌牌唔單止需要有驚人嘅記性，仲考驗瞬間嘅爆發力同反射神經。細心聆聽上句，判斷下句，搵出同鬥快搶正確嘅花牌，一連串動作考驗反應速度。此外，一局比賽大概90分鐘。專注力同持久力都係缺一不可㗎！
Comments