大家對北歐都有一份憧憬，浪漫國度，配合大自然景色同歐陸式建築，真係令人好想去渡吓假，影吓靚相！但真係唔係個個都咁有米去到北歐... 不過都唔緊要！喺東京近郊嘅埼玉縣開咗個北歐風嘅metsä village，去東京玩嘅朋友們想近近地感受北歐風情就唔好錯過喇！
到metsä village休閒渡假
喺鄰近東京嘅埼玉縣飯能市興建咗個「metsä」，主要由MOOMINVALLEY PARK（姆明谷）同metsä village組成。前者係萬眾期待嘅姆明主題公園，將於2019年3月16號開幕。但metsä village已經喺2018年11月9號率先同大家見面喇！
以森林同湖畔塑造渡假風，令人恍如置身於北歐大自然中，拋開都市嘅忙碌同緊張情緒，體驗北歐式休閒生活。呢度不定期有Event舉行，今次FUN! JAPAN團隊去嘅時候適逢聖誕節，所以有期間限定嘅聖誕市集，無論室內室外都佈滿聖誕裝飾，更增添幾分熱鬧同節日氣氛！
除咗森林同湖畔組成嘅自然景觀可以俾香港人有個呼吸清新空氣，relax吓嘅環境之外，喺metsä village有藍色小屋，擺個靚pose仲可以呃到人去咗歐洲添。仲有其他擺設可以影到得意可愛嘅相㗎！
北歐品牌生活雜貨
metsä village嘅設施內有售各種北歐品牌嘅生活雜貨，有啲甚至係出產自北歐地方，而價錢有平有貴，可以喺度買到啲又平又靚嘅精品返去當生日禮物送俾人又得，當手信都得！
而北歐人重視生活品質，當然唔少得北歐健康食品，仲有售日本飯能市當地嘅新鮮蔬果添。
體驗休閒生活
呢度仲有北歐風workshop(工作坊)體驗，可以同朋友一齊DIY整手工，亦有專門開設俾小朋友嘅添，一家大細去渡個假都好適合！除此之外，仲可以喺呢個大湖畔上划獨木舟，泛舟湖上真係好寫意呀。
玩到下午，識嘆梗係去嘆返個afternoon tea(下午茶)啦。呢度除咗有食正餐嘅餐廳，戶外小食車，仲有可以嗌返杯coffee or tea，一邊欣賞森林湖景，一邊同三五知己談心，真係好有feel呀！
餐廳除咗有室內仲有室外露天座位，餐廳都有提供外賣食品，仲有戶外小食攤檔，都可以對住湖畔享受悠閒時光。
雖然姆明Valley Park喺2019年3月16號先開幕，但metsä village都舉辦緊「teamLab 森林與湖泊的光之祭典」嘅活動㗎喇。
可以一次過玩埋佢! 詳情可以睇另一篇相關文章: 大自然與光共舞嘅藝術 「teamLab 森林與湖泊的光之祭典」
景點資訊
- 名稱: metsä village
- 地址: 埼玉縣飯能市宮澤327-6 metsä
- 開放時間: 10:00-21:00 (Market hall於20:00關門) (因應event而時間可能有所更改)
- 入場費: 入場免費 (姆明Valley Park同「teamLab 森與湖的光之祭」需另外購票)
- 交通方法:
西武池袋線「飯能站」北口1號巴士站乘搭「metsä(メッツァ)直達巴士」或 「metsä(メッツァ)經武蔵高萩站巴士」，於metsä(メッツァ)巴士站落車
JR八高線「東飯能站」東口2號巴士站乘搭「metsä(メッツァ)直達巴士」，於metsä(メッツァ)巴士站落車。（僅限星期六日及日本公眾假期運行）
Comments