「好想住喺迪士尼酒店啊！！但係睇到房價就嚇親」、「每次一離開東京迪士尼，都希望有隨意門可以即刻返到去酒店」。你係咪同小編一樣有過咁樣嘅心聲呢。今次FUN!JAPAN團隊就潛入咗採訪「東京迪士尼樂祥飯店 Tokyo Disney Celebration hotel®」。帶你嚟欣賞呢間「經濟型」嘅官方酒店！！！
彷彿置身南國度假勝地
「東京迪士尼樂祥酒店 Tokyo Disney Celebration hotel®」坐落於千葉縣新浦安地區，距離東京迪士尼樂園®同東京迪士尼海洋®大概15～20分鐘車程。遊客可以乘搭行駛於飯店同兩園區之間嘅免費接駁巴士「樂祥接駁巴士」，唔洗煩惱交通問題。館內設備雖然簡單，但提供嘅服務內容唔會因為價格親民而降級！分成2棟嘅酒店建築，設計成唔同嘅主題，分別係喺2016年6月開幕，客房數352間嘅「心願館」，以及同年9月開幕，客房數350間嘅「探索館」。2棟酒店準備嘅房型符合各種需求，「探索館」更提供可以容納5人入住嘅客房。
館內裝飾融入兩園區風格 等慢慢睇 仔細尋樂趣
洋溢夢想同心願 東京迪士尼樂祥飯店®：心願館 (Wish)
一行入「東京迪士尼樂祥飯店®：心願館 Tokyo Disney Celebration hotel®: Wish 」大廳，就可以睇到米妮老鼠坐喺咖啡杯入面迎客，令人諗起東京迪士尼樂園®嘅遊樂設施「愛麗絲的下午茶派對」。係唔係好想坐上去同米妮影相留念呢；另外，仲設置欣賞迪士尼電影嘅專區，小朋友喺度等，都唔會覺得無聊啦。
行入客房，就會見到畫咗一眾迪士尼明星，開心咁玩緊園區遊樂設施嘅可愛壁畫，喺休息之餘不妨嚟數吓自己玩過其中幾多項遊樂設施，就連房間入面嘅牆紙都係精心設計。
嚟到中庭，係唔係覺得眼前嘅景象似乎有啲眼熟呢。有《愛麗絲夢遊仙境》嘅柴郡貓、《尋龍傳說》中嘅龍。無錯！中庭嘅設計概念就係東京迪士尼樂園®嘅夜間巡遊。
充滿冒險與發現嘅 東京迪士尼樂祥飯店®：探索館 (Discover)
同心願館風格完全唔同，「東京迪士尼樂祥飯店®：探索館 Tokyo Disney Celebration hotel®: Discover」以冒險同發現為主題。準備要出發去探險嘅米奇老鼠喺大廳等候你嘅大駕光臨。
嚟到客房入面，映入眼簾嘅係畫有東京迪士尼樂園®嘅遊樂設施「叢林巡航：勇闖野生世界 Jungle Cruise: Wildlife Expeditions」同「飛濺山 Splash Mountain」嘅壁畫。令你返到入房之後，都可以再次回味難忘嘅冒險旅程。
跟住就嚟到中庭探險啦！似乎有種嚟到《加勒比海盜：魔盜王》嘅世界，海盜船、裝住金幣同珠寶嘅寶物箱，甚至仲擺咗啤酒桶檯同凳。到咗夜晚，點咗燈嘅中庭令冒險嘅氣氛更加濃厚，一於以探險家嘅心情喺中庭散步啦！
價格親民 服務完備特典滿載
「東京迪士尼樂祥飯店®」最大嘅魅力之一，就係入住價格親民。以4人房為例，每晚1萬7600円起，每人每晚約4400円就可以入住(依日期不同，價格會有所變更)。最重要嘅係，開園前15分鐘優先入園、入園保證、購買特別連日護照等嘅官方酒店優惠，「東京迪士尼樂祥飯店®」呢度全部都有。特別方便嘅一點係，退房嗰陣只需要將房卡投入門口嘅箱入面，就完成咗退房手續啦。
兩館酒店內亦設置迪士尼小舖「Disney Fantasy」，販賣園區內商店特別出售嘅商品，亦有24小時便利店。有200個座位嘅餐廳，空間相當寬敞，喺早餐時段提供簡單嘅吃到飽自助餐。
講到迪士尼酒店就會諗到印有迪士尼明星嘅物品。「東京迪士尼樂祥飯店®：心願館」提供米妮老鼠圖案嘅房卡套埋用品，而「東京迪士尼樂祥酒店®：探索館」則係米奇老鼠圖案。順便一提，房內嘅拖鞋亦印上咗米奇老鼠嘅頭吖！
免費接駁巴士來往酒店到園區
唔似其他迪士尼官方酒店步行即可抵達兩園區，：東京迪士尼樂祥飯店提供「樂祥接駁巴士」免費接送房客來往兩園區同酒店，酒店到東京迪士尼海洋約15分鐘，到東京迪士尼樂園則大約20分鐘。高峰時間每個鐘約8班，其他時間帶每個鐘都有2~3班。實際搭車時間因天候同交通情況有可能延遲，溫馨提醒你記得把握時間提早出門啦。
睇到呢度，係唔係一改迪士尼酒店等於昂貴嘅觀念呢，價格親民又享有搶先入園嘅優惠，真係讓心動不如行動！下次安排迪士尼行程又唔想舟車勞頓返到去酒店嘅話，東京迪士尼樂祥酒店係你最好嘅選擇。一於就嚟呢度令你嘅東京迪士尼回憶更加多采多姿啦！！
Comments