去東京都去咗好多次, 想試吓新體驗? 又或者想喺特別日子安排一個獨特嘅驚喜俾心愛嘅情人, 屋企人, 或者係朋友? 咁而家就介紹返個獨特嘅遊日體驗俾你啦。呢個就係包機喺高空之中俯瞰日本景色喇! 以與眾不同嘅角度欣賞靚絕全日本嘅富士山! 聽落都夠唒型啦係咪?!
SKY TREK私人包機嘅飛行體驗
事不宜遲, 小編就即刻去試吓空中飛行睇景有幾咁架勢先! 我哋去搭嘅就係由SKY TREK提供嘅飛機包機飛行體驗。之前一直都係會員制先用到包機服務, 係2018年10月先開始對外開放, 聽落都夠唒高級, 豪華感十足! 飛機內仲有餐卓可以飲食, 同親人朋友悠閒遊玩或者同情人包機渡過浪漫二人世界都係一個好選擇吖。
SKY TREK有提供參考路線, 亦有自選指定100個日本國內機場單程或來回自由配搭都得。而搭嘅飛機唔係直升機, 而係小型飛機, 更顯奢華感覺! 機內設有6個座位, 因為一次飛行都只係計算一個價錢, 所以可以同親人朋友加埋最多6個人夾份除返開就最抵玩。
出發體驗空中奢華之旅
小編試搭當日就由池袋搭半個鐘電車去崎玉縣嘅桶川站再搭的士入去私人飛機場。一開始真係有啲緊張, 話唒第一次搭小型飛機, 平時過山車都唔敢搭嘅我究竟扮唔扮到富豪搭私人飛機呢?!
今次好榮幸地試搭到富士山路線! 首先去到登記確定完本人身份之後就搭車去飛機場禁區。見到一架架富豪們停泊喺度嘅私人飛機真係型到我嘩嘩聲! 而我哋所搭嘅機型就係6個座位嘅「KODIAK100」, 一座位一個大窗嘅設計夠唒豪華!
以獨特嘅角度, 欣賞嘆為觀止嘅富士山
起飛前記住要熄手機或者將電話調教為飛航模式。靚相等落機後先upload啦命仔緊要呀哈哈! 飛上空中後第一個目的地就係日本地標富士山。由崎玉縣過去從高處沿途欣賞日本景色, 其實真係好有趣!
因為唔同平時國際或者內陸航班飛到萬呎高空, 雲層上乜景都睇唔到, 小型飛機一直喺雲層下嘅高度飛, 日本地貌喺眼前完整呈現。睇見啲屋又矮又細, 仲有河川, 公園, 運動場都好似小模型咁好得意! 就算去高樓大廈嘅展望台都俾唔到呢個景你。
眼見越嚟越近富士山真係好興奮。原來近睇富士山係咁巨大㗎! 真係好宏偉! 果然係日本標誌性景點。就算平時搭民航飛機喺高空影過去都好短時間又無得咁接近,影完張相就要同佢講byebye, 但今次可以咁近距離慢慢欣賞富士山之美, 真係夠唒特別。
最正係個窗口比一般民航飛機大, 可以同富士山影合照呀! 同埋建議拍影片留住咁獨特嘅呢一刻, 拍完片upload上facebook或instagram, 仲有種擁抱富士山, 唯我獨專嘅自豪感添!
之後再飛返去東京, 沿途見到鎌倉、江之島、橫濱、台場彩虹橋、仲有東京鐵塔等標誌性景點, 上空望落去估吓係咪咩地方都幾好玩! 平時影相都不外乎由地面影上去, 喺遠處影過去, 或者係建築物內水平線影。今次就將角度拉大啲, 高空影落去! 原來著名景點變成「模型」後係咁嘅樣, 真係好特別好得意呀!
機內製造難忘時刻
飛機內提供舒適座椅, 其中一款飛機入面仲附有餐桌, 可以提早叫飛機公司幫手製造驚喜嘅準備, 咁就可以喺飛行中為心愛嘅人製造驚喜啦。例如可以同親人好友慶祝生日, 將獨特體驗當作生日禮物贈送俾心愛嘅人, 或者喺機內乾杯飲勝慶祝好似生日, 週年紀念日等重要日子, 都會係一個好難忘同完美嘅回憶! (但小心攜帶物品有所限制, 不能帶酒精飲品上機)
仲有呀, 點求婚諗到頭都爆? 要特別啲嘅求婚又怕醜唔想喺眾人面前跪低? 咁就可以試吓包一架飛機用獨特嘅方式求婚啦! 嘩~ 如果被浪漫醉人嘅日落或者夜景包圍, 對住鍾情日本嘅女朋友求婚, 製造永世難忘嘅浪漫時刻, 仲唔感動到即刻say YES?!
一開始仲話好緊張, 雖然去富士山途中因為接近山嘅氣流關係, 小型飛機搖晃程度大咗, 但我感覺都安全嘅, 所以覺得幾好玩, 哈哈。擔心暈機浪嘅朋友都可以事前備服暈浪丸以防萬一。想去一趟特別嘅日本之旅, 用獨特嘅角度欣賞日本景點, 可以豪啲試吓搭SKY TREK嘅小型飛機包機服務。與別不同, 型過其他人遊日呀!
更多資訊:
- 公司名稱: SKY TREK
- 官方網頁: https://skytrek.co.jp/
- 參考價格:
東京空中遊覽路線 30分鐘 每次飛行100,000円起 (未含稅)
富士山空中遊覽路線 60分鐘 每次飛行150,000円起 (未含稅)
(根據唔同時期同路線, 價錢會有所不同。)
富士山路線, 仲有其他期間限定路線等以優惠價推出, 詳情請Click入https://skytrek.co.jp/瀏覽。 - 預約方法: 搭機日6個月至3天前接受預約(特別安排請事先提出), 有興趣可使用中文, 英文或日文電郵至[email protected] (SKY TREK Reservation Desk)查詢及預約, SKY TREK有職員可以中文或英文溝通。
- ※飛行時間及距離會因應天氣、飛行限制區域、地形、總重量等而有所變更。
- ※SKY TREK股份有限公司係提供預約服務嘅旅遊業者, 實際飛行由SKY TREK股份有限公司簽約合作的航空公司營運。
Comments